Notísia foun

Imajen ne’e hatudu Kayrala Xanana Gusmão fui bee ba Marí Bim Amude Alkatiri nia ulun bainhira hala’o kampaña hamutuk ba kandidatu Prezidente Repúblika Francisco Guterres Lú Olo iha tinan 2017.

Timor Post (20/10/2020)—Sekretáriu Jerál FRETILIN, Marí Bim Amude Alkatiri husu ba militante hotu atu buka hatene istória, tanba Kayrala Xanana Gusmão konsideradu tenta lori partidu ne’e ba muzeum.

Alkatiri hatete, militante liuliu estrutura tenke hatene istória luta FRETILIN nian husi inísiu luta ba libertasaun nasionál to’o ohin loron.

Alkatiri subliña, FRETILIN moris ho nia istória rasik.

“Ita ida-idak iha obrigasaun atu husik ita nia memória. Brani atu hakerek, brani atu ko’alia, entaun husik ita nia memória, mas la’ós istória. Buka atu hatene, lee saida mak ema hakerek ona mas ho sentidu krítiku. Ne’e mak FRETILIN,” Alkatiri afirma bainhira loke formasaun polítika ba estrutura FRETILIN nian husi munisípiu iha Komite Sentral FRETILIN (CCF sigla Portugués), Dili, Segunda (19/10/2020).

Tanba ne’e, Alkatiri subliña, biar ema ko’alia barbarak maibé buka atu hatene istória maka signifikadu ba moris nu’udar ema FRETILIN iha rasik identidade.

“Ita tuir de’it ita nia dalan, ita nia moris ne’e iha signifikadu bainhira ita hatene ita mai husi ne’ebé no atu ba ne’ebé,” Alkatiri subliña.

Alkatiri dehan, Xanana durante ne’e buka alternativu oioin hodi lori FRETILIN ba haloot iha muzeum rejisténsia.

“Loloos (tuir) Xanana, FRETILIN tenke ba muzeum. Nia halo buat hotu-hotu atu lori FRETILIN ba muzeum. Tanba sé FRETILIN mak iha muzeum, entaun Xanana iha lalehan. Objetivu (Xanana) maka ne’e, FRETILIN tenke ba muzeum,” Alkatiri hatutan.

Nia haktuir, Xanana lakohi duni iha 1999, FRETILIN atu reorganiza-an.

“Tanba nia (Xanana) dehan FRETILIN ne’e povu tomak nian. Labele grupu ida de’it atu kaer fali FRETILIN. Ha’u hatan ba nia, sim! Povu tomak nian!. Sé Povu tomak nian, nia (Xanana) mak ba oho tiha nia (FRETILIN), povu ba ne’ebé,” Alkatiri kestiona.

Fó hanoin katak, iha kampaña Aliansa Mudansa ba Progresu (AMP) ne’ebé kompostu husi CNRT, PLP ho KHUNTO, mosu mós deklarasaun katak sei lori FRETILIN nu’udar partidu istóriku ba haloot ho dignidade iha muzeum rejisténsia.

Entretantu formasaun kona-ba polítika FRETILIN nian durante loron sanulu. Formasaun ne’e abertura iha CCF, Komoro, Dili no sei kontinua iha Salaun Semináriu Dare to’o hotu. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 385
  • Page views today : 470
  • Total visitors : 70,391
  • Total page view: 96,964

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur