Notísia foun


Timor Post (19/10/2020)—Sekretáriu Provinsial Padre Lourenço das Neves Soares, SDB fó sai ona oráriu serimónia funeral ba Padre Ilídio Eduardo do Rosário Correia. Iha oráriu ne’e, haktuir mós semitériu ne’ebé halo’ot matebian.

Tuir oráriu misa funebre ba Matebian Padre Ilídio, iha loron 19/10/2020, tuku 06:00 misa iha Kapela Centro de Treinamento Dom Bosco  (CENTEC). Hafoin ne’e desloka kedas ba Vemase hodi misa hamutuk ho sarani sira iha tuku 09:00. Depois de misa iha Vemasse, mate-isin sei kontinua dezloka kedas ba Fatumaka hodi halo Misa Funebre nian iha tuku 15:00. Nune’e, sei dezloka mate-sisin ba halo’ot (despedida ikus) iha Semitériu Waibeana, Fatumaca, Munisípiu Baukau.

Padre Ilídio hakotu iis iha Hospital Nacional Guido Valadares (HNGV), Dili, iha loron Domingu (18/10/2020) tanba sofre moras fuan.

Tuir kronolojia minutu hirak Padre Ilídio hakotu iis, iha Domingu dader tuku 9:00, Padre prezide misa iha Igreja Parokia Maria Auxiliadora Komoro. Maibé, hafoin Padre hala’o sinál da kruz no kontinua lidera misa ne’e, derepente de’it Padre nonok minutu balun halo sarani sira hakfodak iha fatin. Maske nune’e, Padre kontinua fali maibé la to’o minu Padre kontinua nonok no sarani sira haree ba Altar nota katak Padre nia kondisaun la estavel no sira deside ba ajuda kaer netik Padre no halo esforsu hotu hodi evakuasaun ba HNGV, maibé liu oras hirak nia laran médiku sira la konsege salva.

Amu Ilídio Eduardo do Rosário Correia, moris iha Vemasse iha loron 13 outubru 1970.

Amu Ilídio simu ordenasaun nu’udar Amu Lulik iha loron 01 maiu 2002.

Amu Ilídio hala’o kna’ar dahuluk iha Igreja Venilale, munisípiu Baucau. Husi ne’eba, Amu salesianu ne’e hala’o kna’ar iha Dioseze no ikus liu iha Igreja Parokia Maria Auxiliadora Komoro.

Nu’udar salesianu, Amu Ilídio hetan oportunidade ba hasai kursu doutoramentu kona-ba Direitu Kanóniku iha Filipina, no iha tinan 2019 hetan fiar ba asumi kna’ar nu’udar Vise Diretór Casa Pós-noviciado, Komoro no iha tinan 2020 sa’e ba Diretór.

Ho peregrinasaun ikus Amu Ilídio iha mundu, Arsebispu ba Arkedioseze Metropolitana Dili, Don Virgílio do Carmo da Silva, konsidera Igreja Katóliku lakon fígura boot ida.

Arsebispu hala’o ona bensaun ba Padre Ilídio nia isin mate iha Kapela São João Bosco, Komoro, Dili, hafoin lori hikas husi HNGV. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,187
  • Page views today : 1,690
  • Total visitors : 32,397
  • Total page view: 44,548

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur