Notísia foun


Timor Post (15/10/2029)-Oitavu Governu aprezenta ona proposta Orsamentu Jerál Estadu (OJE) 2021 ba Parlamentu Nasionál (PN) hamutuk biliaun $1.895 komposta hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minor millaun $61,14 no kapitál dezenvolvimentu millaun $503,20.

Proposta orsamentu ho karakter normal ne’e aprezenta iha tuku (15:00) hosi Vise-Ministru Finansas, Sara Lobo Brites, akompaña hosi Ministru Asuntu Parlamentár Komunikasaun Sosiál, Francisco Jerónimo.

Dokumentasaun orsamentál sira ne’ebé governu aprezenta ba Parlamentu Nasionál mak hanesan livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rubrika orsamentál), livru 5 (parseiru dezenvolvimentu) no livru 6 (fundu espesiál-FDCH).

Iha biban ne’e, Prezidente Parlamentu Nasionál, Deputadu Aniceto Longuinhos Guterres Lopes, apresia governu nia esforsu tanba aprezentasaun proposta lei orsamentu tuir lei haruka.

“Iha oras 15.00, data dia 15 Outubru ne’e governu kumpre duni prazu aprezentasaun proposta lei Orsamentu Jerál Estadu. Prosesu tuir mai kabe ba kompeténsia parlamentu nian atu hala’o prosesu orsamentál iha Parlamentu Nasionál”, Aniceto Guterres intervein iha Konferénsia Imprensa hafoin simu proposta lei, iha Parlamentu Nasionál, kinta (15/10/).

Aniceto Guterres fó sai katak meza prezidénsia sei halo leitura ba númeru proposta-lei ne’e no asesór legál sira sei prepara nota téknika hafoin baixa ba Komisaun C no komisaun espesializada permanente sira seluk atu aprova relatóriu no paresér.

“Posivelmente segunda feira, lae tersa-feira atu baixa ba Komisaun C, aban sei fó tempu ba tékniku sira atu prepara nota téknika”, nian hakotu.(Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 908
  • Page views today : 1,391
  • Total visitors : 73,840
  • Total page view: 102,649

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur