Notísia foun


Timor Post (09/10/2020)— Vise Xefe Bankada CNRT, Deputadu Patrocínio Fernandes, hatete, sorte CNRT sai hosi koligasaun Aliansa Mudansa ba Progresu para FRETILIN aproveita, selae FRETILIN la ukun “Para sempre”
Patrocínio hato’o asuntu ne’e hodi hatán ba deklarasaun hosi Xefe Bankada FRETILIN, Francisco Miranda Branco, ne’ebé sauda no kumprimenta Bankada opozisaun CNRT, no husu atu bele simu realidade polítika ne’ebé mak akontese, tanba ohin loron tau sira (CNRT) iha Bankada Opozisaun.

Deklarasaun ne’e Xefe Bankada FRETILIN hasai iha votasaun Final-Global ba OJE 2020.

“Sira (FRETILIN) La aguenta ona sai opozisaun, hamrook demais ona atu ukun, tanba ne’e mak la banati ba lei, haksoit hosi lei leten ba ukun lalais, tanba se la aproveita ida ne’e karik, FRETILIN kal la ukun para sempre ona karik. No komesa hosi debate ne’e ha’u hein hela katak FRETILIN atu hato’o netik liafuan agradesimentu ida ba CNRT, tanba sorte CNRT hanesan sees tiha uitoan hosi aliansa ida mudansa ba progresu ne’e, iha fatin ba FRETILIN haksoit tama lalais tiha, selae ne’e kal FRETILIN, hosi kedas ninia vida ba ne’e, hanesan tata liman de’it ona, la ukun ona, tanba ne’e mak aproveita tama lalais” Patrocínio informa ba jornalista sira iha PN, sesta (09/10).

Iha fatin hanesan, hatán ba deklarasaun polítika ne’e, Xefe Bankada FRETILIN, Francisco Miranda Branco, hatete, FRETILIN nunka hamrook ba podér, maibé FRETILIN preokupa ho kultura ida forma Governu, depois sobu Governu ne’ebé halo hosi CNRT.

“FRETILIN la’ós hamrook ba podér, maibé FRETILIN preokupadu ho situasaun ne’ebé hamoris iha ita nia rain, kultura ida forma Governu sobu Governu, sobu tiha Governu forma fali Governu, no se mak sai vítima, Povu no Estadu mak sai vítima, entaun ho espíritu responsabilidade ba Povu no Nasaun, FRETILIN simu podér, simu konxiénsia, simu responsabilidade atu viabiliza Governu ida ne’e”, Branco afirma.

Branco dehan, FRETILIN lamenta tebes, tanba durante CNRT ukun tinan-10 resin, gasta fundu mina rai besik biliaun $14.

“Ami lamenta CNRT ukun kleur, tinan 10 resin, gasta ita nia fundu mina rai besik biliaun 14, ita nia rekursu nesesidade báziku hanesan bee moos iha sidade kapitál repúblika de’it povu sei halerik ba ida ne’e. Tanba ne’e ami hanoin CNRT tenke simu realidade atu tuur hanesan opozisaun”, Branco espresa.

Branco haktuir uluk CNRT kontrata Juis 40 hosi Portugal mai para ajuda konsolida sistema justisa iha Timor-Leste, maibé bainhira Juis sira komesa deskobre buat ruma hosi Governasaun CNRT nian, sira duni fila tiha.

“Uluk sira kontrata Juis 40 hosi Portugal, mai ajuda atu konsolida ita nia sistema justisa, depois kuandu sira haree katak Juis sira komesa deskobre buat ruma ne’ebé la loos hosi Governu sira nian, sira obriga Parlamentu Nasionál hasai rezolusaun ida, hodi dun sai Juis nain-40. Ohin loron sira kestiona Tribunal, kestiona Prezidente Repúblika, kestiona Governu, entaun sira mak loos liu, buat hotu la loos, Estadu hotu la loos, sira mak loos liu”, Branco espresa ho oin hamnasa.

Branco hatete, FRETILIN sempre iha oportunidade ba ukun no nunka lakon, maibé sempre iha manobra hosi CNRT, para FRETILIN labele ukun.

“Oportunidade sempre iha, ami sempre manan, ami nunka lakon ida, mais sempre iha manobra hosi sira, atu ami labele ukun. Haree de’it iha Sétimu Governu, ami iha konsertasaun, sira rasik hatete dehan atu apoia Governu FRETILIN nian iha Parlamentu Nasionál, maibé kuandu hili de’it Prezidente, sira nia pozisaun la loos tiha ona, entaun se mak la loos iha prosesu sira ne’e hotu.

Ne’ebé ami hanoin ita lalika kria polémika iha nasaun ne’e, tanba Povu ne’e presiza mak dezenvolvimentu Nasionál. No dezenvolvimentu nasionál ne’ebé tuir polítika sua exelénsia Primeiru Ministru Taur Matan Ruak nian, mak dezenvolvimentu nasionál ne’ebé konsentra iha ema, ida ne’e mai marka mudansa no pontu ne’ebé la hanesan ho governu anterior sira”, dehan Branco.(Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,216
  • Page views today : 1,821
  • Total visitors : 71,222
  • Total page view: 98,315

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur