Notísia foun


Timor Post (05/10/2020)—Orsamentu ba Prezidénsia Repúblika ho montante millaun $6.044 no Parlamentu Nasionál (PN) millaun $12.040, pasa iha dabate orsamentu jerál estadu espesialidade.

Rezultadu votasaun ba orsamentu Prezidénsia Repúblika nian, a-favor 43, kontra 7 no abstensaun 13, no Parlamentu Nasionál nian, a-favor 41, kontra zero (0) no abstensaun 19.

Deputadu Proponente no atuál Prezidente Komisaun A, Joaquin dos Santos, hatete, proposta númeru 3 ba Prezidénsia Repúblika, kategoria bens serbisu nian ne’e, mai hosi rezultadu audiénsia publika ho Xefe Casa Sivíl Prezidente Repúblika nian, ne’ebé husu atu verba ida tau ba viajen estranjeiru nian ne’e, muda fali ba kapitál menór, hodi sosa karreta ida ba Prezidénsia Repúblika, inklui mákina ida atu halo moos bee ba nesesidade Prezidénsia nian.

“Sira dehan karreta ho mákina ne’e, ba sira urjente tebes atu hola iha entre Novembru ba Dezembru, tanba ne’e mak ita konkorda atu husu ba Parlamentu aprova pedidu ida ne’e, para sira iha 2021 la iha ona nesesidade atu sosa karreta ba Prezidénsia Repúblika, tanba ne’e mak ita hanoin katak proposta ne’e pertinente i parlamentu tenke aprova. Tanba ne’e ha’u hanoin razaun ne’ebé mak aprezenta mai fundamentadu i la iha razaun atu rejeita”, Joaquin dehan liuhosi plenária, segunda (05/10).

Entretantu montante orsamentu $6.044 ba Prezidénsia Repúblika ne’e, aloka ba Gabinete Prezidente Repúblika, iha kategoria bens serbisu ho montante $500. Aloka ba Casa Sivíl, iha kategoria saláriu no vensimentu $996, bens no serbisu $3.723, transferénsia publika $53, kapitál menór $34. No aloka ba Casa Militár iha kategoria ba bens no serbisu $738.

Entretantu, iha biban ne’e, votasaun ba aliterasaun proposta númeru 4, ne’ebé mak aprezenta hosi Deputadu Bankada opozisaun, kona-ba hasai osan viajen estranjeiru ba Prezidénsia Repúblika, la pasa.

Deputada proponente ba Proposta númeru 4, Virginia Ana Belo, justifikasaun razaun hatama proposta tanba falta de’it fulan rua (2), inklui problema kauza mundiál COVID-19, ne’ebé difisil atu viajen ba rai li’ur.

“Se iha nafatin alokasaun ba viajen estranjeiru, ha’u fiar katak ita sei la halo ezekusaun, para mais ho tan Prezidente Repúblika, ha’u hanoin atu trata viajen estranjeiru ba nasaun ida, entidade ida hanesan Prezidente Repúblika, presiza tempu ida para depois marka viajen no entidade ne’ebé mak atu hasoru, tanba ida ne’e mak ami nia proposta ne’e husu para hodi hasai tiha osan ba viajen estranjeiru”. Virginia esplika.

Enkuantu, Montante orsamento $ 12.040 ba Parlamentu Nasionál, aloka ba Parlamentu Nasional $5.404, Gabinete Prezidente Repúblika $306, Bankada Parlamentares $1.258, Konsellu Fiskalizasaun Sistema Nasionál Intelijénsia Timor-Leste $93, Grupu Muller Parlamentár Timor-Leste (GMPTL) $74, Gabinete Sekretáriu Jerál Parlamentu $15, Gabinete Auditoria Interna $1, Diresaun Jestaun Finanseiru $1.301, Diresaun Rekursu Umanus Formasaun $2.642, Diresaun Apoiu Parlamentár $32, Diresaun Komunikasaun $98, Diresaun Protokolu $5. Organizasaun Global Parlamentares Kontra Korrupsaun $70, Sentru Promosaun Igualidade Jéneru $7, Gabinete Estudu Estranjeiru no Jurídiku $6 no Konsellu Konsultivu Fundu Petrolíferu $243. (Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 12 
  • Visitors today : 1,058
  • Page views today : 1,491
  • Total visitors : 32,268
  • Total page view: 44,349

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur