Notísia foun


Timor Post (02/10/2020)- Primeiru Ministru Taur Matan Ruak, ataka reprezentante iha uma fukun parlamentu nasionál bainhira konfirma kona bá ezekusaun orsamentu.

Eis prezidente da repúblika ne’e rekorde bainhira nia sei hanesan prezidente repúblika husu kona bá ezekusaun deputadu sira hatán katak labele hare nivel ezekusaun maibé hare ba progresu ne’ebé ezekuta ona, relasiona ho ne’e nia dehan la preokupa ho nivel ezekusaun, maibé tenke gasta ho di’ak.

“Ha’u hakarak hatete kona-ba kapasidade ezekusaun orsamentu, se na’i deputadu sira hatene uluk ha’u sei Prezidente Repúblika ha’u mai diskursu iha ne’e ke kuaze por pouco ita boot sira atu substitui ha’u hosi Prezidente Repúblika, iha diskursu ha’u hatete, ita labele husu osan hira mak nia gasta ona maibé tenke husu saida mak nia halo ona. Ha’u la preokupa ho nia nivel ezekusaun entaun ha’u preokupa ha’u nia membru governu no funsionáriu sira gasta osan ne’e ho di’ak, maski la’o neineik maibé sai di’ak duke halai lalais maibé arbiru de’it”, afirma Taur Matan Ruak iha intervensaun loron daruak debate OJE 2020 iha Parlamentu Nasionál, Sesta (02/10).

 Primeiru Ministru Oitavo Governu ne’e hatutan nia mandatu hotu deputadu sira bele hurulele nia kona-ba inkapasidade ba ezekusaun orsamentu lala’o, maibé agora  lian la hanesan, tanba filozofia la hanesan.

“Ohin ita hili dalan rua de’it ohin ha’u tuir ita boot sira ka ita boot sira tuir ha’u, se lae ita la’o ketak-ketak ” Taur dehan.

Tuir Taur katak atu ezekuta de’it osan ne’e lalais, tanba se mak la hatene gasta osan, satan osan ida barak liu, maibé atu gasta di’ak ne’e mak problema.

“Agora ne’e kualkér ema ida nia eskrita ba ha’u nia gabinete, akuza malu ha’u haruka ba (KAK) no haruka ba inspetór jerál ha’u la tau iha ha’u nia gabinete, entaun nia diretór no membru governu sira hatene ha’u nia karater ida ne’e, tanba ne’e hotu-hotu buka dalan atu rezolve problema la’ós aumenta problema hanesan mós la’ós dun liman ba malu maibé servisu ekipa no rezolve problema mós hamutuk” Nia salienta.

“Ne’ebé ha’u husu parlamentu ajuda ami atu gasta osan di’ak ne’e di’ak liu duke insiste beibeik de’it kona-ba nivel ezekusaun, tanba nivel ezekusaun lalais liu di’ak liu maibé to’o ikus tribunal de kontas tuir ita. Tanba ne’e, neineik, beibeik maibé di’ak liu duke ita halai maibé ita monu.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 864
  • Page views today : 1,311
  • Total visitors : 73,796
  • Total page view: 102,569

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur