Notísia foun


Timor Post —Deputadu hosi Bankada FRETILIN no CNRT husu ba Konsellu Administrasaun Parlamentár  hasai  osan viajen estranjeiru millaun $ 1 resin ne’ebé prevee iha orsamentu privativu Parlamentu Nasionál tinan 2021.

“Osan ba viajen estranjeiru nian di’ak liu ko’a hotu, tanba daudaun nee mundu tomak enfrenta hela pandemia COVID-19. Ha’u haree ONU halo enkontru la’ós ema ba. Prezidente Repúblika iha fatin-fatin kolia de’it iha meius ne’ebé iha ona, ne’ebé ita lalika buka moras, viajen mai ita online de’it ona, tanba ONU mós halo hanesan ne’e ona ita nee atu halo saida, di’ak liu viajen estranjeiru ko’a tiha de’it.  Viajen lokál  labele ko’a”, afirma deputadu, Antonino Bianco hosi Bankada FRETILIN liuhusi reuniaun plenária Parlamentu Nasionál, tersa (29/09).

Iha fatin hanesan  Carmelita Moniz, deputada parlamentár CNRT, kestiona mós katak osan millaun ida resin tau iha viajen estranjeiru nee atu halo saida, tanba agora daudaun moras COVID ataka mundu tomak.

“Ha’u atu husu viajen estranjeiru ne’ebé mak tau millaun $1 resin la hatene ita atu halo viajen estranjeiru ba iha ne’ebé? No iha mundu tomak seidauk hatene bainhira mak COVID ne’e hotu. Tanba  nee mak ha’u husu esplikasaun.  Ha’u konkorda ho deputadu Bianco hasai tiha viajen estranjeiru um millaun ital nee”, dehan Carmelita.

Preokupasaun hanesan hato’o mos osi  Xefe Bankada Partidu Demokrátiku, Antonio da Conceição “Kalohan”.

Hatán ba preokupasaun nee, Sekretaria Jerál Parlamentu Nasionál, Cedelízia Faria, esplika osan  atu asegura de’it ba deputadu sira, la’ós ba sekretariadu.

“ Hosi parte sekretariadu nian ami ko’a hotu kedas, so prevee ba protokolu, tanba de’it karik deputadu sira halo viajen, sira tenke fasilita trata vistu sira iha Bali, tanba ne’e ami tau ne’e so para asegura de’it deputadu sira karik iha viajen”, esplika Cedelízia.

Sekretaria akresenta liuhosi  reuniaun konsellu administrasaun, deside redús orsamentu viajen lokál  ba fiskalizasaun.

“Fiskalizasaun  tenke loron tolu de’it, labele liu hosi loron haat, tanba nee mak viajen lokais ninian osan tun,” hatutan Cedelízia.

Entretantu dokumentu orsamentu privativu Parlamentu Nasionál ne’ebé prevee ba tinan 2021,  hamutuk millaun $16 resin, osan ba viajen lokál $20,400 mill no viajen estranjeiru millaun $1 resin.(Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 1,317
  • Page views today : 1,869
  • Total visitors : 69,881
  • Total page view: 96,267

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur