Notísia foun


Timor Post (28/09/2020)—Eis Komandante Ein Xefe FALINTIL, Kayrala Xanana Gusmão haktuir, nia hahú gerilla bainhira inimigu hahú domina to’o ona iha Aileu.

Iha momentu ne’e, tinan 1976, Comite Central FRETILIN (CCF) halo reuniaun iha Maubisse, maka deside katak, tanba inimigu hahú domina daudauk maka sira fahe malu hodi ida-idak ba nia fatin.

Nune’e, bainhira inimigu tama dadauk iha Maubisse, iha dadersan ida nia ho ekipa ida ho kilat lolon neen ho pistola ida ne’ebé nia rasik mak kaer hodi hahú gerilla.

“Inimigu hahú tama dadauk Maubisse, dader de’it sai husi Maubisse hodi liu ba Turiskai hodi liu ba Fatumakerek no kontinua ba Manatuto.

“Primeira-vez ha’u hahú la’o hodi koñese rai, to’o iha Fatumakerek, ami husu tutir ferik katuas sira iha dalan hodi kontinua la’o. Ha’u mai hela iha uma ida, iha katuas no ferik ho labarik balu. Iha Fatukmakerek mak ha’u rasik kontaktu ho ita nia natureja hodi kontinua la’o sa’e foho hodi liu ba Manatuto,” Xanana haktuir.

Inspirasaun saida mak Xanana hetan iha Fatumakerek maka, Portugues nia tempu nia hela de’it iha Dili la hatene saida mak timoroan sira sente iha foho.

“Ispira ha’u ne’e tanba ha’u komesa koñese moris loloos timoroan sira nian. Sira haan, hemu no toman moris lorloron nian mak inspira ha’u hodi involve iha luta to’o manan funu,” Xanana hatete.

Xanana mós dehan, bainhira nia sei jornalista maka sai mós hanesan oportunidade ida hodi hatete saida mak loos no sala. “FRETILIN halo sala ha’u dehan sala, UDT sala ha’u dehan sala, Portugues sira halo sala ha’u dehan sala,” Xanana haktuir.

Maske nune’e, Xanana salienta, inspirasaun ne’ebé nia hetan la’ós inspirasaun polítika ka ba kaer kilar hakilar viva tun sa’e maibé ikus ba rende. Maibé inspirasaun ne’ebé Xanana hetan maka nia subliña, hetan husi domin

Iha oportunidade mós Xanana dehan, membru CCF barak iha tempu funu mate hotu no hela de’it nia ho Mauhunu.

“Ami nain rua de’it mak moris, ha’u ho Mauhunu. CCF sira mate no barak ba rende.  Maibé ha’u la’ós FRETILIN,” Xanana hatete.

Nia hatutan, husi Maubisse hodi liu ba to’o Fatukmakerek hodi ba Manatuto no nia kontinua la’o to’o ba iha fatin ida iha nia uma lisan rasik hodi kontinua halo kontaktu ho natureza no hetan naran Kayraka Xanana hodi kontinua halo funu.

Ho prosesu hirak ne’e, Xanana konklui definisaun gerilla maka funu ida ne’ebé povu mak halo. La’ós tanba timoroan hirak ne’ebé mate ka sira ne’ebé kaer kilat mak lori ukun-an, maibé povu sira ne’ebé halo desizaun ba hakotu funu iha referendum 1999 maka ikus mai duni inimigu sai husi Timor.

Tanba ne’e, Xanana husu ba foinsa’e sira tenke respeitu ferik-katuas sira, balun mate ona, balun sei moris no balun sei moris susar hela. Nune’e, Inimigu kontinua tama iha fatin-fatin. (cao)

Please follow and like us:

NOTÍSIA FOUN

Site Statistics

  • Users online: 8 
  • Visitors today : 731
  • Page views today : 922
  • Total visitors : 44,375
  • Total page view: 60,253

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur