Notísia foun


Timor Post (23/09/2020)— Ministra Negósiu Estranjeiru no Kooperasaun (MNEK), Adalgisa Magno, rekoñese, normálmente orsamentu tinan anterior ba MNEK boot liu, maibé  ho situasaun pandemia COVID-19, ladún iha viajen, tanba ne’e Orsamentu Jerál Estadu (OJE) tinan 2020 hosi Ministériu Negósiu Estranjeiru no Kooperasaun (MNEK) ho montante $20 millaun.

“Ohin ami mai halo audiénsia ho komisaun B, ami atu aprezenta ami nia orsamentu, portantu orsamentu MNEK nian iha 20 millaun dolar. Normálmente ami nia orsamentu boot liu ida ne’e, ami nia orsamentu ne’e 26 ou 28 millaun, maibé tanba situasaun COVID, ami ladún viajen, kuaze viajen ba diplomata sira ne’ebé mak koloka iha rai li’ur. Ohin ami la husu adiantamentu ruma ba PN, maibé husu para aprova ami nia orsamentu ne’e”, informa Adalgisa ba jornalista sira iha PN hafoin remata audiénsia  ho deputadu komisaun B, kuarta (23/09).

Governante relata, total OJE 20 millaun ne’e, sura hosi Dotasaun Orsamentál Temporária  (DOT) fulan Janeiru mai to Setembru ne’e, ezekuta ona kuaze 70%, hela de’it pur-volta millaun 6 ne’ebé mak sei ezekuta iha fulan tolu ne’e.

“Ami garante sei ezekuta osan ne’e hotu iha fulan rua ne’e, tanba maioria ne’e para atu selu saláriu vensimentu, bens serbisu, depois kapitál menór oi-tuan de’it, ne’ebé maioria atu selu dívida, tanba ne’e mak ami bele ezekuta hotu,” dehan Ministra.

Prezidente Komisaun B, Jose Agostinho Sequeira “Somotxo” hatete, preokupasaun sira ne’ebé mak komisaun B koloka MNEK iha audiénsia ne’e  liuliu ba Timor-Leste nia reprezentasaun diplomátika iha rai li’ur inklui dívida.

“Ohin Ministra esplika buat hotu di’ak, ami mós la tau preokupasaun barak, tanba situasaun COVID ho ita foin tenta sai hosi ita nia situasaun finanseira ida bolu dehan duodecimo, tanba ne’e tempu ba ezekusaun mós badak tebes, orsamentu ida ne’ebé mak sira aprezenta ne’e sufisiente para atu bele taka despeza ho serbisu sira ne’ebé mak pendente hela, tan ida ne’e mak la lori tempu naruk para ami halo diskusaun”, Informa Somotxo.

Alende ne’e  Somotxho rekomenda  labele husik dívida sira ne’ebé reprezentasaun diplomata iha rai li’ur, para labele halo Timor-Leste nia imajen ne’e hanesan sai mau-pagador ba nasaun seluk.

“Ida ne’e mak ohin ezije para identifika, nune’e iha tempu badak ne’e bele taka dívida sira hotu”, dehan Somotxo.

Somotxo admite, iha audiénsia ne’e mós komisaun rekomenda buat barak tebes kona-ba defeza no seguransa, tanba MNEK hanesan odamatan ba buat hothotu.

“Ami nia rekomendasaun ne’e ba protokolu estadu, lei balu ne’ebé presiza halo, para bele dignifika ita nia diplomata sira”. eis Ministru Defeza ne’e subliña. (Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 409
  • Page views today : 504
  • Total visitors : 70,415
  • Total page view: 96,998

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur