Notísia foun


Timor Post (15/09/2020)—Bankada CNRT akuza Prezidente Repúblika, Francisco Guterres “Lú-Olo” mak autór ba impase polítiku hodi satan prosesu tomak konstrusaun estadu nian durante tinan tolu nia laran no halo Demokrasia hakiduk ba kotuk.

Iha abertura ba Terseira Sesaun Lejislativa husi V Lejislatura Parlamentu Nasionál, Vise Xefe Bankada CNRT, Deputadu Patrocínio Fernandes, hatete Bankada CNRT iha oportunidade atu bele hato’o diretamente ba Nai Prezidente Repúblika kona-ba preokupasaun ne’ebé dala barak ona hato’o husi meius komunikasaun oin-oin, maibé seidauk hetan esplikasaun direta husi Na’i Presidente Repúblika.
Tuir Patrocínio, Povu tomak no polítiku sira atu halo reflesaun kona-ba andamentu polítiku iha rai doben Timor-Leste, ne’ebé ho tempu Dr Lu Olo kaer ukun hanesan Prezidente Repúblika, mak rezulta ona impase polítika hodi satan prosesu tomak konstrusaun Estadu dentru tinan-tolu nia laran (2018-2020).

Bankada CNRT hakarak hahú deklarasaun polítika ida-nee ho preámbulu Konstituisaun Repúblika nian, ne’ebé hateten nune’e, “Konstituisaun ida-nee reprezenta, ikus liu, omenajen ida, povu fó ho laran tomak ba Pátria-nia martires sira hotu, ho neon metin duni katak iha nesesidade atu harii kultura demokrátika institusionál ida rasik Estadu de Direitu nian, iha ne’ebé ema sei respeitu Konstituisaun, lei no instituisaun ne’ebé povu rasik maka hili”.

Tanba nee, preámbulu Konstituisaun Repúblika ne’ebé Asembleia Konstituinte simu no fó sai, iha loron 22 Marsu 2002 hodi aprova no dekreta, hateten momoos katak Timor-Leste sai hanesan Estadu Direitu ne’ebé ema hotu tenke respeita no haktuir konstituisaun. Maibé pergunta boot ida ba hotu ne’ebé tuur iha Uma Fukun Parlamentu Nasionál ida-nee, sera ké ita sira nee kumpre duni Konstituisaun ka lae?
Patrocínio dehan, públiku tomak akompaña katak, iha loron 25 Juñu 2020 liubá, Presidente Repúblika, Francisco Guterres Lu Olo, fó pose ba Membrus VIII Governu. Governu ida ne’ebé atual Primeiru Ministru, Taur Matan Ruak, deklara ba públiku iha Janeiru 2020, katak, Presidente Repúblika rasik maka sobu tiha Governu nia roda ida, Primeiru-Ministru hasai kadeira no CNRT maka fakar minarai no sunu tiha karreta nee. Perguntas maka nee, oinsá maka karreta ida ne’ebé Presidente Repúblika sobu tiha nia roda, Primeiru-Ministru sobu nia kadeira, no CNRT sunu tiha ona, bele teki-teki karreta nee nia roda kompletu fali de’it?
“Bainhira ita liga analojia karreta ba iha Konstituisaun Repúblika, iha nee Primeiru-Ministru fó mensajen klara, katak, formasaun VIII Governu nee mai husi Aliansa Mudansa ba Progresu tuir Konstituisaun, artigu 106 (al.1), liuhosi nomeia Primeiru-Ministru ba VIII Governu nian. Maibé, Presidente Repúblika maka sobu tiha roda ida, tanba rekuza atu fó pose ba membrus governu sira, hodi kompleta formasaun governu nian, no ikus mai karreta nee labele la’o, too ahi han tiha de’it,” Patrocínio deklara.

Patrocínio hatete, iha loron 20 Janeiru 2020, Primeiru-Ministru Taur Matan Ruak deklara, katak Aliansa Mudansa ba Progresu mate no hakoi tiha ona, tanba-nee, Primeiru-Ministru rasik entrega situasaun impase polítika nee ba Presidente Repúblika atu rezolve. Atu responde ba situasaun ida-nee, Presidente Repúblika foti inisiativa, tuir Konstituisaun RDTL, Artigu 74, hodi konvoka reuniaun ho entidades hothotu husi kamada sosiedade Timor-Leste nian, inklui partidu polítiku sira ne’ebé iha asentu parlamentár, atu buka solusiona impase polítiku ida nee.

No Iha loron 5 Fevereiru 2020, Vise-Presidente Bankada Fretilín, Deputadu Francisco Miranda Branco, halo deklarasaun iha média, hodi ezije Primeiru-Ministru Taur Matan Ruak atu rezigna-an, ho razaun katak, AMP mate iha loron 17 Janeiru no hakoi ona iha loron 20 Janeiru 2020. Deputadu Francisco Branco nia deklarasaun ba média GMNTV dehan nune’e: “Tuir regra loloos, se AMP la-eziste ona, Primeiru-Ministru merese rezigna-an”. Deklarasaun ida-nee rasik hatudu katak Deputadu Branco konsiente duni, tuir Konstituisaun RDTL, artigu 106 (al.1), bainhira AMP ne’ebé forma Governu la eziste ona, signifika Governu mós hein demisaun deit.
Deputadu Bankada CNRT nee dehan, hafoin Proposta Orsamentu Estadu 2020 xumba iha Parlamentu Nasionál, CNRT konsege hamosu koligasaun foun ida ne’ebé harii hamutuk ho Partidu Demokrátiku, KHUNTO, Frente Mudansa/UDT, no PUDD, iha loron 22 Fevereiru 2020.

Koligasaun ida nee harii, bazeia ba instrusaun Presidente Repúblika ne’ebé husu ba partidus sira atu buka malu hodi bele forma fila fali Governu foun. Hafoin rona tiha katak iha ona Koligasaun Foun ida, ho kadeira 34 iha Parlamentu Nasionál, Primeiru-Ministru Taur Matan Ruak hatama kedas ninia pedidu demisaun ba iha Prezidente Repúblika, tuir Konstituisaun RDTL Artigu 112 (nú. 1 al.b), iha loron 24 Fevereiru 2020.

Aktu Primeiru-Ministru nian nee hatudu katak, Primeiru-Ministru konxiente ho regra Konstitusionál ne’ebé iha, katak, bainhira koligasaun foun ida mosu, signifika VIII Governu tenke termina ninia mandatu, atu loke dalan ba Governu foun, IX Governu Konstitusionál.

Maibé mosu ema estratéjiku no matenek, ne’ebé formadu iha Direitu husi Rai Boot ida iha Africa, fó orientasaun atu FRETILIN sai ai-tonka ba VIII Governu too 2023. Tanba nee, Na’i Prezidente Repúblika la dekreta pedidu demisaun husi PM TMR ne’ebé ikus Sr Taur Matan Ruak dada fila tanba sei hetan iha ai-tonka to’o 2023.
Ho estratéjia foun ida nee, maka ho ordem husi Nai PR, iha dia (19/5) mesa PN hetan asaltu husi deputadu balun ho apoiu forsa polisiál atu hadau maibé mesa nee baku fila no rahun.
Prátika inkonstitusionál sira ne’ebé Bankada CNRT deskreve, hatudu katak Timor-Leste nu’udar Estadu Direitu Demokrátiku marka pasu ba kotuk, tanba Konstituisaun RDTL hanesan matan dalan, ran, no klamar estadu nian lakon tiha ninia valor. Presidente Repúblika Dr. Francisco Guterres Lu Olo, ne’ebé mós de faktu kontinua assume kargu hanesan Presidente Partidu Fretilín, hili halo violasaun ba Konstituisaun RDTL tanba hakarak asegura inkluzaun Partidu Fretilín nian iha Governasaun.

“Povu Timor-Leste tomak sai sasin oinsá prosesu sira ne’ebé tuir korredór Konstituisaun nian nee, Presidente Repúblika no Presidente Partidu Fretilín Francisco Guterres Lu Olo “Estuda lai, Estuda lai, Estuda lai,” maibé prosesu sira ne’ebé sees husi Konstituisaun RDTL ne’e, Presidente Repúblika la estuda maibé aprova no dekreta lalais de’it”. Patrocínio admite.

Maibe hatán hatán ba deklarasaun hosi Bankada CNRT nian ne’e, Prezidente Repúblika (PR), Francisco Guterres “Lú-Olo” konsidera deklarasaun nee hanesan deklarasaun polítiku.

“Ha’u la hetan akuzasaun, nee polítika de’it, akuzasaun nee so iha Tribunal,” dehan Lú-Olo.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 715
  • Page views today : 860
  • Total visitors : 84,562
  • Total page view: 118,667

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur