Notísia foun


Timor Post (15/09/2020)-Prezidente Parlamentu Nasionál (PN), Aniceto Longuinhos Guterres Lopes, iha diskursu abertura sesaun lejizlativa datoluk V Lejizlatura hatete povu mak na’in ba demokrasia, povu mak soberania no podér polítiku nia hun.

“Liu husi demokrasia mak ita konstroi podér polítiku no hametin ita nia soberania. Liu husi demokrasia mak ita halo alternánsia ba ukun-na’in sira, iha organizasaun podér polítiku iha Timor-Leste”, Aniceto hato’o hosi diskursu abertura sesaun lejizlativa datoluk kinta lejizlatura iha Parlamentu Nasionál, Tersa (15/09).

Prezidente ne’e haktuir, hahú iha tinan 2017 Timor-Leste hasoru dezafiu boot lubuk ida kona ba governasaun Estadu nian, kona ba konsolidasaun no kontinuidade lideransa Estadu no kona ba relasionamentu institusionál.

Nia dehan, dezafiu hirak ne’e akontese iha prosesu implementasaun demokrasia iha Timor-Leste, liu husi instrumentus demokrasia rasik. Partidu polítiku mak instrumentu iha dinamizasaun demokrasia, no nu’udar instrumentu Estadu nian ba kontinuidade governasaun no lideransa Estadu.

“Iha dezafiu hirak ne’e nia laran, iha 2017, mak ha’u assume responsabilidade nu’udar Prezidente Parlamentu Nasionál IV Legislatura ba tempu badak. No sei iha dezafiu hirak ne’e, mak ha’u assumes fila fali responsabilidade nu’udar Prezidente Parlamentu Nasionál iha V Legislatura nia klaran. Dala ida tan, motivadu ho korajen no propózitu ne’ebé di’ak ba Estadu tomak, no hodi kontribui ba supera no buka solusaun ba dezafiu hirak ne’e hotu, mak ha’u assume fila fali responsabilidade nu’udar Prezidente ba Órgaun Soberania ida ne e”, dehan Aniceto.

Prezidente Órgaun Lejisltiva dehan, povu nia vontade polítika no kualidade komunikasaun entre lideres partidu polítiku mak forma konjuntura polítika iha Parlamentu Nasionál no iha governu, faktu hatudu katak husi tinan 2007 too 2018, laiha eleisaun parlamentár ida ne’ebé rezulta partidu polítiku ida mesak atinji maioria absoluta.

Realidade ida ne’e marka konjuntura polítika únika ida iha parlamentu, no iha governu durante jornada konstrusaun estadu no governasaun iha Timor-Leste, tinan 20 nia laran, Parlamentu, ho opozisaun parlamentár no ho insidénsia parlamentár, iha governu ho maioria absoluta, iha governu koligasaun maioria, iha governu ho insidénsia governativa no iha governu ho koligasaun minoria.

Situasaun hirak ne’e hatudu katak sosiedade Timor-Leste halo hela teste no kontesta rasik nia vontade no opsaun polítika, no dirije mensajen importante ida ba lideres partidu polítiku, figuras eminente no ba jerasaun kontinuadora sira, katak komunikasaun nu’udar elementu esensiál iha nivel no kategoria hotu-hotu, hodi asegura kontinuidade lideransa Estadu no governasaun ne’ebé sustentavel no solidu.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,082
  • Page views today : 1,295
  • Total visitors : 37,949
  • Total page view: 52,272

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur