Notísia foun


Timor Post (13/09/2020)-Prezidente Parlamentu Nasionál (PN), Aniceto Guterres, haktuir katak nia aprende polítika hosi saudozu Lucas Rama Metan.

Iha serimónia inaugura estátua saudozu reitór UNPAZ Dr. Proof. Lucas da Costa “Rama Metan” iha kampus UNPAZ Aniceto hatete nia koñese matebian ne’e foin tama ba iha ida joven.

“Ha’u koñese Prof. Dr. Lucas da Costa “Rama Metan” iha momentu ha’u foin tama ba halo tinan 18, sei joven hela bainhira bá hala’o estuda iha Bali Indonézia saudozu mak simu ami iha Aero Portu Bali”, Aniceto haktuir iha nia diskursu iha Serimónia inaugurasaun ba estátua saudozu, Sábadu (13/09).

Prezidente Parlamentu haktuir primeiru vés delegasaun estudante Timor oan sai ba eskola iha rai li’ur, barak kedas iha governadór Indonézia enjeñeiru Mario Viegas Carrascalão nia tempu hamutuk ema na’in 36 sai iha loron ida.

“Bainhira ami na’in-36 ne’e to’o iha Bali, ema na’in rua de’it Timor oan iha ne’ebá, maka maun Lucas ho Madre Mena agora nia iha Oekusi, sira simu ami iha aero portu Bali. Hahú kedas iha ne’ebá ami hamutuk kedas hanesan estudante. Ho hamutuk ida ne’e bele aprende buat barak, primeiru aprende polítika, segundu aprende hosi saudozu Lucas atu hadomi povu Timor, ha’u aprende mós sai hanesan ema Timor, aprende hadomi Timor, ha’u aprende hosi nia, aprende hadomi povu Timor to’o ikus no ohin ha’u bele hatete Prof. Dr. Lucas ninia kontribuisaun forma ha’u hanesan Aniceto Guterres ida ohin ne’e”, haktuir Aniceto ho laran susar.

Lider másimu iha uma fukun parlamentu nasionál ne’e rekoñese to’o ohin loron ne’e sei deve hela kontribuisaun ne’ebé fó hosi matebian saudozu Dr. Proof Lucas.

“Sente ha’u sei deve hela Dr. Lucas parese la’ós ha’u de’it, maibé hosi ha’u nia esperiénsia ne’e rasik ha’u bele dehan katak saudozu Dr. Lucas ne’e ema inspiradór, motivator, edukadór no formadór,” nia hatutan.

Aniceto mós sente laran moras bainhira saudozu sei baixa iha ospitál nia la konsege hasoru tanba la autoriza hosu autoridade iha ospitál.

“Ha’u sente deve tanba momentu saudozu sei baixa iha ospitál nasionál bainhira kompaineru Saki mak telefone ha’u katak agora daudaun katuas Lucas baixa iha ospitál, ha’u husu nia situasaun nusa Saki hatán nia agora grave, iha momentu ne’ebá ha’u sente hanesan buat ruma ladi’ak, como iha loron 3 fulan Fevereiru ha’u atu halo viajen ba iha Macao ne’ebé iha loron 2 fulan Fevereiru lokraik ne’e ha’u buka tempu ba iha ospitál so atu hasoru de’it, ha’u nia filing ne’e pelu menus hakarak haree ho matan maski nia la ko’alia, mas ha’u to’o ospitál doutór ne’ebé trata nia ho razaun oi-oin la fó fatin ba ha’u atu bele tama ba haree. Bainhira ha’u to’o iha Macao liu loron rua ka tolu hanesan ne’e rona fali dehan Dr. Lucas hakotu ona is. Ho nia mate ne’e sai hanesan rekursu ida ba ha’u” Aniceto sente arrepende.

Entretantu estátua hosi matebian, reitór UNPAZ, membru Fundadór Partidu PD, deputadu Professor Doutór Lucas Rama metan, hetan bensan direta hosi Arsebispu Metropolitana no Bispu Dioseze Dili Dom Virgílio Guterres da Silva, no partisipa hosi Ministru Asuntu Veteranu Julio Sarmento Meta Malik, militante Partidu Demokrátiku, Dosente no Estudante UNPAZ no Família.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,029
  • Page views today : 1,461
  • Total visitors : 80,281
  • Total page view: 112,542

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur