Notísia foun


Timor Post (09/09/2020)-Reprezentante Povu iha Uma Fukun Parlamentu Nasionál (PN) hein fó votus konfirmasaun ba projetu lei protesaun civil ne’ebé prezidente da Repúblika Francisco Guterres Lu-Olo veta iha 1 Setembru 2020.

Antes ne’e votasaun ba aprovasaun relatóriu pareser kona-ba lei protesaun sivíl ho unanimidade ho votu afavor 40, abstensaun 17 no kontra 0.

Prezidente Komisaun B, trata Asuntu Negosíu Estranjeiru no seguransa, José Agostinho Siqueira ‘Somotxo’ informa ba jornalista sira iha parlamentu nasional iha kuarta (09/09), lei protesaun sivíl ne’ebé veta haruka fali ba ona iha parlamentu nasionál atu hadi’a liu husi dalan rua, ida mak hadi’a lei ne’ebé prezidente rekomenda mai no ida seluk mak parlamentu nasionál halo votu konfirmasaun depois haruka fali ba prezidente repúblika.

Maibé eis Gerrilleiru ne’e dehan atu halo votu konfirmasaun ne’e depende ba deputadu sira tanba agora sei iha faze resesu. Tuir nia katak agora komisaun permanente bele aprova maibé hanesan atu halo votu konfirmasaun ne’e tenke deputadu maioria.

Prezidente Komisaun trata ba Asuntu Defeza no Seguransa ne’e dehan, Lei protesaun Sivíl ne’e la’ós foin mosu, maibé lei refere sai ona ezbosu dezde 2010 durante tempu naruk no to’o 2020 foin aprova iha parlamentu nasionál.

Maibe, lei ne’e Prezidente veta razaun tanba bazeia ba artigu 24-25 konstituisaun RDTL, lei protesaun sivíl nian ne’e iha situasaun tolu hanesan situasaun de alerta, situasaun emerjénsia, no situasaun de kalamidade públiku, maibé lei protesaun sivíl ne’e labele foti hanesan artigu 24-25 K-RDTL, tanba ne’e suspende ema nia direitu no liberdade, só deklara iha estadu emerjénsia.

Nia hatutan iha lei protesaun sivíl ne’e restrinje ema nia direitu liberdade signifika katak la suspende direitu no liberdade ema nian maibé restrinje de’it direitu no liberdade balun.

Enkauntu daudaun ne’e lei protesaun sivíl iha ona parlamentu nasionál no kopia ona hodi fahe ba deputadu hotu halo estuda hodi fó fali votu konfirmasaun no haruka fali ba Prezidente atu aprova.

Entertantu proposta de lei númeru 16/V, protesaun sivíl ne’e hamutuk artigu 57 hahú husi objetivu entrada em vigor, parlamentu nasionál aprova ona iha loron 21/07/2020.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 8
  • Page views today : 8
  • Total visitors : 37,980
  • Total page view: 52,309

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur