Notísia foun


Timor Post (07/09/2020—Deskonfia Parlamentu Nasionál (PN) halo pagamentu diskrimantivu hasoru lia nain inklui inan feton sira ne’ebé mak baku baba dook no tebedai iha serimónia ritual hatuur hikas meza prezidénsia Parlamentu Nasionál.

Tanba ne’e, iha loron segunda (07/09) dadeer, lian Nain no inan feton balun lori fali osan ne’ebé mak sira simu mai iha Parlamentu Nasionál atu entrega fali, tanba sira sente diskirmativu. Maibé hafoin hetan tiha esplikasaun hosi funsionáriu balu iha PN, parte sira simu fali osan ne’e.

Entretantu tuir informasaun ne’ebé jornalista sira hetan hosi lia nain no inan feton balun, ne’ebé mak lakohi sita naran, hatete katak lia Nain sira ne’ebé mak mai hosi munisípiu sira dook hetan osan $ 200 dolar, maibé sira ne’ebé mak iha Dili hetan deit $60 dolar. No lian sira ne’ebé hosi munisípiu toba iha otél no sira ne’ebé mak iha Dili toba iha uma no hasai osan rasik hodi selu karreta para mai partisipa iha serimónia ritual refere.

“Ami nain hira nee simu $60 dolar de’it, sira ne’ebé mak mai hosi rai dook nee simu $200 dolar. Tuir loos tenke simu hanesan, labele balu liu balu lae. Maibé la buat ida, ita boot sira bolu ami mai, ami la kumpre fali mós la di’ak”, Informa lia Nain ne’e.

Entretantu, iha loron hanesan, lian Nain hosi Karketu Motain, Pio de Ataide, hatama karta ba prezidente Parlamentu Nasionál inklui Bankada sira hotu, tanba konsidera serimónia ritual ne’e lao la tuir ninia fukun no la konsidera uma ho ahi husi Dili nian.

“Hanesan lia-nain Dili lamentavel tebes ho lala’ok iha 04 Setembru ami la hola prezensa, tanba saida mak Sekretáriu Estadu Arte Kultura la konvida ami. Ami sala saida, nee la’ós senor Eugénio nia serimónia uma been, ida nee ita hothotu nia uma, tanba nee iha hotu iha diretu atu partisipa”, Lamenta Pio ba jornalista sira iha PN.

Pio dehan, prosesu serimónia hatuur hikas meza foun Prezidénsia Parlamentu Nasionál ne’e seidauk loos. Tanba nai ulun sira seidauk fó lima ba malu.

“Se nain uluk sira seidauk loos, nusa mak ita tenke hatuur uluk meza. Iha uma laran seidauk rezolve, ita tau tiha meza ona. Meza ne’e laós ita boot nia meza, maibé meza nee povu nian”, Pio afirma.

Pio konsidera serimónia ritual ne’e la loos no ba oin sei iha impaktu, tanba ne’e natureza mak hatene.

“Impaktu sempre iha, ne’e natureza mak hatene, tanba oi-tuan nee uluk lulik boot, keta halimar”, Pio relata.

Pio hatete, hanesa uma nain sente diskriminadu, tanba uma nain sai bainaka ba ninia uma rasik. No situasaun ida ne’e hatudu imajen ladún diak.

“Hanesan lia-nain sente fuan kanek tebetebes”. Lia-nain Karketu Motain nee lamenta.

Entretantu to notísia ne’e tun Parlamentu Nasionál (PN) seidauk hola pozisaun ruma.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 9 
  • Visitors today : 1,108
  • Page views today : 1,585
  • Total visitors : 32,318
  • Total page view: 44,443

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur