Notísia foun


Timor Post (2/09/2020)-Akademista hosi Universidade Nasionál Timor Lorosa’e (UNTL), Julio Aparício, sujere ba Bankada CNRT katak bainhira Parlamentu Nasionál atu hatuur hikas meza foun ne’e tenke partisipa hotu tanba meza ne’e lulik, no meza ida ne’e la’ós ba partidu ida ne’ebé maioria.

 “CNRT deklara ona katak sira lakohi partisipa bainhira parlamentu atu hatuur hikas meza foun ne’e sira nia direitu, maibé sira mós iha responsabilidade katak meza ida ne’ebá la’ós ba Partidu ida maioria, tan ne’e nu’udar akademista husu de’it maski sira la gosta ka la satisfás ho desizaun sira maioria foti maibé labele la gosta meza ne’e atu hatuur fila fali,” hatete Aparício ba Timor Post iha nia knar fatin Kampus UNTL Kaikoli Dili, Kuarta (02/09).

Nia mós hatutan CNRT labele uza sentimentu pesoál, labele hanoin tanba grupu ka Partidu tolu Partidu manan ne’e, maibé tenke hanoin ba futuru, hanoin ba povu Timor-Leste.

Meza ida agora atu hatuur ne’e la’ós deputadu ida agora maioria iha parlamentu ne’ebé hadau tiha hosi CNRT ne’e la’ós ida ne’e ninian maibé ida ne’e ba povu hotu.

Tan ne’e mak kuandu CNRT sai hosi serimónia hatuur meza ne’e signifika sira nia espíritu nasionalizmu laiha, sentidu estadu laiha.

“La buat ida tau fali ba se mak hori bainhira baku fila meza ne’e, CNRT mós hamutuk mak baku fila meza ne’e, sira hotu hamutuk mak baku fila, tanba sira hotu nia hahalok, sira nia sentimentu  sira nia espíritu nasionalizmu mínimu sira hotu hamutuk mak baku fila agora atu hatuur fali sira lakohi partisipa hanoin ne’e ladi’ak,” akresenta dosente.

 Antes Vise Xefe Bankada Partidu CNRT deputadu Patrocínio Fernandes hatete ona CNRT sei la partisipa hatur hikas meja PN

“CNRT nia pozisaun la partisipa iha prosesu ne’e tanba meza baku fila problema konstituisaun no ema tenta atu hetan podér ne’ebé la liu hosi dalan konstituisaun, la liu hosi dalan lei sira ne’ebé vigora iha rai ida ne’e,” afirma iha entrevista ho Jornalista iha PN, Tersa (01/09).

Entretantu meza lulik parlamentu nasionál ne’ebé harii hosi ruin ho ran povu sira nian baku fila iha loron 18-19 fulan Maiu tanba situasaun polítiku ne’ebé akontese iha rai laran.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,327
  • Page views today : 1,880
  • Total visitors : 69,891
  • Total page view: 96,278

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur