Notísia foun


Timor Post (27/08/2020)—Líder Nasionál Kayrala Xanana Gusmão sei lidera movimentu síviku ida ne’ebé involve ferik-katuas sira hodi hato’o ezijénsia ba estadu atu fó resposta iha tempu badak.

Iha Misaun COVID ne’ebé Xanana inisia haleu Timor laran, to’o iha Oekusi Xanana orienta ona autoridade lokál sira atu rekolla dadus ferik-katuas sira nian liuliu ba sira ne’ebé seidauk hetan direitu ba subsídiu idozus no veteranu sira nian.

Xanana subliña, movimentu ida ne’e la’ós ho intensaun polítiku, maibé haree ba realidade ferik-katuas sira barak maka durante luta ba libertasaun nasional terus hamutuk maibé to’o agora seidauk goja sira nia moris ho apoiu estadu nian.

Xanana defende katak, ferik-katuas sira maka eroi ba nasaun ida ne’e tanba terus durante okupasaun. Tanba ne’e, nia hatutan, tempu too ona atu estadu iha responsabilidade tomak atu buka tuir ferik-katuas sira atu hotu-hotu iha direitu ba moris hanesan.

Líder karismátiku ne’e subliña, luta ba libertasaun nasionál, Timor Leste iha forsa rasik ho kilat hanaran Forsa Armada Libertasaun Nasionál Timor Leste (FALINTIL), maibé to’o konsege duni inimigu sai husi rai laran ne’e povu liuliu ferik-katuas sira iha tinan 1999 termina iha referendum.

“Ita rekoñese ezisténsia FALINTIL nian, maibé ita mós tenke rekoñese katak, duni inimigu sai husi ita nia rain, ne’e liuhusi pregu,” Xanana hatete bainhira halo intervensaun iha sensebilizasaun kona-ba moras COVID iha Suku Quina ho Lalesu, Sub-Rejiaun Pante Makasar, Ambeno Oekusi.

Entretantu, durante hala’o Misaun COVID haleu Timor, Xanana fó atensaun maka’as ba ferik-katuas no foinsa’e sira atu kuidadu ho moras daet COVID tanba moras ne’e ameasa tebes iha mundu no konsege daet no hamate ona ema rihun ba rihun iha mundu.

Timor Leste, Xanana dehan, timoroan sira hotu tenke kuidadu liuliu iha fronteira sira tanba moras ne’e importadu. Nune’e, nia dehan, Oekusi konsideradu hanesan  odamatan boot tenke fó atensaun maka’as atu moras ne’e labele tama.

Nia salienta, Oekusi oan sira tenke afirma katak moras ne’e sei la tama iha Timor. Ne’e tenke ho asaun konkretu maka tenke kumpri regra sira ne’ebé estadu fó sai ona kona-ba saúde públiku nian, no labele halo movmentu ilegál sira. (cao)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,636
  • Page views today : 2,398
  • Total visitors : 83,609
  • Total page view: 117,441

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur