Notísia foun


Timor Post (20/08/2020)-Prezidente Repúblika Francisco Guterres “Lú-Olo” hateten, tempu to’o ona atu prezerva istória tanba ho istória loloos de’it mak Timor-Leste nia jerasaun tuir mai sei iha orgullu atu konta no hakerek Glorioza FALINTIL ho LETRA OSAN MEAN
Iha diskursu loron FALINTIL ba dala 45 (20/08), iha Kuartél Jenerál F-FDTL Fatuhada-Dili, Xefe Estadu husu ba Governu, kombatente, organizasaun rezisténsia no ema hotu atu fó apoiu ba ekipa ka organizasaun sira hanesan Komité Orientadór 25, Komisaun Peskiza no Elaborasaun Istória Luta Feto Timor, Sentru Audiovisual Max Stahl, Sentru Nasionál – CHEGA, Arkivu no Muzeu Rezisténsia no organizasaun seluk tan, atu halibur dadus rejista no hakerek daudaun istória.

“Istória ne’ebé tuir faktu mak sei fó valor loloos ba sakrifísiu tomak hosi Ass-wain sira ba Pátria, ida ne’ebé sei hamoris Patriotizmu no Nasionalizmu ba jerasaun sira tuir mai hametin valores solidariedade, espíritu sakrifísiu, kriativu no fó-an tomak ba Povu no Nasaun” hatete eis Prezidente Parlamentu Nasionál.

Xefe Estadu, subliña ho istória loloos de’it mak Timor-Leste nia jerasaun tuir mai sei iha orgullu atu konta no hakerek nafatin kona-ba Glorioza FALINTIL ho LETRA OSAN MEAN.

Eis Gerrilleiru husu ba juventude sira atu labele baruk hodi aprende no banati tuir saída mak Aswain FALINTIL sira hatudu iha tinan rua nulu resin haat nia laran.
“FALINTIL sira sakrifika sira-nia an total ba Pátria no agora, joven sira, imi-nia tempu atu kontinua hatutan ho estuda maka’as, badinas no ajuda malu hodi dezenvolve rai doben Timor-Leste. Tanba imi joven sira mak sei sai Asswain foun ba dezenvolvimentu nian” hakotu Ulu-Olo.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 866
  • Page views today : 1,315
  • Total visitors : 73,798
  • Total page view: 102,573

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur