Notísia foun


Timor Post (16/08/2020)— “Ha’u ko’alia bele loos, maibé ba parlamentu sira hi’it liman bele liu, tanba nee mak dehan demokrasia nee maioria sobre minoria. O bele ko’alia di’ak, mais kuandu votasaun o lakon ona. Ezemplu hanesan ami kampaña, ami ko’alia furak mós povu la hili, ami labele ba obriga povu no labele bosok povu hodi hili ami,” Avelino Coelho.

Jurista timoroan, Avelino Coelho subliña kestaun ne’e relasiona ho governu daualu liuhusi Ministériu Justisa (MJ) hamosu esbosu lei kriminaliza difamasaun

Tuir Avelino, governu la devia kriminaliza difamasaun maibé husik nafatin de’it iha kódigu sivíl.

“Husik iha kódigu sivíl, tanba kódigu sivíl sidadaun ho sidadaun mak lori malu ba Tribunal, kuandu o kriminaliza, estadu tula liman. Sidadaun dala ruma enfrakesidu, tanba nee mak labele kriminaliza, para bele fó espasu ba ema barak ko’alia. Portantu la presiza kriminaliza difamasaun”, afirma  jurista  ba jornalista sira iha kampus FASPOL-UNTL, Kaikoli, sesta (14/08).

Eis Sekretáriu Estadu Presidencia Konsellu Ministru, nia parte ko’alia dala barak ona kona-ba asuntu nee, maibé konforme desizaun iha parlamentu nasionál.

Parte seluk nia dehan, lei nee la’ós permanente, maibé bainhira governu ida sa’e bele muda fali tuir ninia prinsípiu polítiku.

“Ba parlamentu maioria mak manda,  maibé la’ós katak labele muda, tinan lima mai, partidu seluk manan fali, bele muda fila fali, tanba lei nee la’ós permanente, lei ne’e polítika ida mak transforma ba lei. Aban bainrua ha’u manan fali, ha’u muda, tanba la tuir ha’u nia prinsípiu polítiku,” Coelho sublina.

Entretantu,  foin daudaun nee,  bainhira jornalista sira husu Ministru  Justisa (MJ) Manuel Cárceres,  , kinta (13/08),  Governante ne’e hatán katak, husik tempu maka sei ko’alia.

“To’o nia tempu mak ita ko’alia, obrigadu”, dehan Cárceres foin lalais, hafoin remata enkontru  ho Prezidente Parlamentu Nasionál (PPN), kinta (13/08).

Hafoin FRETILIN viabiliza PLP no KHUNTO iha VIII Governu, ezbosu kriminaliza difamasaun ho ezbosu seluk tan sai pakote prioridade Ministériu Justisa nian atu aprezenta iha Konsellu Ministru.

Ezbosu lei refere ne’e  aumenta iha Kódigu Penal (KP)  Artigu 187-A, 187-B, 187-D, 187-E, no 187-F  ho objetivu kriminaliza difamasaun injuria ho pena prizaun tinan 1 to’o 3.(Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,637
  • Page views today : 2,702
  • Total visitors : 71,643
  • Total page view: 99,196

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur