Notísia foun


Timor Post (16/08/2020)—Partidu mak nu’udar organizasaun polítiku ne’ebé bele hahoris lideransa jerasaun foun sira, tanba ne’e estudante universitáriu sira labele foku de’it ba teoria maibé tenke involve-an iha partidu polítiku hodi fó kontribuisaun ba dezenvolvimentu nasaun.

Jurista no polítiku, Avelino Coelho subliña kestaun ne’e bainhira sai orador iha semináriu ne’ebé organiza husi estudante sira iha FASPOL-Universidade Nacional Timor Lorosa’e (UNTL), iha Kaikoli, Dili, Sesta (14/08/2020).

Tuir Avelino, atu sai lideransa polítika la mai husi universidade, maibé mai husi organizasaun polítika.

“Ha’u prefere estudante sira ne’ebé mak akademikamente preparadu tama iha partidu para prepara nova jerasaun no nova lideransa. Tanba lideransa la mai husi universidade, universidade produs ema intelektuál no ema akadémiku,” Avelino subliña ba Jornalista sira hafoin halo intervensaun.

Nia dehan, iha prosesu luta ba libertasaun nasionál, estudante sira maka harii movimentu bar-barak hodi defende-an husi inimigu sira no halo polítika tanba ne’e estudante nivel universitáriu sira tenke halo polítiku.

“Ami mós uluk estudante, ami hili dalan anti integrasaun, ami halo polítika, ami hari movimentu libertasaun.  Imi agora iha nivel universidade, imi tenke halo diskusaun akadémiku, imi tenke ko’alia ba estadu dehan ida nee la lós. Nee mak dehan halo polítika iha kestaun akadémika no vida intelektuál. Estudante presiza ko’alia modelu edukasaun halo nusa, mak imi sente dehan di’ak ba imi. Nee halo atividade polítika ne’ebé mak defende interese polítiku sidadaun,” Avelino afirma.

Nia hatutan, joven tenke ko’alia polítika, tanba joven sira mak pillar atu transforma sosiedade, polítiku no ekonómiku.

“Ha’u dehan, joven tenke ko’alia polítika, joven labele lakohi ko’alia polítika. Importante mak labele tuku malu, baku malu no hirus malu. Ida nee mak fundamental,” Avelino subliña. (Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 442
  • Page views today : 544
  • Total visitors : 70,448
  • Total page view: 97,038

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur