Notísia foun


Subsidiu $200 ba agregadu familiar maihusi orsamentu Estadu tokon/milliaun US$250

Obrigado barak ba sujestaun/rekomendasaun no kritika sira, tanba ida-ne’e bele ajuda CAC hodi servisu no atua diak liután iha future, nune’e bele hatan ba preukupasaun no espetativa publiku.

Ha’u hakerek nota simples ida-ne’e atu klarifika preukupasaun, lamentasaun no kritika publiku kona-ba atuasaun CAC relasiona ho subsidiu $200 ba agregadu familiar ho referensia ba lei no prosedimentu sira ne’ebé regula kona-ba fundu Covid-19 iha ambitu prevensaun ba pandemia Covid 19 nian.

Maibé antes ida-ne’e, primeiru ita presiza kumpriende katak CAC iha misaun prinsipal rua; ida iha materia prevensaun, no ida seluk material servisu investigasaun kriminal (Artigu 4 Lei Nú.8/2009 kona-ba Kriasaun CAC). Intervensaun ida foin-lalais relasiona ho subsidiu agregadu familiar ne’e, nu’udar parte-ida husi papel/misaun prevensaun CAC nian.

Husi intervesaun ne’e CAC no ekipa konjunta sira konsege trava orsamentu U$385.400.00 husi total benefisiáriu 1927 ne’ebé la elejível. CAC no ekipa konjuta mós konsege identifika benefisiáriu 148 maibé sira “terlanjur” simu liutiha ona osan/subsidiu ne’e mesmu sira la elejível. Númeru ida-ne’e reprezenta deit husi suku 141 ne’ebé ekipa CAC intervein husi total suku 452 iha nivel nasional. Ida-ne’e ita bele “menduga” katak provavelmente sei iha iregularidades potensial boot liu-ne’e. Atividade ida-ne’e halo deit iha loron 4-5 lima nian laran, la’os durante loron 14 hanesan públiku espekula no kestiona.

Tuir relatoriu provizoriu husi MSSI hatudu katak total benefisiáriu ne’ebé asesu ba subsidiu agregadu familiar ne’e hamutuk 299.808, nune’e 299.808 x 200 = millaun $59.961.600. Enkuantu dadus reklamente atinze 14.175 tuir relatoriu aprezentasaun governu ba PN, iha 28 Jullu 2020-semana sira liuba kotuk.

Dadus benefisiáriu 299.808 ne’e la’os kompletamente loos, tanba iha ezemplu kazu balun atu prova katak dadus ne’e dook husi loos. Purzemplu iha suku balun tuir sensu agrikula iha tinan 2019; dadus total uma-kain maisumenus atus-sia resin (900 resin), maibé iha tinan 2020 númeru ne’e sae ba rihun-haat resin (4.000 resin). Ne’e ezemplu ida esesional liu husi ezemplu sira no kazu potensial seluk ne’ebé akontese iha suku sira seluk.

Tanba ne’e avaliasaun no observasaun sira ba asuntu ne’ebé sensitivu no kontravesial hanesan ne’e, la bele hare no foka deit ba valor $100 ka $200 ne’e, maibé tenke hare iha/husi aspeito no ponto-de-vista ida integradu no abranje ba akumulasaun kumulativu husi kazu ida ho kazu sira seluk no nia implikasaun prejuízu finansial ne’ebé estadu sofre tanba situasaun sira ne’e.

Ha’u kumpriende katak ita boot sira manifesta solidaridade ida forte no klean ho povu ida-ne’e, maibé tenke koloka preukupasaun no solidaridade ne’e tuir nia-dalan, fatin no liuliu tuir lei. Ida-ne’e mais importante atu ajuda ita nia povu no sosiedade kumpriende, no simu mensajem no informasaun ne’ebé loloos no kredivel, la’os halo-fali konfuzaun no halo sosiedade sai síniku ba atuasaun no intervensaun sira ne’ebé CAC partisipa. Satan, ita boot sira ne’ebé halo estetmentu no postigan ne’e balun nu’udar figura hirak ne’ebé iha influensia iha sosiedade, tanba ita boot sira ninia personalidade, ativismu ka tanba ita-boot sira ninia formasaun akadémiku. Ida-ne’e bele forma sosiedade ninia hanoin no konviksaun katak saida mak CAC halo ne’e laloos. Pior liu tan komentariu espekulativu hirak-ne’e bele dirije ba interpretasaun públiku hodi konsidera no kompriende katak CAC la pro-povu. Ate pelo-kontrariu, CAC sai-fali adversáriu ba povu. Ita bele deit kritika maibé kritika hirak-ne’e tenke proporsionál (justa) no kredibel.

Fontes fundu Covid-19
Hanesan ita hotu akompaña orsamentu ba benefisiáriu sira agregadu familiar ne’e mai husi orsamentu estadu ne’ebé define iha artigu 2 no artigu 3 (1), letra (a) husi Lei Nú. 2/2020 kona-ba autorizasaun ba transferénsia estraordinária ba fundu petrolifero (minarai), ho totál tokon/miliaun US$250. Husi totál miliaun (US$ 250) ne’e, miliaun US$150 aloka ba finansia dezpeza sira kona-ba medidas ba prevensaun no kombate surtu Covid-19.

Aleinde ida-ne’e, atu ezekuta fundu Covid-19 ne’e, Artigu 5 (7) lei referidu, define katak sei regula liuhusi regulamentu governu. Tanba ne’e Governu introdus Dekretu Lei (DL), Nú. 12/2020 kona-ba Fundu Covid-19. Mesmu artigu 2 (1) dehan katak fundu Covid 19 ne’e ho natureza autónomo, maibé ninia ezekusaun nafatin tenke tuir regra no prosedimentu sira kona-ba rejime judiriku aprovizionamentu (artigu 5 DL, Nú. 12/2020) plus padraun prosedimentu operasional fundu Covid-19 (nú. 5 alinea 1) ne’ebé estabele husi Sekretariadu Tekniku Konsellu Jestaun Fundu Covid-19. Tanba ne’e, mesmu iha sirkunstánsia no ambitu estadu emerjensia nia laran, maibé politika despeza relevante sira ba ezekusaun orsamentu Covid-19 ne’e la eskapa/livre husi kontrolu no atuasaun CAC ka instituisaun relevante no sosiedade sivil iha ambitu prevensaun nian. Nune’e mós, antes prosesu pagamentu hahú, CAC simu keisa no lamentasun husi komunidade katak iha pratika no iregularidade barak ne’ebé envolve autoridade lokal sira, hahú husi kobransa ilegal antesipada, falsifikasaun dadus uma-kain no familiarizmu. Se nune’e, ita boot sira, hakarak CAC tuur hateke deit?

Liutan DL nú.15/202 kona-ba apoiu monetariu ba agregadu familiar iha artigu 2 (1) no (2) define tiha ona sese mak nu’udar benefisiáriu ba subdisiu ne’e. Benefisiáriu sira ne’emak membru sosiedade sira-ne’ebé forma ona uma-kain no sira ne’ebé nia-salariu mensal laliu husi $500. Maibé dala ida tan, defacto, aliende potensia sira iha leten, iha mós lista sira ne’ebé inklui funsionariu publiku ho salariu mais $500 ne’ebé naran/lista mosu iha kuaze iha fatin hotu no ate sira ne’e barak mak ba simu nafatin maske lei espresamente (ho klaru) bandu katak la bele! Se ida-ne’e akontese ita tolera ho pratika hirak ne’e? Depoisde ita hotu hakilar tenke kombate korrupsaun maibê ita permite pratika hirak-ne’e eziste iha ita ninia sosiedade.

Justifikasaun falsa – tekniku rasionalizasaun
Ita ninia sosiedade toman/abituadu ho espresaun sira ho sentidu permisivu no tolerante. Katak ita permite, tolera no aseita ita nia sosiedade/komunidade ka iha kazu ne’e (joven sira) hodi pratika buat ne’ebé tuir loloos labele tanba kontra lei. Ita toman ho espresaun popular sira katak ema boot sira naok osan milliaun ba milliaun diak hela, nusa mak CAC la kaer took ema hirak ne’e, maibé CAC tebe-rai loos ho kazu/povu kiik sira ho osan $200 oan-ne’e. Iha tan espresaun sira seluk ne’e fó-fatin atu justifika katak ida-ne’e aseitavel tanba ema boot sira naok boot liu ida-ne’e. Espresaun no maneira pensamentu hanesan ne’emak ita nia eis Komisariu CAC dahuluk (maun) Aderito Soares iha nia diskursu ida ba ajente publiku sira iha tinan 10 liuba kotuk hanaran justifikasaun falsa (pembenaran palsu). Tanba ita aranja argumentu no razaun atu rasionaliza no justifika ita nia hanoin/pensamentu ba pratika ne’ebé laloos (ka la saudavel) iha sosiedade. Se ida-ne’e ita permite no tolera, luta ba kombate korrupsaun sei dook maske iha tempu besik, ita sei iha lei foun kona-ba Medidas Preventivas no Kombate Korrupsaun bainhira Prezidente promulga no tama iha-vigor.
Ha’u preukupadu liu mak espresaun sira ne’e, mai husi elementu sosiedade sira ne’ebé tuir loos atu ajuda ita nia sosiedade sai/livre husi cara pandang/perspetiva kontra-produtivu ne’e. Ha’u tauk liutan sira ninia espresaun ne’ebé bele forma sosiedade nia hanoin no konviksaun katak saida mak CAC halo liuhusi intervensaun hodi akompaña no trava benefisiáriu ne’ebé la priense kriteria ne’e laloos ka CAC pudia tuur hodi hare deit maske lei la permite. Kultura permisivu no tolerante sira hanesan ne’e, tuir loloos la bele eziste, se ita ambisiozu atu kombate duni korrupsaun iha Timor. Lei mós la limita krime korrupsaun ho valor prejuízo finanseriu (osan) hirak mak CAC tenke atua no hirak mak la atua/interven.

Nasaun sira susesu iha istoria kombate korrupsaun ne’e sira fó enfazé no porsaun boot liu ba servisu prenvesaun duke atuasaun represivu mesmu katak atuasaun represivu nu’udar forma ida atu halo ema reseiu (tauk) atu halo korrupsaun.

Kompetensia CAC
Ita mós presiza buka hatene didiak knaar/kompetensia instituisaun sira antes halo esteitementu/deklarasaun ne’ebé sujeitivu no espekulativu.
Iha lei define ona CAC nia kompetensia too iha ne’ebé no oinsamak CAC la bele atua liu husi kbiit ne’ebé lei atrbui – Buat ne’ebé tenke klaru mak CAC la hanesan ho KPK Indonesia ka CAC sira iha rai seluk. CAC ninia kompetensia limite deit iha buat rua iha leten (prevensaun no investigasaun). Iha ambitu investigasaun – CAC simu delegasaun no orientaun husi Ministeriu Publiku nu’udar nain ba asaun penal. Bainhira CAC investiga no submite ona autus/prosesu sira ba MP no lori ona ba julgamentu CAC ninia-knaar too deit iha ne’e ona. CAC sei la ba tan! Tanba lei limita ona.

Kazu sira ne’ebé ita boot sira temi ka refere ne’e, nia prosesu lao hela ona iha tribunal, atu lori fila ka ba kaer sira ne’e, la’os ona kompetensia CAC nian maibé instituisaun seluk no ho nia prosedimentu proprio.

Tanba ne’e, ami apresia kritika sira hotu no kritika ba CAC la’os deit importante, maibé imprativu (wajib)! Mesmu nune’e, tenke kredivel, responsavel no honestu, atu kritika hirak-ne’e bele ajuda CAC hodi hadiak servisu diak liutan.

Hamutuk ita kombate korrupsaun!

Luis de Oliveira Sampaio

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,620
  • Page views today : 2,659
  • Total visitors : 71,626
  • Total page view: 99,153

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur