Notísia foun


MANUFAHI—Prezidente Autoridade Munisipìu (PAM), Manufahi, Arantes Isaac Sarmento haktuir, bee manas ne’ebé lokalija iha Aldeia Kledik, Suku Fatukahi, Postu Administrativu Fatuberlio, Munisípiu Manufahi, konsideradu hanesan fatin turizmu no tama ona iha Planu Estratejiku Dezemvolvimrntu Munisipál (PEDM).

“Ita tau ona iha planu hodi dezenvolve fatin ida ne’e hodi atrai vizitantes tantu lokal, nasionàl ho internasionál,” Arantes ba jornalista iha bee manas Fatuberlio, Segunda (10/08) hafoin ho ekipa halo vizita ba fatin ne’e.

Arantes dehan, PEDM seidauk bele implementa ho didi’ak tanba situasaun polítika rai laran, maibé nia parte nafatin tau iha planu ba orsamemtu 2021.

Nia haktuir, iha tinan 2019 haruka ona proposta ba Ministériu Obras Públika (MOP) liu husi Ajensia Dezenvolvimentu Nasionàl atu konsidera iha orsamentu 2020. Nune’e,  R4D komesa ba foti ona dadus maibé tenke hein orsamentu.

“Ita tenki hadi’a estrada uluk tanba estrada ladi’ak bele difikulta mós maluk vizitantes sira mai haris bee manas ne’e. Tanba ne’e planu ba uluk estrada hafoin halo konstrusaun ba bee matan,” nia subliña.

Arantes hatutan, foin lalais Ministériu Turizmu Komersiu no Indústria (MTCI) ba halo ona vizita iha Manufahi mós nia parte aprezenta ona ba atu toma konsiderasaun. Nune’e mós hatama ona planu no estrada R4D.

Autoridade ne’e dehan, estrada sei halo fazeadamente, dahuluk to’o bee manas, tuir fali halo to’o Santuáriu postu antigu Fatuberlio no faze tuir fali mai kontinua to’o komunidade aldeia Quiran Tetuk.

Tempu hanesan Florindo de Jesus Fernandes nu’udar komunidade husi sub-aldeia, Quiran Tetuk, suku Fatukahi, postu Fatuberliu sente preokupa durante ukun a’an tinan barak nia laran maibé komunidade seidauk asesu ba dezenvolvimentu estrada.

“Ami komunidade uma kain tolu 36 ho total populasaun atus 177 husi aldeia Quiran Tetuk, suku Fatukahi, postu Fatuberlio, munisipíu Manufahi sei halerik hela ba estrada tanba to’o susar tebes atu asesu ba transporte”nia dehan.

Tanba ne’e rekomenda netik ba nain ulun munisipíu liliu nai ulun sira iha nasionàl atu tau netik prioridade ba povu nia preokupasaun estrada.

Tuir observasaun Timor post nota katak, antes tama ba fatin bee manas iha mos kuadru avizu ida ne’ebé tau katak be manas ne’e bele kura isin katar no sel-seluk tan. (lcl)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 141
  • Page views today : 164
  • Total visitors : 73,073
  • Total page view: 101,422

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur