Notísia foun


Timor Post (11/08/2020)—Parlamentu Nasionál liuhusi plenária extraordinária konfirma pedidu ba deklarasaun Estadu Emerjénsia (EE) husi Prezidente Repúblika Francisco Guterres Lú Olo ne’ebé hetan ona aprovasaun husi komisaun permanente iha loron 5/08/2020.

Komisaun permanente estabelese iha periodu resesu (ferias) tuir rejimentu ho kompeténsia tuir konstituisaun halo aprovasaun ba pedidu autorizasaun prezidente repúblika nian tanba simu proposta husi governu relasiona ho atake pesti corona (COVID-19).

Tanba ne’e, hafoin debate manas iha uma fukun, mosu pro no kontra maka’as liuliu kona-ba aplikasaun estadu emerjénsia no krítika sira hasoru governu tanba konsidera fraku iha ejekusaun fundu COVID, ikus mai hetan duni konfirmasaun votus ba estadu emerjénsia dahaat husi deputadu hamutuk na’in-57 ne’ebé marka prezensa, na’in 40 fó votus a favor, abstensaun na’in-17 no laiha kontra.

Durante plenária, deputadu sira tantu husi bankada sira apoiu governu no opozisaun lansa krítika maka’as hasoru governu liuliu ba ministériu kompetente sira. Deputadu sira husu ba governu atu halo servisu no ezekuta fundu COVID ho loloos tuir situasaun emerjénsia.

Maioria deputadu husi CNRT vota kontra medida ida ne’e tanba defende katak Timor Leste la presiza aplika tan estadu emerjénsia no husu ba governu atu aprejenta ba parlamentu nasionál lei kona-ba kalamidadi nu’udar meius di’ak liu ba luta kontra COVID-19.

“Ita laiha serteja katak COVID-19 ne’e to’o bainhira mak hotu. Iha mundu tomak nasaun sira nafatin ho lookdown, tanba ita seidauk iha aimoruk hodi kura moras ne’e. Serake ita atu kontinua fulan-fulan implementa estadu emerjénsia,” Deputada CNRT, Carmelita Caetano Moniz subliña iha nia inervensaun.

Iha parte seluk, Carmelita husu atu governu labele poupa fali osan inkuantu aprovasaun fundu COVID nian tuir planu no programa ne’ebé governu trasa ona.

“Osan restu ne’e hatudu governu fraku iha eekusaun la’ós poupa osan. Tanba osan ne’ebé parlamentu nasionál aprova ba fundu COVID ne’e bazeia ba planu no progrma,” Carmelita afirma kestaun ne’e relasiona ho Ministru Finansas Fernando Hanjan iha okajiaun ne’e hato’o katak ejekusaun ba fundu COVID, nia parte poupa iha prosesu ejekusaun.

Entretantu hafoin konfirmasaun votus ba estadu emerjénsia, Prezidente Parlamentu Nasionál, Aniceto Guterres husu ba governu atu aplika ho loloos estadu emerjénsia atu nune’e labele akontese iha Timor Leste, ema mate tanba COVID-19 no hamlaha. (cao)

Please follow and like us:

Site Statistics

  • Users online: 1 
  • Visitors today : 782
  • Page views today : 993
  • Total visitors : 44,426
  • Total page view: 60,324

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur