Notísia foun


Timor Post (07/08/2020)—Prezidente Autoridade Munisipíu (PAM) Manufahi, Arantes Isaac Sarmento husu ba Ministériu Turizmu Komérsiu no Indústria (MTKI) atu halo rehabilitasaun ba estátua Don Boa Ventura ne’ebé lokaloza iha Bubur Laran, Luak, Suku Daisua, Postu Administrativu Same, Munisípiu Manufahi.

Proposta verbal ne’e PAM hato’o iha loron Sexta (07/08/2020)  bainhira akompaña Ministru Turizmu KOmérsiu no Indústria, José Lucas do Carmo da Silva ba vizita Estátua Don Boa Ventura hodi observa jardin, lutu no lampu sira iha fatin turizmu ne’e a’at hotu ona.

“Ita nia komunidade Daisua entrega ona rai éktares 23 ba governu liuliu ba MTKI atu halo konstrusaun foun ba parke Don Boa Ventura Maunfahe,” Arantes haktuir ba jornalista sira iha Luak.

Tanba ne’e husu ba MTCI atu halo master plan ida maibé tenki di’ak no kondis ho situasaun real tanba Luak hanesan rai ne’ebé sagradu no lahanesan rai sira seluk.

“Rai ne’e sagradu tanba iha istória rasik no ita kompara ho rai seluk la hanesan. Ne’e duni atu halo dezenvolvimentu parke Luak presiza involvementu rai nain munisipíu hodi fó hanoin atu nune’e bele hamosu master plan di’ak ida,” Arantes sujere.

Tuir nia katak, halo konstrusaun foun ba parke Don Boaventura atu nune’e bele sai icon ida ba Timor hodi atrai turista sira no fó benefisiu di’ak ba ema Timoroan tomak espesialmente ba Manufahi.

“Hhakarak atu hatete de’it katak avo Don Boaventura la’ós ema Manufahi nian mesak maibé nia Timor tomak ninia riku soin neduni presiza tebes atu proteje no presiza tebes atu hadi’a,” Arantes subliña.

Entretantu Ministru José Lucas hatete, vizita kortezeia ne’e importante tebes ba ezekutivu sira atu dada lia ho autoridade munisipíu no mós observa direta ba fatin turismu hanesan jardim Don Boaventura Manufahi no fatin seluk iha territóriu.

“Iha vizita ne’e ita atu haree hanesan parke Don Boaventura depois rehabilitasaun no konstrusaun ne’e sei di’ak ka lae ka parte balu konsidera atu halo rehabilitasaun, manutensaun no konstrusaun,” nia dehan.

Governante ne’e sita mós katak, agora dadaun governu prepara hela planu ba orsamentu tinan 2020-2021 ho ida ne’e membru governu mai haree saida mak atu konsidera.

“Maibé problema ne’ebé ita haree mak lutu a’at tiha ona no ida ne’e presiza atendementu lalais  inklui iha mós sujestaun husi autoridade munisipíu atu halo prepara master plan ida hodi halo ekstensaun uitoan ba rai 23 éktares ne’ebé komunidade fornese”nia dehan.

“Sim ita presiza master plan ida ne’ebé mai ho dezeñu kompletu hanesan matadalan maibé sei halo konsulta no diskusaun ho autoridade lokal sira,” nia subliña. (lcl)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 420
  • Page views today : 516
  • Total visitors : 70,426
  • Total page view: 97,010

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur