Notísia foun


BAUKAU—Hospital Regional Eduardo Ximenes (HoREX) Baukau, to’o fulan Maiu 2020 rejista pasiente ne’ebé hetan moras daet HIV/SIDA hamutuk na’in-22 inklui na’in-ida mate no na’in-ida halai lakon husi tratamentu médiku sira nian.

Responsavel sala VCCT HoREX Baukau  Sabino de Carvalho haktuir, númeru pasiente hirak ne’e, iha pasiente foun na’in-haat rejista iha fulan Janeiru to’o Maiu 2020, inklui na’in-rua husi Munisípiu Lautem no na’in-rua husi Baukau.

Entretantu pasiente sira seluk hahú rejistu iha tinan 2011 inklui na’in-ida ne’ebé médiku sira labele salva.

“Na’in-ida mate idade reprodutiva no na’in-ida hanesan la fiar ita entaun nia putus tiha halo tratamentu. Ami buka tuir to’o agora la hetan,” Sabino haktuir ba Timor Post, Sesta (7/8/2020) iha nia kana’ar fatin.

Nia esplika, moras HIV/SIDA ne’e akontese ba  pasiente sira tanba dala barak pasiente sira bainhira sei isin di’ak halo relasaun sexual arbiru ka ema ida halo relasaun sexual ho ema barak.

“Moras perigozu ne’e akontese ba ema ida tanba ita hotu hatene buat ida HIV ne’e akontese bainhira ema halo relasaun seksual la siguru ka halo relasaun seksual multipartidaria, entaun bele preuzudika ema nia vida,” Sabino subliña.

Nia haktuir, pasiente na’in-20 mak dadauk ne’e iha hela responsabilidade HoREX nian kondisaun ne’ebe di’ak maske la garantia rekopera  total, maibe kuandu pasiente hemu beibeik ai-moruk bele  hanaruk tan pasiente nia  moris.

“Sira hotu-hotu iha hela tratamentu nia laran, tanba ne’e sira nia kondisaun di’ak, maibé ita bele dehan moras ne’e atu kura para di’ak los, lae. Tanba ita nia moris ne’e tergantung ba ai-moruk de’it ona. I ninia durasaun ne’e hemu beibeik aimoruk to’o ferik katuas bainhira Maromak bolu mak bele para,” Sabino dehan. (gut)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,280
  • Page views today : 2,152
  • Total visitors : 74,212
  • Total page view: 103,410

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur