Notísia foun


Timor Post (06/08/2020)—Prezidente Repúblika Francisco Guterres Lú Olo iha nia mensajen bainhira deklara estadu emerjénsia dahaat subliña, dezde loron 15 Maiu, iha territóriu la rejista ona kazu COVID-19, maibé iha loron 4 Agostu rejista fali kazu pozitivu ida tanba nu’udar nasaun mundu.

Lú Olo subliña, sei iha nafatin risku ka perigu nia laran tanba númeru kazu moras aumenta iha país viziñu ne’ebé fahe nia fronteira internasionál terrestres Repúblika Indonézia, partikularmente iha provínsia Nusa Tenggara Timur, hanesan mós ho komunidade Australia.

Ho situasaun ne’e, hafoin simu proposta ba deklara estadu emerjénsia husi Governu no hetan apoiu husi membru sira husi Konsellu Superior Defeza no Seguransa no Konsellu Estadu, no hafoin simu autorizasaun husi Komisaun Permanente Parlamentu Nasionál, ho kbiit konstitusionál, Prezidente Repúblika, Francisco Guterres Lú Olo, iha loron Kinta (06/08/2020), deklara estadu emerjénsia.

Estadu emerjénsia dahaat ba loron tolu-nulu iha territóriu nasionál tomak, hahú ba periodu loron-30, hahú husi tuku 00.00 iha 6 agostu 2020 (kinta feira) no remata iha tuku 23.59 iha 4 setembru 2020 (sesta feira).

Prezidente Repúblika iha ninian mensajen deklarasaun estadu emerjénsia hatete:

“Ho estadu emerjénsia, medida sira ne’ebé ita hotu tenke hatuir, husi sorin ida, permite fó protesaun ba saúde públika maibé, husi sorin seluk, suspende ka limita direitu no liberdade prinsipal sidadaun sira-nian, ne’ebé Konstituisaun Repúblika fó.”

Haree ba situasaun ohinloron ne’ebé hasoru la ejize medidas restritivas ne’ebé forte hanesan periodu datoluk estadu emerjénsia ninian. Tanba ne’e, estadu emerjénsia foun sei parsialmente suspende no limite direitu ba sirkulasaun internasionál, liberdade sirkulasaun no fixasaun residénsia iha pontu hotu-hotu iha territóriu nasionál no direitu ba rezisténsia.

Prezidente Repúblika tau atensaun ba pontus entrada ba territóriu nasionál atu ita bele hasees-an husi risku coronavírus tama tan iha ita-nia rain. Sidadaun sira ne’ebé tama iha Timor-Leste tenke submete ba kuarentena, katak sei moris ketak iha fatin ida durante loron sanulu resin haat.

Ba estadu emerjénsia ida ne’e atividade ekonómika, sosiál, kulturál, eskolár, serbisu, halimar, vizita família no atividade seluk la’o hanesan bainbain.

Prezidente Repúblika apela atu hothotu moris hakmatek no haktuir rekomendasaun husi Ministériu Saúde no Organizasaun Mundiál Saúde: fase liman beibeik, uza mascara no halo distansiamentu sosiál.

Prezidente Repúblika husu atu enkuantu sidadaun sira tuir dadaun medidas estadu emerjénsia tanba pandemia COVID-19, orgaun soberania sei buka-hetan dalan legal seluk atu fó protesaun nafatin ba Povu. Prezidente Repúblika fiar katak orgaun soberania sei hetan solusaun legal seluk ida, iha tempu badak.

Entretantu Ministériu Saúde (MS) husu ba populasaun iha territóriu atu labele pániku, maske Timor Leste rejista hikas kazu pozetivu na’in-ida ba pesti corona (COVID-19).

Liuhusi komferénsia imprensa,Vise Kordenador Jerál  Komisaun Ezekutivu Saúde ba Surtu COVID-19 , Narcisio Fernandes klarifika, nia parte rejista hikas kazu ida ne’e hafoin halo teste ba ema na’in-140 ne’ebé asegura ona iha Kuarentena Tasi Tolu, Dili no na’in-4 iha kuarentena iha Motaain.

“Kazu pozitivu ne’ebé ita mensiona,  ho indentidade mane ho tinan 46, sidadun husi Indonézia Jawa Sentrál/ Jawa Tengah, kazu pozitivu refere oras dauduak iha ona sala izolamentu Vera Kruz, Dili,” Narcisio subliña ba Jornalista sira, Tersa (04/08/2020).

Nia esplika sidadaun ne’ebé komfirmasu pozitivu, nia halo viajen husi Jawa ho aviaun Citilink ba Kupaun iha loron 25 fulan Jullu 2020, no iha loron 22 Jullu ho karreta tama iha Timor Leste.

“Nia mai iha Timor Leste, ekipa sira simu iha fronteira no lori kedas sidadaun ne’e tama iha konfinamentu Tasi Tolu. Depois rezultadu teste ne’e sai hatudu katak pozitivu, ekipa husi pilar seis (6) transfere kedas no pasiente iha ona sala izolamentu  Vera Kruz,” Narcísio haktuir.

Nia hatutan, ema hotu ne’ebé konsege iha kontaktu ho pasiente ne’e parte saúde asegura hotu ona no tau atensaun maka’as maske kondisaun ladun másimu.

Nia dehan, motorista no profesionál  saúde hirak ne’ebé momentu akompañia sidadaun pozitivu ne’e môs iha hotu ona Kuarantena.

Nia mós rekonese katak informasuan ne’ebé mídia sira akompania katak, iha atividade balun iha Kuarentina dalaruma latuir regras ne’e los, maibé   ekipa vizilansia husi MS tau nafatin konsiderasaun, tanba servisu ne’ebé halo mezmu ho limitasaun maibé ekipa kontinua servisu.

“Ami mós nafatin ho ekipa iha Tasi tolu atu persiza haree filafali sira nia regras ne’ebé aplika iha Kuarentina para atu asegura kontinua ba iha dixiplina. Tanba iha risku ha ondas Segundu ni’an agora dauduak hahú mosu ona,” nia salienta. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 331
  • Page views today : 386
  • Total visitors : 77,707
  • Total page view: 108,851

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur