Notísia foun


Timor Post (06/08/2020)-Bankada CNRT, Kinta (06/08) akuza Prezidente Parlamentu Nasionál, Aniceto Guterres, komete tan krime tan irregularidade klara no grave hasoru estadu de direitu tanba konxientemente halo manipulasaun ba ajenda estraordináriu no viola Rejimentu Parlamentu Nasionál hodi autoriza estadu emerjénsia dahaat.
Liuhosi Konferénsia Imprensa Portavós deputadu Gabriel dos Santos, haktuir iha reuniaun lider bankada, Bankada CNRT husu atu halo ajendamentu ba Plenária diskusaun deklarasaun EE iha loron kinta-feira (06/8/2020) ka mais tarde sexta-feira atu nune’e marka mós prezensa hosi Primeiru-Ministru hodi esplika motivus no medidas adekuadu sira ne’ebé maka Governu tenke halo hodi hasoru Covid-19 iha prosesu implementasaun Estadu Emerjénsia nian.

Maibé, reuniaun konvokatóriu transforma tiha ba iha votasaun autorizasaun Estadu Emerjénsia sem prezensa Primeiru-Ministru ka Governu nian. Ne’e hatudu momoos violasaun ba Rejimentu Parlamentu Nasionál.

“Ohin hakarak hateten ba públiku tomak katak, horisehik iha loron kuarta-feira (05/8/2020) Presidente Parlamentu Nasionál ilegál no Inkonstitusionál komete tan irregularidade klara no grave hasoru Estadu de Direitu, tanba konxientemente halo manipulasaun ba ajenda plenária estraordináriu, no viola Rejimentu Parlamentu nasionál” subliña portavós iha konferénsia Imprensa.

Membru lejizlativa esplika rejimentu Parlamentu Nasionál hateten momoos katak, atu debate no halo deliberasaun no hodi fó autorizasaun Estadu Emerjénsia tenke iha prezensa Primeiru-Ministru nian, tuir artigu 119.2 Rejimentu PN hateten.

Bainhira Governu la marka prezensa iha debate no votasaun ba Estadu Emerjénsia, deputadu sira sei la hetan esplikasaun klara ba medidas de implementasaun ne’ebé mak Governu atu foti, oinsá manutensaun ba fasilidade kuarentena no izolamentu, kustu ne’ebé tenke hasai, oinsá atu asegura movimentu tama-sai iha fronteira, Aeroportu no Porto, no seluk-seluk tan.
Alende ne’e Gabriel sita, tuir artigu 71, forma de votasaun ba kazu Estadu Emerjénsia, nia dalan mak halo ho “votasaun nominal”, signifika kada deputados deklara nia-votu verbalmente, Maibé votasaun ba autorizasaun Estadu Emerjénsia ida horisehik ne’e ho “votasaun ordinária” (tuir artigu 70), iha deferénsia ho esperiénsia ba normas sira tuir Lei iha tempu hirak liubá.

“Klaru no momoos hatudu katak, desizaun sira ne’ebé akontese iha plenária viola prosedimentu legais no rejimentais. Ne’e hatudu momoos PPN Ilegál no Inkonstitusionál, laiha liu memória institusionál no mukit koñesimentu ba Rejimentu Parlamentu nu’udar dalan úniku atu guia prosesu tomak iha Parlamentu Nasionál” tenik deputadu bankada CNRT
Situasaun ne’e halo Bankada CNRT komprende didi’ak, sei halo esforsu hotu-hotu atu kontribui ba iha prosesu salva rai doben Timor-Leste hosi pandemia Covid-19.

“Ami enkoraja Governu de facto atu uza Lei do Sistema de Saúde hodi halo vijilánsia epidemiológica no sanitária, inklui atu halo vijilánsia ba mobilidade das pessoas entrangeiros bele uza de’it Lei de Migração e Azilu, ita la presiza aplika beibeik Estadu Emerjénsia hodi fó risku ba ita-nia Povu nia moris no estraga liután ita-nia ekonomia rai laran,” dehan polítiku.

Hosi parte seluk Deputada Bankada Fretilín, Josefa Soares, konfirma katak iha ne’ebá artigu 72 alínea G fó fatin ba Komisaun permanente atu bele aprova rezolusaun ruma ne’ebé fo fatin ba Prezidente atu bele dekreta kona ba estadu de sítiu ka estadu emerjénsia.

“Ida horisehik ne’e la’ós estadu de sítiu maibé estadu de emerjénsia entaun fó fatin atu Komisaun permanente bele halo aprovasaun ba ida ne’e la presiza dehan katak membru governu atu mai tanba karta Prezidente repúblika nian klaru tiha ona kona ba razaun saida mak atu bele husu ba situasaun emerjénsia” hatán deputada.

Reprezentante povu tuur kleur iha kadeira parlamentu nian esplika liután, la presiza governu nia prezensa iha parlamentu tanba governu mak husu ba Prezidente repúblika atu dekreta, maka prezidente haruka mensajen mai iha parlamentu nasionál, ne’e bele autoriza.
Enkuantu karik hosi opozisaun la konkorda la konkorda, iha mós fatin ba Prezidente parlamentu Nasionál konvoka filafali reuniaun para bele konfirma kona ba estadu emerjénsia horisehik aprovadu ona iha PN ne’e iha lei númeru 3 artigu 26 alínea 1 no 2 fó fatin ba ida ne’e.

Governu liuhosi Konsellu Ministru iha semana ne’e deside husu ba Prezidente atu deklara estadu emerjénsia hafoin prezidente veta lei sistema saúde. Iha loron tersa (4/8) TL rejista hikas pasiente foun pozitivu kazu corona virus no oras ne’e izola iha sala izolamentu Sentru Saúde Vera Cruz Dili.(Jornalista Julio Salinas Soares).

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,373
  • Page views today : 1,964
  • Total visitors : 69,937
  • Total page view: 96,362

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur