Notísia foun


Timor Post (03/08/2020)— Alfredo Miranda Soares nu’udar vítima ne’ebé hetan sona iha loron Segunda (03/08/2020) maizumenus tuku sanulu resin ida liu iha aredor Universidade da Paz (UNPAZ) haktuir kronolojia akontesimentu ne’ebé rejulta nia hetan kanek iha kotuk laran.

Ba Jornalista sira, Alfredo haktuir, iha dader nia tuir aula no hotu nia sai husi aula laran atu fila ba uma. Bainhira nia estarta motosikleta atu aranka maka derepente de’it ema sona nia husik kotuk iha nia kabas sorin loos.

Sente ba tudik tama iha nia isin, nia so’e tún motor ba rai no konsege duni tuir autor sira hodi lori fatuk tuda maibé la konsege kona.

“Sona ha’u ne’e ha’u la hatene tanba, ha’u mós tuir aula iha kampu atu fila mai (ba) uma mak ha’u foin estar motor ema mai sona hosi kotuk de’it dala rua, entaun ha’u husik motor ha’u foti fatuk tuda nia maibé la kona ida no sira halai,” Alfredo haktuir hafoin hetan tratamentu ba nia kanek iha Hospital Nacional Guido Valadares (HNGV) Dili.

Nia hatutan, nia rasik la koñese ema ne’ebé sona nia tanba, ema ne’e mosu hosi kotuk no uza maskara.

“Ema sira ne’e estudante iha ne’ebá ka ema liur ha’u la hatene tanba ema ne’e uza masker no mós uza xapeo, no ema ne’e halai sai de’it ne’ebé ho motor ka la’e ha’u la hatene,” Alfredo dehan.

Observasaun Jornalista Timor Post haktuir, kuaze oras ida vítima hala’o tratamentu intensive iha HNGV, doutor sira fó alta. Família sira akompaña vítima ba kompleta informasaun iha eskuadra PNTL Aimutin no fila hikas ba nia rejidénsia iha Tasi Tolu, Dili.

Reitór Universidade da Paz (UNPAZ), Adolmando Amaral informa, prosesu aprendizazen la’o normal hafoin akontesimentu ema deskoñesidu sona estudante ida husi Fakuldade Saúde Públiku iha aredor universidade.

Adolmando haktuir, iha dader nia sei iha reuniaun iha liur no maizumenus iha tuku sanulu resin ida liu nia rona informasaun katak iha akontesimentu ne’e maibé bainhira nia to’o universidade polísia halo ona intervensaun.

Nia dehan, polísia asegura kedas vítima hodi evakua ba HNGV no halo kedas investigasaun ba sasin sira no kontinua buka tuir autor ba akontesimentu ne’e.

“Polísia halo hela servisu. Foti ona sasin sira ba presta deklarasaun iha eskuadra. Purtantu ita hein rejultadu de’it,” Adolmando ba Timor Post via telefone, Segunda (03/08/2020).

Reitór UNPAZ ne’e haktuir, liu tiha minutu hirak akontesimentu ne’e, prosesu aprendizazen la’o normal hela.

Nia subliña, problema ne’e entre joven sira. Nia fi’ar prosesu investigasaun la’o no sei deskobre autor sira hodi toma responsabilidade.

Entretantu tuir observasaun Jornalista Timor Post iha HNGV haktuir, estudante ne’e hetan kedas tratamentu no iha tuku 12 liu doutór sira fó alta ona.

To’o notísia ne’e públika Timor Post seidauk konsege hetan konfirmasaun husi polísia kona-ba prosesu investigasaun no kapturasaun ba autor sira.

Deskonfia kazu ne’e akontese liga ho problema arte-marsiál.

Fó hanoin fali katak, iha fulan kotuk joven ida mate iha aredor UNPAZ tanba monu tun husi andar. Motivu husi akontesimentu ne’e to’o agora polísia seidauk halo klarifikasaun. Iha momentu ne’eba parte balun dekonfia katak estudante sira ne’ebé halo hela estáziu maka oho joven ne’ebé hela duni besik UNPAZ ne’e. Maibé iha mós deskonfi katak joven ne’e monu tanba lanu todan no sae ba andar no mosu dez-intendimentu maka monu tun husi andar leten.

Jornalista: Jaime Pires

Please follow and like us:

NOTÍSIA FOUN

Site Statistics

  • Users online: 11 
  • Visitors today : 639
  • Page views today : 931
  • Total visitors : 73,571
  • Total page view: 102,189

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur