Notísia foun


Timor Post (22/07/2020)-Prezidente Parlamentu Nasionál, Aniceto Guterres, sei estuda levantamentu imunidade ba deputadu Antonio da Conceição ne’ebé hetan notifikasaun hosi Tribunal Distritál Dili.

“Parlamentu simu ona karta notifikasaun hosi tribunal kona ba kazu Deputadu Antonio da Conceição “Kalohan” nian, maibé agora ha’u sei estuda hela depois mak hatún ba iha Komisaun A, para aprezenta paraser ruma kona ba kestaun ne’e”, informa Prezidente Parlamentu Nasionál, deputadu Aniceto Guterres ba jornalista sira iha uma Fukun PN Kuarta (22/07).

Eis Prezidente Bankada FRETILIN hatutan tribunal marka data julgamentu ba Antonio iha fulan Janeiru 2021, karik iha tan kazu seluk nia parte seidauk hatene, maibé ida ne’ebé tama ona ne’e sei estudu.

“Ha’u seidauk iha koñesimentu iha tan kazu seluk karik, pur enkuantu ida ne’ebé tama ona ne’e ha’u sei estudu hela depois atu baixa ba iha Komisaun,”, tenik eis Prezidente Komisaun Nasionál Chega.

 Konteúdu karta Aniceto dehan hanesan baibain (tribunal) husu levantamentu imunidade ba kazu sira ne’ebé involve deputadu ka membru governu.

Hodi  esplika katak, atu hasai imunidade ba membru ida  tenke liu hosi prosesu, liu hosi plenária  inisiativa hafoin rona pareser hosi komisaun A ne’ebé trata ba asuntu Konstitusionál, Lei no Justisa molok atu foti ninia imunidade.

                 Iha fatin hanesan  , Deputadu Antonio da Conceição “Kalohan” hatete nia parte seidauk simu karta notifikasaun foun maibé prontu ba hatán lalika tan debate imunidade.

“Loloos ne’e ba hatán iha fulan Dezembru 2019 maibé altura ne’e iha debate orsamentu jerál estadu entaun la konsege ba hatán iha tribunal”, rekorda eis Ministru Edukasaun no Eis Ministru Komérsiu Indústria ne’e.

Antonio haktuir “kazu ne’e kuandu ha’u sei hanesan Ministru Komérsiu kompras ekipamentu indústria ninian maibé ha’u la hatene atu halo saida iha altura ne’ebá, ne’ebé iha duni kazu ida, maibé kazu ne’e la’ós tanba kestaun boot maibé problema ne’e iha pagamentu ne’ebé halo tiha hosi parte lojístika ho aprovizionamentu halo tiha ona pagamentu no entantu depois ha’u muda sai tiha hosi ne’ebá mak ha’u foin hatene saida katak númeru serial ne’e lahanesan” dehan Kalohan.

Kalohan rekorda iha kazu seluk ne’ebé investiga mak kona ba kazu Masin iha Atabae ne’ebá, maibé kontratu ida ne’e nia laiha tiha ona iha ministériu Komérsiu.

” La’ós ha’u maka halo kontratu ida ne’e  maibé bolu ha’u ba hanesan testemuña, ne’ebé sira bolu tiha ona ha’u ba halo investigasaun”, deputadu revela.

Lider partidu Demokratiku ne’e afirma nia parte prontu atu kontribui ho justisa bainhira halo levantamentu imunidade ba nia.

 “Ha’u seidauk hatene, sé bolu ha’u prontu, agora daudauk mós prontu, ha’u hakarak ba tanba la’ós ona tempu atu debate (levanta imunidade) tan”, nia afirma.(Jornalista Julio Salinas Soares).

Please follow and like us:

NOTÍSIA FOUN

Site Statistics

  • Users online: 5 
  • Visitors today : 379
  • Page views today : 464
  • Total visitors : 70,385
  • Total page view: 96,958

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur