Notísia foun


Hakerek Naín: Amito Qonusere Araújo

Jornalista RTTL-EP, hela iha Caicoli-Dili.

Númeru kontaktu +67077639282.

E-mail: amitortl@gmail.com

Opiniaun ida neé la reprejentante Instituisaun nebeé Hau haknaár áan ba, maibe neé nuúdar espresaun pessoal, nebeé halaó knar iha Area Jornalismu nian.

Durante neé situasaun Polítika rai laran la Estavel, nebeé implika ba Dezenvolvimentu Nasional, nebeé hamosu Pro no Kontra husi sidadaun sira. Maibe ida neé kestaun ketak ida, tamba neé responsabiliza husi líder nasional sira.

Iha situasaun neé, Jornalista sira mos krítika malu tamba la aseita konaba prosesu nomeiasaun reprejentante Jornalista ba Konsellu Imprensa durante mandatu tinan 4, mak hanesan Reprejentante Asosiasaun Jornalista Timor Leste (AJTL) no Timor Leste Press Union (TLPU). Asosiasaun rua neé hili ninia reprejentante ba Konsellu Imprensa liu husi Kongresu nebeé halaó tiha ona, foin lalais neé. Hafoin nomeiasaun Reprejentante AJTL iha Konsellu Imprensa, hili Virgilio da Silva Guterres, atual Prezidente Konsellu Imprensa. Hafoin ida neé maka Jornalista naíin 32 nuúdar petisionáriu hatoó petisaun ba Órgaun Estado sira, tamba la aseita prosesu eleisaun; rajaun maioria laos Jornalista mak hili, maibe barak liu mai husi Ativista.

Petisaun nebeé sira halo, bazeia ba artigu 48 Konstituisaun RDTL nebeé haktuir katak, sidadaun hotu-hotu iha Direitu atu aprejenta petisaun, kesar no reklamasaun, mesak-mesak eh grupu, ba órgaun soberanu sira, eh ba autoridade seluk-seluk atu defende sira nia direitu, Lei Inan, Lei oan eh ba interese ema hotu nian.

Artigu nebeé Hau sita iha leten, mak loke dalan; sidadaun hotu-hotu iha Direitu atu halo petisaun, nuneé petisaun akontese hodi reklama prosesu eleisaun, liu-liu Eleisaun ba reprejentante Jornalista iha Konsellu Imprensa, hanesan Asosiasaun Jornalista Timor Leste (AJTL) halaó iha Sábado 04 fulan Jullo 2020 iha Delta Nova-Dili. Rajaun reklamasaun ka petisaun neé akontese tamba prosesu Eleisaun la tuir Lei Komunikasaun Sosial. Petisionáriu sira konsidera Eleisaun hili Reprejentante AJTL iha Konsellu Imprensa, konsidera eleisaun neé la tuir lei númeru 5/2014 kona ba Komunikasaun Sosial nian, no Dekretu lei númeru 25/2015 Estatutu Konsellu Imprensa.

Liga ba artigu 17 Lei Komunikasaun Sosial koalia kona ba Inkompatibilidade iha aliña (1) kona ba Profisaun nuúdar Jornalista labele halo hamutuk iha tempu hanesan, ho knar sira seluk hanesan; (a) Funsionáriu Públiku.

Tuir Hau nia komprensaun, Maluk Jornalista sira nebeé reklama, tamba rajaun ida mos funsionáriu públiku fo votus iha Eleisaun, tamba Funsionáriu Públiku husi Konsellu Imprensa mos fo nia votus durante Eleisaun. Hau hakarak hateten katak, funsionáriu públiku Konsellu Imprensa mos halaó aktividade Jurnalismu iha mídia privadu balun. Iha Estatutu Asosiasaun Jornalista Timor Leste (AJTL) mos autoriza ema nebeé halaó servisu Jornalismu iha Imprensa ka Organizasaun Ativista mos simu nafatin hirak neé nuúdar membru AJTL.

Atu define katak, Reklamasaun nebeé akontese, kontra ona Lei Komunikasaun Sosial, maibe Estatutu AJTL fo dalan, tamba kongressu neé Naín mak AJTL, enkuantu Konsellu Imprensa organiza ba prosesu. Tamba neé Hau konklui katak Eleisaun AJTL neé baze no legal tamba tuir Estatutu AJTLL nian. Hakarak atu responde no fo lia loós ba reklamasaun hirak neé, Hau nia hanoin, membru AJTL tomak tenke hatoó petisaun ruma hasoru Estrutura AJTL hodi hamosu Kongresu-Ekstra-Ordináriu nuneé halo revizaun.

Ati defini Legalidade husi petisaun jornalista sira nian, neé kompetensia Tribunal Rekursu. Enkuantu ita hotu la iha kinpetensia atu foti foti desijaun. Nuneé ita hotu tenke apresia vontade jornalista sira nian, tamba hahuú ona aprende oinsa atu halo Revolusaun, atu halo mudansa ruma. Liu husi petisaun ida neé, Jornalista ida-idak hahuú estuda no loke Lei sira, no neé fanun Jornalista atu aprende Lei, no bele sai mestre ba hakerek iha Imprensa nian. Tenke apoiu sira, basa sira hahuú koalia ona, no defende lia loós, no bele deklara ona ida nebeé METAN, no ida nebeé MUTIN. Labele odio no vinga malu, basa ita nia Lei mak autoriza kona ba Liberdade Espresaun. Ida-idak nia parte mak defende ho argumentu, nuúdar meius atu hadia salan iha futuru, nuneé labele akontese tan.

Tuir Hau nia observasaun, Jornalista sira hahuú soe ona piedas ba malun iha mídia social, hafoin Petisaun husi Jornalista sira akontese. Jornalista sira hahuú ataka malu, iha diferensia ideias kona ba problema neé, no hatoó deklarasaun iha palku Imprensa nian; ida-idak defende áan tuir prinsípiu Komunikasaun social, no Estatutu Organizasaun nian. Funu Jornalista akontese, iha kedan periodu Polítika Governu hamosu Esbosu Lei Kriminaliza Defamasaun.

Ho oportunidade ba Funu entre Jornalista sira, neé sei loke dalan ba Governu atu lao dalan luan, hodi aprova ka tama vigor Projetu Lei Kriminaliza Defamasaun, tamba jornalista hotu-hotu preokupa ho prosesu ida, ho nia finalidade nomeiasaun jornalista ba Konsellu Imprensa, no interese komum ba Projetu Lei kriminaliza Defamasaun, laos ona diskusaun públiku.

Dalaruma Jornalista sira nai funu, ema iha liur hamnasa hela ba ita, no kontinua soran nafatin ita, nuneé ita focus ba petisaun sira, no fo livre ba Governu atu aprova Projetu lei neé.

Tamba neé, Hau husu ba Organizasaun Asosiasaun Jornalista Timor Leste (AJTL) no Timor Leste Press Union (TLPU) atu; Organiza malu, hodi troka ideias nuneé bele solusiona problema kiík, hodi Luta hodi Defende Projetu Lei Kriminaliza Defamasaun.

Aliende neé, husu ba Konsellu Imprensa atu uja nia kompetensia hodi deklara ona kona ba Reklamasaun Jornalista sira nian. Ida neé mak dalan diak atu rejolve naksalak ruma, se lae, kazu neé sei la hotu, no Jornalista sira nia funu sei la remata, tamba la iha dalan atu rejolve, tamba hotu-hotu iha fundamentu bazeia ba Lei. REMATA

 

Viva AJTL

Viva TLPU

Viva Liberdade Imprensa no Liberdade Espresaun

Kontra Total no Hatun Projetu Lei Kriminaliza Defamasaun

Please follow and like us:

NOTÍSIA FOUN

Site Statistics

  • Users online: 0 
  • Visitors today : 1,289
  • Page views today : 2,166
  • Total visitors : 74,221
  • Total page view: 103,424

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur