Notísia foun


Timor Post (17/07/2020)- Sekretáriu Estadu Juventude no Desportu (SEJD) Abrão Saldanha hatete, subsídiu ba klube sira iha kontinua iha maibé klube sira tenke prenxe kritériu balun ne’ebé mak sei iha.

“Subsídiu ba klube sira ka buat sira ne’ebé mak iha ne’e kontinua iha nafatin só ke iha kritériu balun klube sira tenke prenxe mak foin bele hetan subsídiu”, Abrão hatete ba jornalista sira iha nia kna’ar fatin, Lesidere (17/07).

Governante mós dehan sei halo diálogu ho klube sira tanba estadu agora enfrenta hela problema resesaun ekonómika global ne’ebé afeta tebes ba fundu mina rai.

“Oinsá mak ita sobre vive iha situasaun hanesan ne’e mak sei halo diálogu ho klube sira no federasaun sira atu hare, sá nesesidade mak atu kobres no sá nesesidade mak tenke hadi’a” subliña Sekretáriu Estadu.

Governante foun ne’e adianta, kritériu  ba klube atu hetan subsídiu iha ona, maibé nia  hanoin kritériu ne’ebé di’ak liu maka klube tenke iha porsaun ba investimentu juveníl sira.

“Jogadór juveníl ne’e importante liu ne’ebé sira tenke halo, ida ne’e kondisaun ida. Tanba dala barak investe iha leten ka jogadór senior sira de’it maibé nia baze laiha” akresenta Abrao.

Governante realsa klube tenke iha programa serteza oinsá mak prepara hosi leten ba to’o iha kraik, tantu atleta ka jogadór sira hotu iha senior no mós junior inklui juveníl, klube ka federasaun sira tenke prenxe kritériu ne’e.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 416
  • Page views today : 511
  • Total visitors : 70,422
  • Total page view: 97,005

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur