Notísia foun


Timor Post (13/07/2020)-Front Mahasiswa Timor-Leste (FMTL) ezbosu lei kriminalizasaun difamasaun ne’ebé Ministériu Justisa daudaun ne’e prepara no halo aliterasaun hosi lei kódigu sivíl ne’ebé vigor iha Timor-Leste, ne’e la’os atu eduka sidadaun no hamate sidadaun sira nia opiniaun.

“FMTL nota ezisténsia ba ezbosu lei ne’e la’ós atu eduka sidadaun maibé hamate totalmente sidadaun hotu nia liberdade opiniaun ka espresaun iha artigu 40 Konstituisaun Repúblika Demokrátika Timor Leste (K-RDTL), Konvensaun Internasionál sira, Deklarasaun Universal Direitus humanus (DUDH) sira ne’ebé ratifika nu’udar ita nia lei nasionál” hatete portavós (FMTL) José Lino Pereira, liu hosi Konferénsia imprensa iha Liseu, UNTL Dili, Segunda (13/07).

José Lino hatutan, ezbosu lei difamasaun ne’e rasik sei la valoriza sentidu Estadu de Direitu Demokrátiku, ignore referénsia luta povu nian ba libertasaun patria husi operasaun militár, koloniál, ne’ebé fó konsekuénsia boot no todan durante tempu kolonializmu tinan 450 no invazór militár Indonézia durante tinan 24 nia laran.

Lino subliña gerrilleiru, juventude loriku asuwa’in saudozu sira ne’ebé mak fakar ran iha tempu ne’ebá tanba de’it povu no nasaun hetan Liberdade ida ne’ebé mak, livre no demokrátiku, maibé nota Ministru Justisa Manuel Carceres iha inisiativa boot atu halakon sistema demokrasia ne’ebé mak sosa ho ruin no raan, haree mós katak ministériu da justisa tenta atu lori povu ida ne’e hodi reflete fila fali ba tempo ditadura Salazar no Suharto nian.

Ho ne’e mak Front Mahasiswa Timor-Leste ( FMTL ) hakarak husu ba Ministru Justisa, Manuel Carceres, atu hapara tiha ezbosu lei ne’e.

“Front Mahasiswa Timor-Leste (FMTL) haree katak sekuénsia husi ezbosu lei ida ne’e mak hetan aprovasaun nia impaktu, dahuluk, hamate prinsípiu estadu Direitu Demokrátiku Timor -Leste no la komunga prinsípiu Konstitusionais no leis, hamate (artigu 40) Liberdade ko’alia no informasaun ninian, ate artigu 48 ne’ebé ko’alia Kona-ba direitu petisaun nian, la komunga prinsípiu jerais ne’ebé hatuur iha artigu 16 ko’alia kona-ba Universalidade no Igualdade, hamate no desmantela funsionamentu instituisaun estadu sira nia servisu hanesan Komisaun anti Korrupsaun inkluindu Provizória Diretu Humanos no Justisa nia papel ne’ebé hametin estadu Direitu Demokrátiku no boa governasaun. Hamate mós lei Nu.5/2014 lei komunikasaun social liu-liu hamate papél jornalizmu nia ne’ebé mak hanesan povu nia lian atu bele partilla informasaun ba públiku, hamate mós lei Nu.1/2006 liberdade reuniaun no manifestasaun nian”, afirma portavós FMTL.

FMTLb hare katak pontus hirak ne’ebé mensiona maka ezbosu lei refere hetan aprovasaun somente benefísiu de’it ba ukun na’in sira, fó liberdade ba koruptores sira no sai fatin abrigu ba kriminozu sira.

FMTL ezize ba Ministru Justisa, Manuel Cárceres, atu labele uza ministru nia podér hodi hamate liberdade ne’ebé mak sosa ho ruin no ran. Husu mós ba ministru da justisa, Manuel Cárceres atu hapara ezbosu da lei ida ne’e ho imediatu.

“Ami ezije ba ministériu da justisa Manuel Cárceres atu ezbosa mak lei “CYBER” Karik asunto hirak ne’ebé relata liu ba mak la tau konsiderasaun ami sei organiza no mobiliza sosiedade tomak hodi hamriik halo asaun manifestu hasoru ministru da justisa iha tempu badak,” afirma Portavós .

Entretantu iha oras balu nia laran FMTL mós hato’o kedas karta petisaun ba Ministériu Justisa, Kona-ba ezbosu lei refere.

Ezbosu aliterasaun ne’e atu alitera Kódigu Penal (KP) liu hosi aumenta Artigu 187-A, 187-B, 187-D, 187-E, no 187-F ne’e ho objetivu maka Kriminaliza difamasaun injuria ho pena prizaun tinan 1 to’o 3.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,317
  • Page views today : 1,869
  • Total visitors : 69,881
  • Total page view: 96,267

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur