Notísia foun

Kayrala Xanana Gusmão

DILI—Kayrala Xanana Gusmão desidi rejigna husi nia kargu nu’udar Xefe Negosiador Prinsipál Fronteira Marítima ho Austrália no Dezenvolvimentu Projeitu Tasi Mane, hatudu deskontentamentu ba governu lideradu Taur Matan Ruak hamihis nia ekipa ne’ebé durante ne’e la’o hamutuk.

Eis Prezidente Parlamentu Nasionál atual Deputadu husi bankada CNRT, Arão Noe da Costa Amaral hatete, ekipa ne’ebé lidera husi Xanana Gusmão dezde inísiu halo negosiasaun ba fronteira maritima to’o hetan rejultadu no kontinuasaun sira ba dada kadoras mai rai maran Timor Leste, maibé governu liuhusi konsellu ministru halo fali desizaun oin seluk.

“Razaun fundamental haree husi kontiudu surat ne’ebé Maun Boot haruka ne’e hatudu nia deskontentamentu kuandu governu hasai hotu ekipa ne’ebé servisu hamutuk dezde inísiu halo negosiasaun to’o agora ne’ebé koñese prosesu no objetivu,” Arão subliña iha entrevista ho Timor Post hafoin rona Xanana manda karta ba Palásiu Governu.

Arão hatete, kompeténsia governu nian atu hasai no nomeia fali ema foun, maibé ema foun la hatene prosesu bele difikulta fali prosesu ne’e rasik.

“Ho ema foun ne’ebé nomeia husi governu la hatene prosesu bele defikulta fali prosesu. Tanba ne’e Maun Boot husu rejignasaun,” Arão subliña kestaun ne’e relasiona ho desizaun Konsellu Ministru iha loron 08/07/2020, ezonera Prezidente Timor Gap Francisco da Costa Monteiro no nomeia fali António José Loiola de Sousa ba asumi pasta ne’e.

Arão dehan, ho rejignasaun Xanana nian ne’e fó impaktu tebes ba prosesu negosiasaun ba dada kadora Greater Sunrise (GS) mai rai maran Timor Leste tuir mehi Timoroan sira nian.

“Timor Leste bele hakidun fali se ema foun, prosesu sira tenki komesa fali ne’e bele atraza dada kadoras mai Timor Leste, bele dada fali ba Austrália.

Entretantu kona-ba ezonerasaun Francisco da Costa Monteiro husi Prezidente Timor Gap, Ministru Prezidensia Konsellu Ministru Fidelis Leite Magalhães haktuir, razaun ezonerasaun ne’e bazeia ba avaliasaun husi Ministériu Petrólium no Rekursu Minerál ba servisu Francisco Monteiro nian durante ne’e.

Hatan ba Jornalista sira karik desizaun ba ezonerasaun ne’e iha motivu polítiku, Fidelis subliña, la ko’alia kona-ba assuntu polítiku tanba kestaun ne’e kompeténsia ezekutivu sira nian.

“Ha’u só dehan de’it kompeténsia ezekutivu nia hodi halo desizaun. Ha’u la presiza ko’alia aleide partidu ka oinsá” Fidelis dehan ba Jornalista sira hafoin desizaun ba ezonerasaun.

Entretantu durante Xanana nu’udar Xefe Negosiadór Prinsipál Fronteira Marítima, hamutuk ho nia ekipa sira konsege luta to’o manan Austrália ba difinisaun fronteira marítima entre nasaun rua no konsege halo mós akordu kona-ba dada kadoras greater sunrise mai rai maran Timor Leste ho pursentu 70 no pursentu 80 bainhira dada-ba Austrália.

Hafoin luta boot ida ne’e, iha loron 16 Novembru 2018, liuhosi reuniaun Konsellu Ministru estraordináriu, ne’ebé dirije hosi Primeiru-Ministru, Taur Matan Ruak, nomeia Kayrala Xanana Gusmão nu’udar reprezentante espesiál Governu Timor-Leste nian, atu kontinua reprezenta Estadu iha negosiasaun fronteira ho Repúblika Indonézia, no indika Embaixadór Roberto Sarmento Oliveira Soares, nu’udar Xefe Ekipa Tékniku ba negosiasaun.

Iha momentu ne’eba, Konsellu Ministru mós aprova rezolusaun Governu nian kona-ba kontratu atu halo akizasaun ba intrese partisipativu no diretu iha Kampu Greater Sunrise nian. Partisipasaun Timor-Leste nian iha operasaun petrolíferu no transferénsia ba intrese partisipativu no direitu hirak ne’e afavór ba TIMOR GAP.E. P ka ninia subsidiária sira hodi halo jestaun ba intrese partisipativu no direitu hodi naran no reprezenta Estadu Timor-Leste.

To’o notísia ne’e públika, Timor Post seidauk hetan konfirmasaun husi parte governu kona-ba karta rejignasaun Xanana Gusmão nian. (cao) 

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,614
  • Page views today : 2,644
  • Total visitors : 71,620
  • Total page view: 99,138

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur