Notísia foun

Timor-Leste East Timor and South Korea flags together textile cloth, fabric texture

Timor Post (03/07/2020)- Sekretáriu Estadu Polítika Formasaun Profisionál Empregu (SEPFOPE) Alarico do Rosário  no Ministra Negósiu Estranjeiru no Kooperasaun (MNEK) Adalgisa Magno hato’o informasaun la hanesan kona bá  traballadór timoroan sira ne’ebé mak kontratu remata iha Korea.

Timoroan sira iha Korea balun nia kontratu remata ona no balun visa mate maibé to’o agora tanba aeroportu taka hotu.

Sekretáriu estadu formasaun profisionál empregu Alarico do Rosário hatete, nia parte sei buka meius hodi rezolve problema ida ne’e tanba governu Korea fó ultimatu ba timor hodi lori fila traballadór hirak ne’e.

“Sim, ita agora buka meius nafatin servisu la’o hela, tanba Korea fó ultimatu mai ita durante loron sanulu tenke lori fila ona ita nia traballadór sira ne’e, maibé ita buka meius atu estende tan sira nia kontratu maibé traballadór sira maioria hakarak fila, maibé servisu sei la’o hela ita sei buka meius tanba aeroportu taka hotu” dehan Alarico ba Jornalista sira iha Palasiu Governu, kinta (02/07).

Maibé hatán ba asuntu ne’e  Ministra Negósiu Estranjeiru no Kooperasaun Adalgisa Magno hatete, atu haruka fila traballadór timoroan iha Korea mai ne’e inisiativa governu TL nia rasik, tanba traballadór sira nia kontratu remata no balun visa mate ona.

“Laiha ema ida mak fó ultimatu mai ita, maibé ita ajuda sira atu fila tanba sira nia kontratu remata” dehan Ministra iha Palasiu Governu kinta (02/07).

Ministra subliña traballadór sira iha Korea tenke lori fila tanba   kontratu remata ona no sira laiha ona osan saláriu hodi selu uma no hahán, iha balun hakarak sira atu selu rasik sira nia aviaun mai to’o iha Singapura ou indonézia.

“Agora atu fasilita sira aluga aviaun mai ida ne’e sei iha opsaun ida, maibé dala ruma mós sei iha opsaun seluk mós. Ami mós koordena ho embaixadór Timor-Leste nia iha Korea do Súl nune’e bele husu lisensa ba governu Korea atu traballadór sira bele fila”, hakotu Ministra.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 354
  • Page views today : 413
  • Total visitors : 77,730
  • Total page view: 108,878

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur