Notísia foun


Timor Post (30/06/2020)- Primeiru Ministru no Ministru Interior Taur Matan Ruak hateten  priviléjiu ba nia lidera ministériu hanesan seguransa ne’ebé estadu hotu-hotu iha mundu buka.

“Priviléjiu boot ba ha’u, tanba instituisaun ida ne’e importante tebes. Estadu hotu-hotu iha mundu nia buka objetivu rua de’it. Ida, seguransa ida seluk mak ben estar. Seguransa no ben estar nia objetivu boot hosi estadu hotu-hotu iha mundu maka’as” hatete eis Maiór Jenerál Taur Matan Ruak iha nia diskursu dahuluk iha serimónia entrega servisu iha edifísiu ministériu interior, Vila Verde, tersa (30/06).

Eis Gerrilleiru luta libertasaun nasionál mós hatutan, balun hanoin dehan seguransa la presiza kuandu  ben estar iha ona, maibé seguransa iha relasaun estabilidade soberania integridade no territorial no oioin, laiha relasaun ho polítika.

Matan Ruak haktuir dehan Timoroan nia luta ba ukun an iha objetivu ida konkista podér polítika, katak hasai no husik estranjeiru sira, tanba se ukun timoroan la ukun labele jere nia nasaun rasik.

 Konkista podér polítika ne’e timoroan halo ho konfrontasaun militár ida Timoroan barak lakon vida hodi defende nasaun ida ne’e, maibé ohin iha timoroan nia liman lakohi lakon tan, tanba ne’e tau importánsia iha seguransa nian.

“Se ita uluk lori ema 1250 resin ba konkista ita labele husik ema ida ka ema rua atu lakon fali” tenik Taur.

Xefe Governu ne’e mós agradese ba Ministru Interior Interinu Filomeno Paixão tanba durante tinan rua bele servisu ho funsionáriu ho di’ak no halo ona buat barak maski balun seidauk atinje.

“Ha’u rona katak, funsionáriu sira balun dehan, Filomeno Paixão sai ona hosi ministériu interior imi kontente tanba nia karakter ida ne’ebé keras no siak ten, maibé ohin ita boot sira hetan fali tan ema ida ne’ebé mak siak liu fali Paixão”, hatete Taur ho  oin midar uitoan.

Entretantu eis Segundu Komandante Komandu da Luta libertasaun ne’e afirma sei servisu hamutuk ho funsionáriu sira iha parte seguransa sira hanesan Polisia Nasionál Timor-Leste, Imigrasaun no mós seguransa sivíl n hodi lori ministériu ida ne’e atinje ba mehi ne’ebé mak iha.

Jornalista: Jaime Pires

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,155
  • Page views today : 1,584
  • Total visitors : 75,592
  • Total page view: 105,416

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur