Notísia foun


OINSÁ HO PRÁTIKA BOA GOVERNASAUN?

Konstelasaun polítika muda ho “kocar kacir” movimentu politiku, “racikan” konsertasaun politika husi partidu no ema ne’ebé mak ho arte polítika.

Reforsu ba mudansa ne’e, husi senáriu irregular “la hanesan prosesu bai-bain”, iha Parlamentu Nasional, hanesan uma fukun ne’ebé Prezidente Partidu Demokrátiku Mariano Assanami Sabino anúnsia iha meius komunikasaun social iha fulan juñu nia laran katak, sei propoin ba órgaun lejislativu atu muda husi uma fukun ba uma lisan, atu bele transmite demokrasia edukativa ba sidadaun, partikularmente ba jerasaun foun ne’ebé sein dúvida katak, sai futuru jestor, lider, politiku no kuadru di’ak ida ne’ebé bele lori povu no nasaun ba prosperiedade.

“kocar kacir” estratejia polítika ba governasaun husi Assuntu koligasaun, ponderasaun kandidatu membru governu husi PR, destituisaun meza parlamentu nasional  no assuntu seluk kona ba kumprimentu regras konstitusionais, kabe ba responsabilidade Tribunal mak sertifika, kuantu ba “racikan” estratejia polítika, husik ba polítika mak trata, hanesan saida mak Jesus dehan ba dissiplu no judeu sira katak“ fó ba Kaisar saida mak Kaisar nian no fó ba Maromak saida mak Maromak nian”, maibé kestaun ne’ebé merese sai atensaun mak iha dinámika konjuntura governasaun, elenku sempre mai ho reforsu ema foun, no sein dúvida katak ho interesse foun.

Iha kontextu politiku, bele entende katak, iha kampiaun iha luta polítika sei rezulta “multiplier effect” bele mos husi, oferta vaga serbisu ba kuadru partidu no pessoa proximidade no oportunidade seluk ne’ebé mak bele kontribui ba sobrevivénsia partidu no kualidade moris elementu partidu, enkuantu, waihira iha derrota politika mak iha possibilidade bo’ot, previlejiu ne’ebé mak hetan lakon, iha momentu ne’ebé mak akontese iha tranzisaun poder.

Husi kazamentu tripartida “CNRT, PLP, KHUNTO” ho klauzula “loron atus ida husi hafoin xefe exekutivu simu posse, na’in tolu tenke divorsia”,  hodi hamoris governu AMP to’o CNRT retira husi, kada partidu haruka “titip” ninia ema “kuadru, militante no simpatizante ka proximidade” atu sai appointment politiku no balun sai assessor polítiku, hodi tongka membru governu ne’ebé mak designa husi partidu atu bele fó susesu iha mandatu.

Iha meius komunikasaun social loron 13 fulan novembru tinan 2019, públiku lé katak, total assessor iha oitavu governu konstitusionál, altura ne’ebé sei envolve CNRT iha assessor 1.014 no ministériu balun atinji 193 no balun designa hanesan assessor prinisipal iha governu.

Ho exklusaun partidu CNRT, kuadru, militante no simpatizante indijitadu sai assessor, kontratu polítiku, obrigadu husik serbisu, nune’e loke possibilidade atu partidu aliadu foun iha governu, bolu nia ema hodi reforsa membru governu indijitadu.

Além de ne’e, konsede postu serbisu ba pessoal ho kontratu polítiku, ne’ebé hanesan efeitu ida husi evolusaun polítika ida mos, dala barak fó efeitu ba postura husi administrasaun públika, basá, estrutura husi ministériu sira, jerente instituisaun estadu sira, iha tendénsia bo’ot ba mudansa radikal, hodi halo “reshuffle” husi nasional to’o baze ou bele dehan husi hun to’o dikin.

Mudansa dala ruma mai ho argumentu espekulativu katak, sei la halo reajustamentu, mak ordem husi membru governu ida, sei falla ka intupidu iha dalan klaran, tamba director ida ninia kor la hanesan ho ministru ida, nune’e  kór husi leten tenke hanesan to’o kraik atu ordem husi topo bele to’o kraik sein iha interupsaun. Balun akontese duni, tamba iha mudansa ba xefia balun ne’ebé mak ninia mandate seidauk remata.

Provadu duni  katak, iha instituisaun estadu no ministeriu sira iha mos ema partidu nian ne’ebé selesionadu liu husi rekrutamentu ne’ebé promove husi Komisaun Funsaun Públika bazeia ba lei númeru 11/2011 kona ba regime dos concursos, recrutamentos, seleção e promoção da pessoal para administração pública, no dala barak, wahira partidu  A mana’an koloka nia ema hodi administra instituisaun ida no waihira iha mudansa mak partidu B mana’an fali, indijita fali nia ema atu bele administra instituisaun ida.

Se intensaun husi reshuffle ne’e mak atu garante boa governasaun? mak bele entende liuliu husi abordajen teórika mak, exekusaun jestaun dezenvolvimentu ne’ebé mak sólidu no responsável ne’ebé mak la’o ho prinsípiu demokrasia no merkadu ne’ebé mak efisiente, evita alokasaun osan ne’ebé sala, prevene korrupsaun husi prespektiva politika no administrative.

Nune’e sira, ema ho almameter partidu sei haku’ak metin prinsipiu boa governasaun hodi atinji  indikador hanesan transparánsia, partisipativu, akuntabilidade no koordenasaun, hodi garante administrasaun ekonómika, polítika, administrative no iha autoridade maxima atu bele resolve problema social ne’ebé mak sidadaun sira hasoru iha baze.

Iha Prátika normal durante ne’e, mak kritériu eskolla ba ema ida hodi assume kna’ar iha kargu administrasaun públika no lidera órgaun estadu ida,  mak antiguidade serbisu iha instuisaun ida no avaliasaun por mérito ka meristokrasia  ka fó oportunidade ba jestor ida tuir ninia kapasidade ka prestasaun, la’os hare ba rikeza, senioridade ka seluk tan no prátika meristokrasia ne’e diak, tamba bele kumpre prinisipiu the right man on the right place hodi garante estabilidade, efetivu no efisiensia husi administrasaun organizmu ida nian.

Iha assuntu reformulasaun konjuntura governu tetu aspektu ida ne’e? pergunta ne’e simples, maibé pertinente duni atu halo análize, basá exemplu balun hatudu katak, akontese mutasaun ba funsionáriu sira no exemplu ida mak foin lalais ne’e, funsionáriu ida husi Ministériu Agrikultura no Peskas, muda ba Ministériu Obras Públikas hodi sai director. Exemplu ida ne’e, simplesmente atu justifika katak, kada postura polítika ne’ebé mak mai ho konsertasaun foun, bele espekula katak, sempre iha reshuffle ba jerente sira, provavelmente bele mos husi director jerál to’o iha nível xefe departamentu.

Iha rumoris katak, governu halo hela konsulta atu introduz ideia ida katak, director jerál no director nasionál ne’ebé durante ne’e indijita “ho justifikasaun teknokrata, antiguidade no avaliasaun por méritu, maske sein dúvida katak, instituisaun estadu sempre iha militansia husi partidu ida no iha tendénsia nomeasaun sira bele hare ba aspektu partidária hanesan ideia sita antes ona”, ho nomeasaun polítika, nune’e prinsípiu ida ne’e mos bele kontraria ho lei númeru 11/2011 kona ba regime dos concursos, recrutamentos, seleção e promoção da pessoal para administração pública, katak, administrasaun públika ne’e livre husi influénsia externa no independente.

Dezde primeiru governu konstituisional to’o sétimu governu konstituisionál, prátika kona ba revizaun orgánika governu nian, akontese waihira iha remodelasaun hodi halo reajustamentu “reshuffle” bazeia ba avaliasaun husi xefe exekutivu ba efisiensia no efetividade serbisu, maibe iha oitavu governu konstituisional iha fulan tolu nia laran, revizaun órganika governu akontese dala tolu.

Situasaun ne’e akontese, fundamenta ho konstelasaun polítika, iha ne’ebé CNRT exkluidu iha koligasaun no Fretilin ne’ebé dezde inínsiu Sekretáriu Jerál Marí Alkatiri dekara, Fretilin sei la sai kabidi no aitongka, maibé plataforma entendimentu ho PLP iha Hotel Timor iha fulan marsu, manifesta interesse hodi viabiliza governu to’o sirklu eleitoral foun mai, tuir prátika normal demokrasia katak, poder mai husi povu no fila ba povu hodi deside futuru governasaun.

Ho expozisaun motive katak, viabiliza governu, partidu FRETILIN ho aliadu PLP no KHUNTO, mai ho membru governu hamutuk 42, se kontabiliza la’os de’it na’in 42, maibé sei mai pessoa proximidade ka kuadru partidu hodi tane governu, hahu husi assessor, xefe gabinete, assistente no seluk tan ho kontratu polítiku.

Husi estrutrutura governu ne’e, ho membru governu na’in 42 bele halo espekulasaun katak, husi PLP, KHUNTO no FRETILIN ne’ebé konstitui governu bele emprega liu ema atus ida, por exemplu, konforme notísia iha mídia main stream balun katak, iha gabinete Sekretaria Estadu Komunikasaun Sosiál de’it iha assessor na’in 11, ho saláriu husi rihun ida atus tolu, lima nulu to’o rihun neen atus rua. To’o agora governu seidauk anúnsia dadus kompleta, nune’e seidauk iha kálkulu kona ba dezpeza ba sáláriu husi assessor, xefe gabinete to’o iha pessoál ho kontratu polítiku.

Reforsu sira ne’e, naturalmente fó kbi’it ba membru exekutivu atu bele garante funsionamentu serbisu ida ne’ebé efisiente no efikasia, hodi bele iha estabilidade governativa ne’ebé bele to’o final mandate ka to’o iha sirklu eleitoral foun. Maibé, expetativa sidadaun ba assuntu pessoal ho kontratu polítiku mak tenke kumpre deklarasaun husi Prezidente Repúblika iha momentu tomada de posse ba elenku governamental katak, ukun ne’e la’os oportunidade, maibé responsabilidade atu serbi’I povu no nasaun.

Kada partidu polítiku ne’ebé sai detentor ba poder ka ida ne’ebé mak hakarak governu, sempre mai ho modelu programa dezenvolvimentu nasaun, hanesan balun opta sosializmu, social demokrata, liberal, exremo direita, extermu esquerda ka konforme espektru politiku seluk ne’ebé mak sira opta sai hanesan padraun ba sira nia governasaun.

Husi diverjénsia sira ne’e, nafatin kumpre objetivu fundamental konsagradu iha konstituisaun RDTL artigu 6 kona ba Objetivu estadu, hodi fó prosperiedade ba povu no nasaun.

Dinámika polítika ne’ebé la’o, sorte husi “Dewi Fortuna” ba ema ho preferénsia polítika sempre muda no sein dúvida katak, akontesimentu ida sei fó ksolok ba ema ida no fó triste ba ema seluk no vise versa, por exemplu; ekipa futebool ida mana’an, mak ninia adeptu sei festeja no ekipa ida lakon ninia adeptu sei triste, tamba ne’e se ema bai-bain ka tékniku professional iha instituisaun ruma, tenke entende katak, waihira iha preferénsia ka adora partidu eh ema ruma,  mak karik akontese mudansa mak dala barak ita la pronto atu simu mudansa, tamba buat ne’ebé mak prefere “sirna” husi ita nia hare.

Kuota final: dinámika akontesimentu ida, sempre iha anglu pozitivu no serve sai materia edukativa.

Hakerek na’in:  jireis manuha’a

Kontaktu : 7730376

Email: jireis118@gmail.com

Alumi Fakuldade Siénsia sosiáis UNTL

Please follow and like us:

Site Statistics

  • Users online: 3 
  • Visitors today : 938
  • Page views today : 1,443
  • Total visitors : 73,870
  • Total page view: 102,701

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur