Notísia foun

Xefe Suku Taroman, Leonel Asa

Timor Post (30/06/2020)- Xefe Suku Taroman, Leonel Asa, informa aldeia tolu iha Suku Taroman, Postu Administrativu Fatululik, Munisípiu Kovalima seidauk asesu ba eletrisidade.  Aldeia hirak ne’e maka  Makous, Holba no Fatu-Loro.

“Hanesan xefe Suku sente laran triste durante ne’e iha Suku ida ne’e aldeia rua mak hetan  Naroman, maibé aldeia tolu durante tinan barak nia laran  eletrisidade seidauk tama halo komunidade hela de’it iha nakukun laran,” lamenta xefe Suku ba Timor Post iha Suku Taroman, sabadu (27/06).

Suku Taroman kompostu hosi Aldeia lima, maibé iha aldeia rua mak goza  ona independénsia, maibé aldeia tolu sei moris iha nakukun laran. Alende eletrisidade Xefe dehan komunidade preokupa ho kondisaun estrada.

Autoridade lokál ne’e husu ba ministériu relevante atu tau atensaun atu tau atensaun hanesan ba  komunidade hodi asesu fasilidade públiku. Lideransa lokál ne’e haktuir  preokupasaun komunidade nian   hato’o hosi proposta ba   governu   Munisípiu maibé rezultadu   laiha.

Preokupasaun hanesan hato’o mós hosi Xefe Aldeia Fatu-Loro Suku Taroman, Alvaro Gusmão. Lideransa komunitariu ne’e hatutan  komunidade la’ós preokupa de’it Kona-ba eletrisidade maibé preokupa mós ba  kondisaun estrada.

 Xefe aldeia ne’e husu ba governu   tau matan ba aldeia ne’e tanba ukun-an tinan 20 maibe komunidade   sei moris iha nakukun no la asesu ba Estrada  di’ak. Entretantu iha Aldeia Fatu-Loro total família uma kain hamutuk atus ida tolu nulu resin rua (132).

Preokupasaun hanesan hato’o direta hosi Xefe Aldeia Makous, Francisco Leite,  katak  komunidade sunu kamii hodi fó naroman iha tempu kalan.

Nia haktuir uluk hetan duni apoiu solar panel maibé uza tinan barak ona sasán sira ne’e barak mak at.

“Iha tempu kalan komunidade sira sunu de’it kamii hodi uza ba han no hemu no fó Naroman ba labarik sira hodi estuda iha tempu kalan”, dehan Xefe Aldeia.

Nia husu ba governu atu bele tau matan ba komunidade iha suku Taroman liu-liu ba Aldeia sira ne’ebé  seidauk asesu ba fasilidade públiku.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 7 
  • Visitors today : 1,081
  • Page views today : 1,722
  • Total visitors : 74,013
  • Total page view: 102,980

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur