Notísia foun


Timor Post (29/06/2020)-Primeiru Ministru Taur Matan Ruak marka ona ajenda ba dissolve ka hakotu ona mandatu Sentru Integradu Jestaun Krize (SIJK) ho rajaun laiha ona estadu emerjénsia ne’ebé fó biban ba luta Timor Leste nian hasoru pesti corona (COVID-19).

Diretór Jeral Sala Situasaun SIJK, Brigadeiru Jeneral João Miranda “Aluk” haktuir, iha ona ajenda marka ba loron Tersa (30/06/2020), Taur Matan Rua ofisialmente dissolve mandatu SIJK.

“Enkontru ho primeiru-ministru ko’alia hela kona-ba preparativus ba enseramentu ba sala situasaun nian, imi hotu hatene katak, situasaun emerjénsia hotu tiha ona, ne’e duni primeiru-ministru ofisialmente ensera sala situasaun aban 10 horas iha CCD,” Aluk ba Jornalista sira hafoin enkontru ho Primeiru Ministru, iha Palásiu Governu, Dili, Segunda (29/06/2020).

Entretantu Porta-vóz SIJK, Rui Maria de Araújo kontinua preokupa ho medidas preventivas hasoru COVID-19.

“Inklui iha selebrasaun relijioza sira. Laiha ona distansiamentu fíziku, la uza ona maskara, la halo ona ijiene liman,” Rui Araújo hato’o nia preokupasaun ne’e liuhusi nia konta offisiál Facebook.

Tuir nia, situasaun hirak ne’e fasilita tebes transmisaun COVID-19, bainhira virus SARS-COVID-19, tama hikas Timor Leste. “Basta ida pozitivu ita rame-rame pozitivu hotu,” Rui Araújo hatete.

Entretantu hatan ba kestaun ne’e, Diretór Jeral Sala Situasaun SIJK, Brigadeiru Jeneral João Miranda “Aluk” hatete, SIJK nia mandatu hotu ona maibé servisu tomak kona-ba prevensaun COVID-19 nian responsabilidade tomak ba Ministériu Saúde.

Kona-ba SIJK

Iha loron 31 fulan Marsu 2020, Primeiru-Ministru Taur Matan Ruak,   asina Diploma Ministerial n.14/2020, kona-ba estabelesimentu Sala Situasaun hosi Sentru Integradu ba Jestaun Krize, tuir lei n.o 2/2010, loron 21 fulan Abril, Lei Seguransa Nasionál, hodi kria Sentru Integradu ba Jestaun Krize (SIJK-sigla Portugés), nu’udar órgaun espesializada asesória no konsulta ba koordenasaun téknika operasionál ba entidade sira ne’ebé kompoin iha Sistema Integradu Seguransa Nasionál.

Dispostu iha n.o 2, artigu 38.º hosi Lei n.o 2/2010, loron 21 fulan Abril, SIJK bele funsiona hanesan Sala Situasaun iha kazu exesaun konstitusionál ne’ebé previstu iha lejizlasaun Estadu de Sítio ka Estadu Emerjénsia.

Durante Estadu Emerjénsia, SIJK sei funsiona nu’udar Sala Situasaun ho kompeténsia sira hanesan; presta apoiu téknika ba Komisaun Interministerial ne’ebé estabelese ona, koordena no monitoriza ezekusaun forsa tarefa sira, akompaña ba evolusaun sitasaun, trata informasaun hotu-hotu ne’ebé fó hosi serbisu kompetente, elabora estudu no proposta ho determinasaun hosi Komisaun Interministerial,  presta akonsellamentu ba asuntu relasionadu  no ezekuta tarefa sira ne’ebé determina ona hosi Komisaun Interministerial.

Sala situasaun ne’e, organiza ba iha unidade 8 mak hanesan; komandu operasionál, estadu maior kordenadór, forsa tarefa (liña ministerial sira) ba prevensaun no mitigasaun pandemia Covid-19, koordenasaun ofisiál ligasaun ba forsa tarefa sira, ekipa estudu no análize ba risku, sekretariadu ba administrasaun no finansas, destakamentu reasaun rápida no unidade informasaun públika.

Atu funsiona Sala operasaun ne’e Primeiru-Ministru mós halo despasu ida, n.015/PM/III/2020, hodi nomeia estrutura sira hanesan tuir mai

  1. Brigadeiru Jenerál, João Miranda “Aluk”, atual Diretor Sentru Integradu ba Jestaun Krize (SIJK) nu’udar 2º Komandante Operasionál;

  2. Kapitaun Mar e Guerra, Pedro Klamar Fuik atual Diretor IDN, nu’udar Estadu Maior Kordenadór;

  3. Sérgio Lobo, Eis Ministru Saúde, nu’udar Kordenadór ba Forsa Tarefa ba Prevensaun no Mitigasaun ba Pandemia Covid-19;

  4. Rui Maria de Araújo, eis Primeiru-Ministru no eis Ministru Saúde, nu’udar Kordenadór Ligasaun Ofisiál ba Forsa Tarefa;

  5. Francisco Guterres, eis Sekretáriu Estadu Seguransa, nu’udar Kordenadór ba ekipa Estudu no Análize Risku;

  6. Aurélio Guterres, eis Ministru Negósiu Estranjeiru no Kooperasaun, nu’udar Kordenadór Destakamentu Reasaun Rápida;

  7. Dionísio Santos, Gabinete Primeiru-Ministru, nu’udar Kordenadór Administrasaun no Finansas;

  8. José da Costa, Prezidente Tatoli.IP, nu’udar Kordenadór ba Unidade Informasaun Públika;

  9. Afonso Henriques Corte-Real, Xefe Gabinete Primeiru-Ministru, nu’udar Ligasaun Ofisiál ba Komandu Operasionál (Primeiru-Ministru);

  10. Nuno Machado Reis, asesór jurídiku Gabinete Primeiru-Ministru nian nu’udar Asesór Jurídiku ba Sala Situasaun;

Enkuantu Primeiru-Ministru Taur Matan Ruak mak hanesan Komandante Operasionál ba Sala Situasaun Hosi Sentru Integradu ba Jestaun Krize.

Jornalista: Jaime Pires

 26 total views,  26 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur