Notísia foun


Timor Post (24/06/2020)—Primeiru Ministru Taur Matan Ruak rekoñese tanba motivu polítiku halo membru governu anterior sira maioria husi CNRT nian husik hela governu konstitusionál daualu ne’ebé simu posse dahuluk iha fulan Juñu 2018.

Taur subliña kestaun ne’e iha nia diskursu iha serimónia tomada de posse ba membru governu foun hamutuk 21, iha loron 24/06/2020, iha Palásiu Prezidensiál, Bairro-pité, Dili.

Iha diskursu nia rohan, Taur husik hela mensajem agradesimentu ne’ebé kle’an no rekoñesimentu públiku ba membru sira hotu Governu Konstitusional VIII nian, ne’ebé entre fulan-juñu tinan 2018 to’o fulan-juñu tinan 2020, akompaña nia iha misaun nobre atu ukun país ida-ne’e, maibé, tanba motivu polítiku, tenke husik hela Governu.

“Agradese mós ba sira-nia empeñu, dedikasaun, lealdade no espíritu misaun nian, ne’ebé sira iha bainhira asume dezafiu atu halo parte ba Governu Konstitusionál VIII,” Taur hatutan.

Apresu espesiál ida ba sira hotu ne’ebé, tanba forsa sirkunstánsiasira nian, obrigadu atu asume funsaun kumulativa sira, husi pasta governu nian oioin, nune’e mós ba sira ne’ebé asume funsaun ministeriál interina nian sira.

“Hanesan onra ida serbisu hamutuk ho sira hotu no ha’u aproveita bibanida-ne’e atu hato’o ba sira votu susesu, saúde no prosperiedade nianiha funsaun públika ka privada sira foun, ne’ebé sira atu asume!,” Xefe Governu ne’e salienta.

Agradese mós ba membru foun ne’ebé hakarak integra iha Governu Konstitusionál VIII, ba períodu entre tinan 2020 no2023.

Agradese mós ba sidadaun, ba família, ba komunidade, ba emprezáriu, ba parseiru sira dezenvolvimentu nian no Organizasaun Naun-Governamentál sira, ba apoiu no konfiansa ne’ebé fó fila-fali ba Governu Konstitusionál VIII.

“Ami sei konta nafatin ho imi, ho imi-nia tulun no imi-nia vontade tanba ha’u fiar katak, hamutuk ita sei manán futuru no konkista dezenvolvimentu, ba Timor-Leste ida ne’ebé moris iha justisa no igualidade, fraternidade no tolerânsia.” Taur subliña.

Mudansa ba situasaun politika ne’e hahu husi Prezidente Repulika Francisco Guterres Lu Olo la fo posse ba membru governu maioria husi CNRT nian. Husi ne’e laiha ona estabilidade politika to’o Orsamentu Jeral Estadu 2020 nian xumba iha PN.

Entretantu Membru na’in-neen husi CNRT ne’ebé mak hetan ezonerasaun husi Prezidente Repúblika, Francisco Guterres Lú Olo bazeia ba proposta Primeiru Ministru Taur Matan Ruak mak hanesan:

1. Ministru Prezidénsia Konsellu Ministru, Agio Pereira

2. Ministru Negosius Estranjeirus no Kooperasaun, Dionísio da Costa Babo Soares

3. Ministra Edukasaun Juventude no Desportu, Dulce de Jesus Soares

4. Vise-Ministru Administrasaun Estatal, Abílio José Caetano

5. Sekretáriu Estadu ba Juventude no Desportu, Nélio Isaac Sarmento

6. Sekretáriu Estadu ba Kooperativas, Arsenio Pereira da Silva

Prezidente Repúblika mos ezonera membru governu na’in-rua husi Partidu KHUNTO tanba ezijénsia husi lider máximu KHUNTO nian mak hanesan;

1. Vise-Ministru Edukasaun Juventude no Desportu, João Zacarias Freitas Soares

2. Sekretáriu Estadu ba Protesaun Sivíl, Alexandrino Xavier Araújo

  (cao)

 36 total views,  2 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur