Notísia foun


(Reflesaun Simples, Koko Haree Ho Matan Lex Naturalis Thomas Aquinas)

Hosi: Elidio Agusto Guterres. S. Fil. M. Phil

(Alumnus Universitas Gadjah Mada-UGM)

Pro-Kontra Pensamentu ba KRDTL: What Happend?

Realidade hatudu katak, durante Estadu Emerjénsia nia laran problema barak mak ita enfrenta iha rai doben ida-ne’e. Problema inserteza polítika ne’ebé dura to’o tinan tolu nia laran hamosu dezafius oin-oin no hamosu opiniaun interpretasaun oin-oin ba ita-nia Konstituisaun RDTL. Hanesan ita hotu haree, rona no asiste, ita-nia nai ulun sira hala’o aktus polítika hirak ne’ebé ladún tuir koridór nu’udar reprezentante povu Maubere. Konfrontu entre Nai Deputadu/a sira iha uma fukun parlamentu ne’ebé susesu harahun meza lulik Parlamentu Nasionál, hatudu momoos katak sira hadau kadeira mamar atu tuur. La’ós ida-ne’e de’it. Desizaun PR atu promulga koligasun ne’ebé lidera hosi Avo Nana atu forma IX Governu mós sai problema ida-ne’ebé hamosu interpretasaun oin-oin ba ita-nia KRDTL. La para iha ne’e. Opiniaun foun mosu tan bainhira koligasaun foun entre Fretelin, PLP no KHUNTU atu hametin VIII Governu. PR aseita no simu koligasun ida-ne’e la presiza tempu naruk. La presiza atu estuda no estuda. La presiza atu halo konferénsia hanesan koligasun ne’ebé lidera hosi Avo Nana.

Se ita haree fali ba oin, problema meza rahun iha uma fukun Parlamentu Nasionál no troka Prezidente Parlamentu Nasionál, Arão Noé, ho Aniceto Guterres, mós hetan kritika barak hosi Partidu CNRT, jurista no povu barak mós aseita kata aktu hirak ne’e kontra ka viola KRDTL. Maibé iha sorin seluk, tuir partidu koligasun entre Fretelin, PR, PM no TR, ita bele dehan katak aktu hirak ne’e la viola ka kontra KRDTL. Sira fó opiniaun katak aktu hirak ne’e atu hakotu inserteza polítika no lori povu ba moris di’ak. Perguntas simples ne’ebé presiza husu mak sé mak loos no sé mak sala? Tempu mak sei fó resposta.

Iha biban ida-ne’e, ha’u la’ós atu haree sé mak loos no sé mak sala maibé koko haree tanba saida mak iha pro-kontra opiniaun ba konstitusaun RDTL. Se ita haree ho matan polítika, opiniaun hirak ne’e mosu tanba inserteza polítika. Ne’e klaru no realidade. Thomas Aquinas, iha nia pensamentu kona-ba polítika, nia deklara katak Lex Naturalis sai dalan mós ba polítika. Politika tenke iha sentimentu no esperansa morál no etika para hetan Bonum Comune. Maibé se ita haree pensamentu pro-kontra iha leten ho analiza Lex Naturalis Thomas Aquinas, ho dalan direitu, ita bele dehan katak realidade diferénsia ida-ne’e mosu tanba Lex Humana ne’ebé ita adopta, ita la koñese ho di’ak tuir pontus Lex Naturalis. Seluk hosi ida-ne’e, Lex Humana ne’ebé ita adopta hosi nasaun Koloniál Portugal, bele mós la par/pas atu aplika tomak iha rai doben ida-ne’e. Ita-nia kultura, situasaun no karateristika rai doben no povu ida-ne’e la hanesan ho situasaun Portugal.

Iha sikun seluk, dezafiu ida mós mak lingua. Ami joven barak mak seidauk iha konesementu ba lingua portuguesa ho diak. Realidade hatudu katak, jerasaun tuan deit mak bele hatene no komprende lolo’os Lingua Portugésa. Tanba ida ne’e, ita bele dehan katak, opiniaun e interpretasaun oin-oin ba KRDTL ne’e mosu, bele mós tanba problema simples ida ne’e. Realidade joven sira menus koñesementu iha lingua atu analza no interpreta les humana ho rasionalizmu e justu ho nia objektivu atu hetan bonum commune. Maibe, hamosu konflitu ideia ne’ebe falun metin ho espiritu politiku individual no grupu.

Iha sikun seluk tan, ita mós seidauk hatene momoos no loloos lex humana ne’ebe ita adopta hosi Portugal ne’e tuir dalan lex naturalis ka lae. Dala ida tan, lex humana ne’ebe ita adopta la’ós tuir situasaun no konseitu polítika Timor-Leste maibé tuir povu Portugal ne’ebé nia kultura diferente ho ita. Depois ida-ne’e, ita seidauk iha mós dalan ka estandarizasaun ne’ebé klaru no lolo’os atu hatene no interpreta lei hirak ne’ebé ita adopta. Dala ida tan, bele mós tanba ida-ne’e, hamosu opiniaun no interpretasaun oin-oin ba lei hirak ne’ebé iha. Problema hirak ne’e bele sai dezafius mai ita atu hatu’ur lolo’os lei ne’ebé ita adopta tuir nia koridór. Ida-ne’e la signifika katak, 100% ita sala haree no interpreta lei ne’ebé ita adopta. Maibé problema hirak ne’e sai dezafius mai ami joven sira atu haree no hatene lei ho di’ak tuir nia objetivu atu hetan bonum commune.

Thomas Aquinas, fó ita dalan haat (4) atu haree lex humana ho lolos. Lex humana tenke tuir espiritu lex naturalis. Katak, lei tenke tuir dalan rasionalizmu, tenke iha espiritu no objetivu bonum commune, tenke iha autoridade no promulgasaun tuir nia dalan. Pensamentu Thomas Aquinas sai dalan di’ak mai ita atu refleta kle’an liután lei hirak ne’ebé ita iha. Espera katak, iha tempu oin mai, ita bele kria polítika atu prodús ita-nia lei rasik, tuir ita-nia kultura no situasaun povu Timor-Leste ho espiritu lex naturaris. To’o iha ne’e, ita bele halo hipoteze ida hodi hatan perguntas what happend alias tanba saida mak iha pensamentu pro-kontra ba KRDTL, bainhira aplika ba situasaun polítika agora.

Primeiru, forma opiniaun atu halo’os aktus politika ho lei (les humana) ne’ebé ita adopta. Iha parte ida-ne’e ita presiza iha étika no morál politika; ne’ebé tuir Thomas Aquinas, tenke tuir espiritu no dalan lex naturalis ho objetivu bonum commune.

Segundu, lex humana ne’ebe ita adopta hosi Kkoloniál Portugésa bele la tuir situasaun povu no kultura nasaun doben ida-ne’e.

Terseiru, tuir ha’u-nia reflesaun ita seidauk iha dalan no lei ida-ne’ebé feitu atu analiza no interpreta lei ne’ebé ita adopta ho lolo’os tuir situasaun no kultura rai doben ida-ne’e.

Kuartu, iha problema simples, maibé nia impaktu bo’ot tebes ne’ebéita la sente mak problema linguajen. Joven sira seidauk iha koñesimentu ne’ebé kle’an iha lingua portugés atu koñese no hatene loloos lei hirak ne’ebé ita adopta ho rasionalizmu, sistematiku no objetivu. Hanesan Thomas Aquinas hateten katak lei tenke halo ho rasionalismu, sistematiku no objetivu atu lori povu hotu ba moris di’ak. Se lei la koñese ho espiritu lex naturalis, le’i sei la iha forsa hanesan le’i maibé sai coruptio legis (penghancuran hukum).

Who is the Patriotismu Konstitusaun

Realidade hatudu katak, iha tempu pasadu, ita bele dehan katak povu maubere hotu-hotu sai patriota ba rai ida-ne’e. Povu barak mak lakon buat hotu ba rai doben ida-ne’e. Maibé iha tempu agora, ita presiza halo reflesaun ne’ebé kle’an atu hatene ema ka sujeitu ida-ne’ebe sai patriotizmu konstitusaun. Iha Amo Martinho Gusmao nia artigu patriotizmu konstitusaun I-III, ita hetan informasaun no kritika ne’ebé sai materia reflesaun kona-ba sé loos mak patriotizmu konstitusionál iha tempu agora. Maibé se ita haree realidade polítika agora, ba ha’u, araska atu temi ka hetan patriotizmu konstitusaun ne’ebé loloos.

Tuir ha’u-nia reflesaun, grupu polítiku hirak ne’ebé haksesuk malu ko’alia kona-ba viola konstitusaun (pro no kontra), la’ós sala maibé atu dehan sira patriotizmu konstitusaun sente la justu no rasional. Konfrontu entre deputadu/a sira ne’ebé susesu harahun meza lulik iha Parlamentu, iha tempu hirak liu ba hatudu momoos aktu polítiku sein étika no morál polítika. Depois ida-ne’e, ita bele nota katak sira uza konstitusaun atu haloos sira-nia aktu polítika ho objetivu hadau poder. Pratika ida-ne’e, simbolu kontra lex naturalis. Hanesan Aquinas dehan, se konstituisaun ka lei ne’ebé kontrariu ho lex naturalis (hukum kodrat) la merese sai hanesan lei ida. Maibe sai Corruptio Legis/penghancuran hukum.

Se’e halo reflesaun kle’an liután, ba ha’u patriotizmu konstitusaun iha tempu agora mak povu ai-leba. Tanba saida? Realiade hatudu katak povu ki’ik laiha forsa atu kontra lei ne’ebé vigora. Povu ki’ik hakru’uk no hakne’ak iha lei nia okos. Ha’u la imajina se meza iha uma fukun parlamentu povu ai-leba mak harahun. Rezultadu ikus, kadeia mak fatin ikus ne’ebé nia sei kumpre. Keta harahun meza iha uma fukun, asidente ka dezastre hasoru Na’i Parlamentu de’it mós kadeia mak fatin ikus. To’o iha ne’e, ita bele dehan katak lei ne’ebé ita iha sente iha deit ba povu ai-leba. Equality before the law hanesan mehi iha loro manas alias mimpi di siang bolong. Se ita haree realidade hirak ne’e, pontu ha’at iha direitu/lei ne’ebé, Thomas Aquinas, hatu’ur tuir espiritu lex naturalis, lei la’ós ba individu ka grupu ida-nian de’it maibé le’i tenke lori sidadaun hotu ba moris di’ak, la mosu iha aktu polítiku hirak ne’e. Pro-kontra ideia, viola KRDTL, simbólu frakeza Governu komprende lei la tuir nia dalan. Lei la’ós sai dalan lori povu ba di’ak maibé lori haloos no hametin aktu polítika hadau kadeira.

Ramata

Atu ramata, ha’u atu hateten de’it katak adopta lei hosi nasaun ne’ebé uluk ukun ita ne’e normál. Hanesan Indonézia, adopta lei hosi Belanda. Maibé problema mak ita obriga interpreta lei ho ita-nia hanoin rasik la tuir nia koridór atu haloos ita-nia aktu polítika. No, ita seidauk iha hanoin atu halo reflesaun ba lei hirak ne’ebé iha tuir ita-nia situasaun no kultura. La fasil, maibé koko atu hanoin no halo’o neineik ho rasionalizmu mak importante. Lex naturalis, Thomas Aquinas, fó ita lisaun atu hatene no haloos lei ho rasionalizmu, sistematiku no objetivu ho espiritu bonum commune. No mós fó ita hanoin atu hatene it-nia situasaun ho rasionalizmu atu halo lei. No, lei la’ós de’it ba ema ka grupu ida maibé ba ema hotu. (*)

 47 total views,  3 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur