Notísia foun


Timor Post (24/06/2020) – Deputadu hosi Bankada Parlamentár Conggresso Nacional da Reconstrução (CNRT) konsidera Sekretáriu Jerál Mari Bin Amude Alkatiri uza partidu Fretilín sai abrigu hodi subar hosi aktus subornu simu hosi ConocoPhillips iha tinan 2001.

                Deklarasaun ne’e CNRT fó sai  liuhosi Konferénsia Imprensa Kuarta (24/5) iha Bankada Parlamentár  hodi responde ba Sekretáriu-Jerál Partidu Fretilín, Mari Alkatiri, ne’ebé konsidera ikus-ikus ne’e hatudu frustrasaun agravada ba asaun Karitativa ne’ebé Prezidente  CNRT Kay Rala Xanana Gusmão halo iha Dili no iha munisípiu.

Bankada CNRT iha Parlamentu Nasionál  aprezenta fali faktu balun ne’ebé iha relasaun ho korrupsaun loloos (simu subornu), ne’ebé komete husi Mari Alkatiri, no kazu ne’e rejista iha United States District Court for the District of Columbia, nu’udar Tribunal ne’ebé simu keixa husi Oceanic Exploration.

“Mari Alkatiri labele haluha katak Kompañia Oceanic Exploration hato’o keixa hasoru ConocoPhillips tanba fó subornu ba nia, Mari Alkatiri, ho montante por volta de $5 millions de dólares. Tribunal Distritál Columbia, iha Estadus Unidus, INDEFERE keixa ne’e, la-ós tanba substánsia matéria, maibé tanba kestaun prosesual – ida ne’e hatudu katak alegasaun husi Oceanic Exploration, hasoru ConocoPhillips, kona-ba Mari Alkatiri pertinente duni”,haktuir deputadu Gabriel Soares, liuhosi konferénsia imprensa iha Sala Bankada CNRT, PN.

Soares konsidera Mari Alkatiri fa an tiha Povu nia rikusoin no Timor-Leste nia soberania ba Australia no ConocoPhillips ba tinan 50, ho folin $5 milhoens de dólares- afinal, ho de’it $5 milhoens de dólares, Mari Alkatiri fa’an tiha nia onra, dignidade no integridade.

Deputadu ne’e hatutan tanba subornu $5 millions ne’e, Mari Alkatiri fó ordem ba Deputadus Fretilin nian atu vota kontra, hodi nega Povu-nia soberania no riku-soin, bain-hira atu ratifika Tratadu Fronteira Maritima, iha Agostu 2019. Ne’e mós tanba Bankada Fretilin, iha tempu ne’ebá (Novembro 2002), simu hotu osan subornu ne’e.

Deputadu CNRT hatutan, osan Da subornu ne’e, ConocoPhillips transfere ba iha Mari Alkatiri no Ahmad AIkatiri sira-nia konta bankária iha Banku ANZ, iha Trower Road, Monterey House, Casuarina, no Westpac Bank, iha 7 Bradshaw Terrace, Casuarina, iha Darwin, Australia.

Alende ne’e deputada sira hatán konaba Mari Alkatiri, iha ninia facebook, ameasa atu bolu ninia advogadu hodi hatama kazu ne’e ba Ministériu Públiku, CNRT husu boot Mari Alkatiri lori kazu ne’e ba Tribunal hasoru Oceanic Exploration, tanba Oceanic Exploration maka fó sai hotu númeru konta bankária, hanesan 0164955606-24866 no mós 0159015376-18038.

Bankada CNRT mós fó hanoin Mari Alkatiri labele haluha katak Auditoria husi Câmara de Contas, iha RAEOA, ba tinan 2014-2015, hatudu katak, Estadu hetan prejuizu to’o $30 millions de dólares no iha indísiu ba krime iha ezekusaun orsamentál liu $300 millions de dólares – faktus ne’e akontese durante tempu ne’ebé Mari Alkatiri sai hanesan Prezidente RAEOA-ZEESM.

CNRT mos dehan Mari Alkatiri labele haluha  katak ro-ahi HAKSOLOK, ne’ebé selu tiha ona ho osan liu ona $20 milhoens de dólares, to’o agora seidauk mai Timor-Leste no Mari Alkatiri lohi Dom Carlos Filipe Belo no Madre Guilhermina Marçal hodi fó bensan no sai madriña ba besi mamuk ida, ida-ne’e mós hanesan insultu ida ba Igreja Katólika no ba Povu Timor-Leste tomak.

 Pior liu, kona-ba Ro Haksolok, Mari Alkatiri buka lohi Primeiro-Ministro atu simu tiha todan ne’e, hodi fó tan $14 milhoens ba Luis Pité ho nia Kroni sira, hodi kontinua bosok katak hadi’a Ro Haksolok, ne’ebé tinta mós monu hotu no ekipamentu sira afinál át hotu.

Tanba ne’e, Bankada CNRT konsidera katak Mari Alkatiri nia akuzasaun korrupsaun hasoru entidade, organizasaun no indivíduu, inklui Maun Boot Xanana, ne’ebé halo asaun karidade, akuzasaun nee laiha fundamentu no apenas hatudu Mari Alkatiri ninia Paranoia ba popularidade Prezidente CNRT nian ne’ebé kontinua sa’e iha povu simples nia matan.

Mari Alkatiri ninia deklarasaun iha facebook, durante ne’e, sai hanesan esforsu ka tentativa atu subar ninia aktus korruptu ne’ebé Camara de Contas deskobre, durante halo auditoria iha RAEOA-ZEESM.

Mari Alkatiri halo FRETILIN sai ninia abrigu, atu sukit tun sukit sa’e, hodi espresa ninia frustrasaun kona-ba ninia an-rasik.

Atu hakotu, Bankada CNRT hakarak espresa katak asaun karitativa ne’ebé Maun Boot Kay Rala Xanana Gusmão hala’o, inklui Timoroan sira seluk, ONGS no Igreja, nu’udar hahalok atu manifesta de’it sira-nia domin ba populasaun ka komunidade ne’ebé presiza tulun

“Sekretáriu-Jerál Fretilín, iha ninia facebook, tenta soe lia ba públiku, ho intensaun atu dezakredita asaun karitativa ne’ebé Maun Boot Kay Rala Xanana Gusmão halo daudauk, ho akuzasaun katak asaun hirak ne’e atu subar-an husi korrupsaun. Frustrasaun Mari Alkatiri nian ne’e soe iha facebook, hodi dezakredita no minimiza Maun Boot no Timor-oan lubuk ida ne’ebé hala’o asaun karitativa hodi ajuda populasaun sira ne’ebé sofre hela falta ai han iha sira-nia moris loro-loron, hanesan konsekuénsia husi Estadu Emerjénsia”, afirma Gabriel liu hosi konferénsia imprensa iha sala Bankada CNRT PN, Karta (24/06).(Jornalista: Julio Salinas Soares)

 61 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur