Notísia foun


Timor Post (23/06/2020)—Listo de Jesus hanesan maun hosi matebian Henrigue Maia Soares, rekoñese nia parte maka tuda kanek Reitór Universidade da Paz, Adolmando Amaral, hafoin ho nia kolega dosente, funsionáriu no estudante balun ba reja iha mate uman iha loron Segunda lorokraik (22/06/2020).

“Ami rekoñese tanba sira hosi universidade iha segunda lorokraik ne’e mai iha mate uman, hodi reza maibé iha momentu dosente balu mak fihir fali  ami ne’e mak  sira reza hotu fila ba to’o iha dalan klaran família balu foti fatuk tuda ba kona Reitór nia ulun,” Listo ba jornalista sira iha mate uman Manleuana, Dili, Tersa (23/06/2020).

Nia haktuir, antes ne’e Reitór fo ona informasaun ba família matebian, maibé  família hatan ba Reitór katak negosiasaun iha loron dahuluk dala tolu tutuir malu maibé parte universidade lakohi hasoru ho família matebian.

Tanba ne’e, nia hatutan, bainhira lori matebian husi HNGV ba mate uman parte universidade telefone direita ba iha Xefe Aldeia atu ba reja iha mate uman, maibé família sira rasik fo hatene ba xefe aldeia katak sei la simu prezensa universidade iha mate uman.

“To’o ikus sira mai duni iha mate uman depois sira reza hotu laiha problema, maibé tan de’it iha dosente nain ida nantang (fihir) fali ami ne’e mak ami halo asaun uitoan foti fatuk  lori tuda sira. Ne’e labele nega,” Listo subliña.

Listo haktuir, to’o família sira atu lori matebian ba halo’ot iha mós parte universidade seidauk fó apoiu ruma.

“To’o ohin ami família rasik atu lori ona matebian ba halo’ot iha rai moris fatin Suku Goulolo, Munisípiu Ermera, parte universidade seidauk apoiu doit metan ida mai iha matebian,” Listo haktuir.

Entretantu Reitór UNPAZ, Adolmando Amaral liuhusi konferénsia ba imprensa iha loron hanesan hatete, parte universidade iha kolaborasaun di’ak ho família matebian, depois família husu atu Reitór ho estrutura universidade marka prezensa iha mortuáriu hodi hein prosesu autopsies ba mate isin, tan ne’e iha dader estrutura UNPAZ partisipa hotu iha ne’eba.

Depois iha ne’eba estrutura UNPAZ ho família tomak akompaña matebian sai hosi mortuáriu ba to’o iha fati akontesimentu hodi halo tuir dalan Kultura nian bolu hikes matebian nia klamar lori ba iha nia uma.

Prosesu sira ne’e lao to’o matebian nia uma depois ne’e  universidade organiza aifunan no lilin ho estrutura tomak ba hasae orasaun ba matebian.

“Depois halo orasaun ami  ko’alia ho matebian nia Inan no Aman inklui família maun alin  matebian nian katak, universidade prontu atu apoiu família hodi halo’ot matebian. Konkordansia ne’e la’o depois ami fila hodi  husik hela matebian ho família la’o to’o  iha dalan klaran iha grupu balu tuda hosi kotuk hodi rezulta ha’u nia ulun kanek uitoan,” Adolmando haktuir.

Adolmando afirma ho akontese ne’e prosesu la’o hela tanba hato’o ona ba iha parte seguransa.

Reitór dehan, parte universidade la tau kulpa ba família matebian, katak família matebian mak organiza fali ema mak atu tuda sira.

“Ne’e  parte universidade lahatene so buat hotu entrega de’it ba iha prosesu investigasaun,” Adolmando subliña.

Matebian ho naran Henrique Maia Soares deskonfia monu tún husi andar leten universidade ne’e iha loron Domingu madrugada (21/06/2020). Maibé husi parte família deskonfia estudante sira ne’ebe halo hela estajiu (KKN) iha universidade ne’e maka maku ho martelu no soe tun husi andar leten ba kraik.

Kazu ne’e rejista ona iha Komando Polisia Munisipiu Dili.

Jornalista: Julio Salinas Soares

 71 total views,  2 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur