Notísia foun


(Reflesaun Simples, Koko Haree Ho Matan Lex Naturalis Thomas Aquinas)

Hosi: Elidio Agusto Guterres. S. Fil. M. Phil

(Alumnus Universitas Gadjah Mada-UGM)

Artigu Patriotizmu Konstitusional I-III ne’ebé Amo Martino Gusmao hakerek, sai artigu ne’ebé viral iha mídia sosiál durante Estadu Emerjensia (EE). Iha artigu hirak ne’e, Amo Martinho halo kritika ne’ebé kro’at ba situasaun polítika atual iha rai doben ida-ne’e. Hanesan, desizaun Prezidente ba koligasaun foun entre FRETILIN, PLP no KHUNTO, destituisaun Meza PPN no seluk tan. Artigu hirak ne’e susesu kore no kritika situasaun polítika atual. Tanba ne’e ema barak mós fó komentáriu pozitivu no negativu ba artigu hirak ne’e ho multi ideia no sentimentu.
Ha’u sente kontente bainhira le’e artigu hirak ne’e, no sente kontente liután bainhira artigu Patriotizmu Konstitusional I-III hetan responde hosi Dosente Aniceto Guro Berteni Neves no Mestre Memensio Sequeira Freita. Ha’u sente sira fó ona ezemplu ne’ebé furak mai ha’u no joven sira hotu atu soran argumentu ho kritisizmu no sistematiku, liuhosi dalan hakerek. Ha’u orgullu no agradese ba ezemplar murak mean ida-ne’e.

Iha biban ida ne’e, ha’u la’ós atu responde ka kritika artigu Patriotizmu Konstitusioan I-III no artigu hosi Dosente Aniceto no maun Memensio Freitas. Maibé, ha’u koko haree situasaun polítika agora ho hanoin ne’ebé seluk. Iha parte dahuluk ha’u atu husu, tanba saida mak iha pensamentu pro no kontra ba KRDTL, bainhira liga ba aktus polítiku hirak ne’ebé ita enfrenta iha tempu hirak liu ba?
Ita hotu haree no hatene iha mídia, FB, GMNTV, RTTL.ep, Tatoli.IP, Timor Post, no seluk tan, ne’ebé fó sai informasaun kona-ba situasaun polítika atual, hanesan konfrontu entre deputadu/a sira iha Parlamentu Nasionál, ne’eb’ “susesu” harahun meza iha uma Fukun Parlamentu Nasional. Desizaun Presidente Repúblika ne’ebé fó sai informasaun kona-ba eleitu Prezidente Parlamentu Nasionál foun, Aniceto Longuinhos Guterres Lopez, tomada de pose ba membru Governu foun hosi koligasaun foun (PLP, Fretelin e KHUNTO) ne’ebé seidauk halo konferénsia hanesan koligasun entre CNRT, PD, KHUNTO, PUDD, UDT, FM, ne’ebé lidera hosi Kay Rala Xanana Gusmão. Realidade ema barak mak kritika aktus hirak ne’e.

Se ita empresta liafuan hosi Amo Martinho Gusmão, “iha tempu koligasaun ne’ebé lidera hosi Avo Nana, ita-nia PR sei estuda no estuda. Maibé bainhira koligasaun foun entre Fretelin, PLP no KHUNTO, PR la estuda tan. Nia lulus lalais ho cum laude. Hola desizaun iha tempu badak nia laran.”
Haree aktus polítika hirak ne’e, partidu CNRT halo kritika ka kontra, no lori keixa ida-ne’e ba tribunál ho argumentu kontra ka viola Konstitusaun Republika Demokratika de Timor Leste. Iha konferénsia partidu CNRT, Avo Xanana, hateten aktu polítika iha uma fukun Parlamentu Nasionál ne’ebé harahun meza Parlamentu Nasional to’o troka Prezidente Parlamentu Nasionál (PPN), Arão Noé, hanesan asaltu ka hadau kadeira. Aktus ida-ne’e, viola Konstitusaun RDTL. Iha sorin seluk, jurista, akademista, no povu barak mós kritika aktus hirak ne’e no hateten katak, aktus hirak ne’e viola ka kontra KRDTL. Amo Martinho Gusmão, iha nia artigu Patriotizmu Konstitusional III (hatan ba artigu Dosente Aniceto Guru Berteni), halo kritika ba aktus polítiku ne’ebé ita enfrenta.

Iha artigu ne’e ho klaru, Amo Martinho hateten katak, “PR hakarak duni atu hatun Xanana Gusmão ho CNRT. Dr. Lú-Olo taka matan ba konstituisaun nu’udar regra ba demokrasia pluralista…. Partidu FRETILIN tenke ukun (a tudu custo) maski la tuir ona regra konstituisaun”. No, iha parte daruak artigu Patriotizmu Konstitusional III, Amo Martinho hatutan tan katak, destituisaun meza PPN hanesan hadau poder/golpista la’ós patriota (Martinho Gusmao, Patritismu Konstitusional III).

Iha parte seluk, PR ho partidu koligasun foun, PLP, Fretelin no KHUNTO, sira sente katak saida mak sira halo tuir dalan Konstitusional. No ikus liu, tribunal rekursu fó karta ba CNRT no husu Arão Noé, hato’o keixa ba tribunál ne’e depois demisaun meza Parlamentu Nasionál ka molok demisaun meza parlamentu nasionál. Se depois demisaun meza Parlamentu Nasionál, signifika katak aktus ne’e la kontra Konstitusaun. Responde TR ida-ne’e haforte mós opiniaun hosi partidu koligasaun foun.

Bainhira haree no rona realidade polítika hirak ne’e, mosu perguntas simples iha ha’u-nia hanoin. Tanba saida mak ema barak bele interpreta Konstituisaun RDTL, tuir sira-nia opiniaun hodi halo’os aktu polítika? Ita-nia fraakeza ne’e iha ne’ebé? Se ita hotu interpreta Konstitusaun no dehan katak ita mak lo’os eh lo’os duni, sé mak sala no sé loos mak ita bele dehan Patriotizmu Konstitusaun? Atu haree problema hirak ne’e ho di’ak, ha’u koko haree ho matan lex naturalis/hukum kodrat, Thomas Aquinas, ne’ebé esplika kle’an kona-ba direitu.

Thomas Aquinas ho Pensamentu Lex Naturalis
Thomas Aquinas ka Thomas hosi Aquino (1224-1274) moris iha Rocca Sicca, besik Napels, Italia. Eskola iha Napels, Paris, no sai alunus hosi Albertus Agung. Iha tinan 1252 nia hanorin iha Paris no Italia. Hasai doutoramentu iha Universidade Paris. Depois de ida-ne’e, durante tinan 10 nia laran hanorin iha konventu Dominikano iha Roma no fila fali ba Paris atu kontinua hanorin no hakerek to’o nia hakotu moris iha mundu ho idade 49, iha loron 7 de Marsu 1274 (Harun Hadiwijono, 1989: 104).
Leitura primeiru no famozu ne’ebé Thomas Aquinas hela, mak Summa Theologiae. Iha Summa Theologiae ne’e nia laran, Thomas Aquinas, esplika kona-ba esénsia no definisaun direitu ba artigu ha’at no iha pontu importansia ha’at ba defenisaun direitu mak hanesan, “perintah akal budi” ne’ebé sai estandarizasaun ba aktu umana, autoridade da formula de lei no promulgasaun ho objetivu hetan Bonum Comune/Kebaikan Bersama (Reza A. A. Wattimena, 2011: 62).

Iha nia pensamentu konaba direitu, iha parte dahuluk Thomas Aquinas fahe direitu ba oin tolu: Lex Aterna (hukum abadi), Lex Naturalis (hukum kodrat) no Les Humana (hukum buatan manusia). Iha direitu oin tolu ne’e, hukum kodrat sai fundasaun morál. Tuir Thomas Aquinas, Lex Humana (hukum buatan manusia) ka direitu produsaun ita ema, bele uza bainhira tuir Les Naturalis (hukum kodrat). No, sira ne’ebé iha autoridade (juis sira) mós tenke tuir Lex Naturalis. Simplesmente, Thomas Aquinas atu dehan katak konstituisaun ka lei ne’ebé kontrariu ho Lex Naturalis (hukum kodrat) la merese sai hanesan lei ida maibé sai Corruptio Legis/penghancuran hukum. Hukum kodrat/Lex Naturalis sai pasu dahuluk ba lejitimidade ba ukun hotu-hotu. Lei ka konstitusaun tenke kaer metin objetivu nasaun nian, lori povu ba moris di’ak no armonia. La’ós lori buka ukun/kadeira atu hetan di’ak ba aan rasik (Rina Rehayati, 2016: 19).

Tuir Thomas Aquinas, lei sei la sai lei ne’ebe sah/justu bainhira la tuir pontu importánsia haat ne’ebé sai xave ba lei. Primeiru, “rasionalizmu lei”. Lei ne’ebé iha tenke tuir hanoin ne’ebé kle’an, sistematika no rasionál. Lei tenke logis. Hodi sosiedade bele komprende ho di’ak. Segundu, lei tenke iha espiritu bonum comune. Lei ne’ebé iha tenke iha objetivu bonum comune. Lei iha la’ós de’it ba ema ka grupu ida maibé ba ema hotu nia di’ak. Terseiru, autoridade halo lei. Ema sira ne’ebé halo lei tenke iha espiritu hadomi no hadia povu nia moris. Lei ne’ebé sira halo tenke lori povu hotu ba di’ak no armonia. Kuartu, promulgasaun lei. Tuir Thomas Aquinas, lei buat ida-ne’ebé tenke tau iha ema-nia laran no hanoin hodi haree no hadia povu. Atu hetan lei ne’ebé loloos tenke iha promulgasaun atu ema hotu bele hatene no halo tuir (Reza A. A. Wattimena, 2011:62-64).

Tuir Thomas Aquinas, lei sei la sai lei ne’ebé loloos bainhira laiha pontu importánsia haat iha leten. Lei ne’ebé laiha pontu impotánsia haat iha leten sei lori povu no nasaun ba konflitu tanba lei la justu/sah. Ema hotu bele interpreta tuir nia hakarak tanba laiha dalan ne’ebé di’ak atu hatene no halo tuir ho loloos no justu. Tuir Thomas Aquinas, buat ne’ebé di’ak no buat ne’ebé aat ita hatene hosi lex naturalis/hukum kodrat ho rasionalizmu. Hosi ida-ne’e, ita bele nota hahalok ne’ebé mak di’ak no la di’ak. Simplesmente, Lex Naturalis nia signifika katak, moris tuir ita-nia kodratu nu’udar umanu ne’ebé iha espiritu di’ak, tanba Lex Naturalis implementasaun hosi Lex Aterna (hukum abadi) mai hosi “Nia.” Tanba ne’e tenke iha rasionalizmu atu komprende no hatene.

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,070
  • Page views today : 1,454
  • Total visitors : 75,507
  • Total page view: 105,286

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur