Notísia foun


Timor Post (22/06/2020)—Reitór Universidade da Paz (UNPAZ) Adolmando Soares Amaral ho dosente sira hetan atake tuda ho fatuk husi grupu deskoñesidu iha mate uman joven ida ho naran Henrique Maia Soares ne’ebé monu tún husi andar leten universidade ne’e iha loron Domingu madrugada (21/06/2020).

Tuir kronolojia, Reitór Adolmando haktuir, iha dader loron Segunda (22/06/2020) parte universidade ba akompaña prosesu autópsia ba mate isin iha Hospital Nacional Guido Valadares (HNGV). Depois de ne’e, universidade ho família sira ko’alia ba malu ho didi’ak i konkorda atu hamutuk ba halo’ot matebian.

Husi sala autópsia-HNGV, família ho parte universidade hamutuk lori matebian ba nia uma, no liuhusi matebian nia monu fatin halo tiha ritual bolu matebian nia klamar iha aredor universidade. To’o iha mate uman besik ho universidade, Aldeia Evaka, Suku Bairro-pite, Postu Administrativu Don Aleixo, Munisipiu Dili. Hafoin ne’e, parte universidade nian fila ba ida-idak nia uma no iha parte lorokraik, parte universidade inklui reitór, dosente no estudante sira lori aifunan ba mate uman hodi reja ba matebian i kontinua koordena ho família sira kona-ba prosesu funeral ho didi’ak hela, maibé atu fila maka derepente de’it hetan tuda maka’as husi kotuk sira nia kotuk.

“Depois de ne’e, ami atu fila maka mosu parte terseiru halo asaltu ida ba ami, sira tuda husi kotuk kona dosente sira no ha’u mós hetan pankada iha ulun,” Reitór Adolmando haktuir ba Timor Post hafoin akontesimentu.

Hatan kona-ba karik deskonfia ema sira tuda ne’e husi parte balun, Reitór Adolmando dehan, nia rasik la hatene tanba nia parte durante iha mate uman ko’alia ho família sira ho di’ak tebes, maibé nia subliña, iha grupu terseiru kahur ona iha mate uman.

“Ami ba hotu iha mate uman. Agora, ema sira tuda ne’e mós antes ne’e iha ona mate uman, ami tama tan ba reja tiha, depois ami ko’alia ho família sira. Ami sai atu fila ne’e maka tuda husi kotuk,” Reitór hatutan.

Parte universidade ho família intende malu di’ak. Tanba ne’e nia haktuir tan, iha momentu ne’eba polísia sira ne’ebé fó hela seguransa iha mate uman ne’e halo kedas atuasaun, no hafoin ne’e sira ba hato’o ona keixa iha Polísia Eskuadra Aimutin hodi halo investigasaun no halo kapturasaun ba autor sira hafoin halo’ot tiha matebian.

“Sé polísia kaptura kedas ema balun entaun ita la kontribui ba estabilidade. Iha mate uman mós ema barak, i ema bele pániku. Depois terseira parte sir abele aproveita liu tan situasaun. Nebe, ami ko’alia ona depois de haloot tiha matebian maka prosesu sei la’o,” Reitór Adolmando subliña.

Ema hirak ne’ebé fatuk konsege kona maka dosente ida fatuk kona iha ain, funsionáriu UNPAZ ida hetan tuda iha kotuk laran, ida seluk fatuk kona iha liman-kbas no Reitór rasik fatuk kona iha ulun.

Tuir planu, matebian, família sira sei lori ba halo’ot iha nia knua Ermera. No parte husi universidade mós sei partisipa.

Entretantu bainhira akontesimentu joven ida mate ne’e, Polísia Nasionál Timor Leste (PNTL) komandu Munisípiu Dili, detein suspeitu na’in 16 estudante no, identifika joven lokál no família matebian na’in 5, harii postu seguransa relasiona ho kazu domingu (21/06) madrugada ne’ebé rezulta joven HMF ho idade 21 mate iha kanpus UNPAZ.

“Prosesu investigasaun la’o detein ona ema hamutuk 16 ho identidade hanesan, RJCP, JRA, ESDJ, CDAG, FC, DI, ABFT, HNA, AMU, NM, LDSDJ, JPJ, AJP, JSJ, JCM no FAL prosesu ba investigasaun, no sira ne’e mai hosi estudante estajiáriu. Ita mós halo ona identifikasaun ba juventude lokál hamutuk ho matebian ne’e mai iha fatin akontesimentu Nain 5 mak inisiál, MF, JF, FM, ACE no MN”, hatete Superintendente Xefe Armando Monteiro ba Jornalista sira iha Kaikoli, segunda (22/06) .

Armando haktuir hosi rezultadu investigasaun kazu ne’e mosu iha atividade estaziadu ida halo iha UNPZ no, matebian partisipa iha atividade ida ne’e, la espera iha madrugada akontesimentu ida tantu hosi universitáriu no komunidade iha ne’ebá rezulta ita nia joven ida ho identidade HMF, idade 21 mate no rezulta mós estudante na’in 6 kanek.

Armando hatete akontesimentu ne’e normaliza kedas hosi PNTL hodi evakua vítima kanek na’in 6 ba halo tratamentu no matebian, Forensik evakua ba sala mortuariu HNGV, PNTL mós rekolla evidénsia iha motorizada ida tantu mós alkol no sasán sira seluk hanesan martelu no besi kanu.

Armando afirma polisia mós sei halo investigasaun kle’an ba família ho reitór UNPAZ tanba fó sai kronolojia la hanesan.

“ Família dehan estudante sira mak baku mate maka soe tun, reitór dehan, nia halai mak monu rasik. Maibé agora prosesu investigasaun sei la’o hela no PNTL sei esforsu liu hosi finalidade investigasaun mak bele deskobre motivu hosi akontesimentu” hateten Armando. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,138
  • Page views today : 1,863
  • Total visitors : 74,070
  • Total page view: 103,121

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur