Notísia foun


Timor Post (22/06/2020)- Ministru Prezidensiál Konsellu Ministru no Ministru Koordenadór Asuntu Ekonómiku interinu, Fidelis Leite Magalhães informa, Segunda (22/06) organiza reuniaun entre konsellu inter-ministeriais iha Palasiu Governu hodi avalia medida ba responde impaktu dezastre naturais ne’ebé akontese hahú hosi tinan 2019.

“Ita boot sira akompaña dezastre naturais ne’ebé akontese kedas iha fulan Outubru tinan kotuk (2019) família besik rihun tolu mak hetan afetadu hosi inséndiu ahi han no anin boot ne’ebé akontese iha munisípiu sira hanesan Ainaru, Aileu, Bobonaru, Ermera no Likisá, no iha loron 13 Marsu ne’e mós iha inundasaun, iha Fulan Maiu (2020) mós dezastre naturais ne’ebé akontese iha kosta súl. Ne’ebé, objetivu hosi reuniaun ne’e mak atu halo avaliasaun ba medida hotu ne’ebé mak governu foti tia ona hodi responde ba iha vítima inundasaun nia nivel ba apoiu familiar sira, hanesan sira nia uma ne’ebé mak estraga no balun la asesu ba ai-han no mós ba nesesidade báziku sira ne’ebé mak iha koordenasaun hosi ministériu estatál ninian”, Fidelis informa ba jornalista sira palasiu governu segunda (22/06).

Porta Voz Governu ne’e relata, populasaun ne’ebé mak sai vítima hetan apoiu ho montante total $ 933.000 ne’ebé atuasaun governu halo no fó mós apoiu ai han no material konstrusaun sira hodi bele hadi’a fali sira nia fatin.

Nia akresenta iha enkontru refere Sekretáriu Estadu Protesaun Sivíl (SEPS) mós foti inséndiu koléjiu Maliana iha loron 1 Marsu, inundasaun 13 Marsu ne’ebé afeta família hamutuk 4.680 iha sidade Dili, vítima hamutuk 2.194, iha munisípiu hanesan Baukau, Lautem, Manatutu no Vikeke inklui mós sira ne’ebé sai vítima hosi rai halai no rai monu ne’ebé akontese iha ponta leste no kosta súl.

Fidelis relata Vise Primeira Ministra no Ministra Solidariedade Sosiál mós ohin aprezenta dadus ba apoiu hirak ne’ebé MSSI fó enkadernasaun ho ministériu sira seluk hodi fó resposta ba vítima dezastre naturais nia.

Enkuantu Ministru Obras Publika mós iha ninia parte halo aprezentasaun ida kona-ba obra hirak ne’ebé halo tiha ona hamutuk ho ministériu sira seluk no ajénsia sira hodi bele hadi’a fali infraestrutura hirak ne’ebé hetan estragu liuliu tanba iha loron 13 Marsu liubá.

No Ministru mós aprezenta dadus kona-ba projetu hirak ne’ebé la’o hela no prosesu ba reabilitasaun estrada no ponte sira ne’ebé hetan estragu hosi bee no inundasaun ne’ebé akontese iha fulan Maiu tinan ne’e.

(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 1,102
  • Page views today : 1,694
  • Total visitors : 72,754
  • Total page view: 100,912

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur