Notísia foun


Timor Post (20/06/2020)—Asidente tráfegu ne’ebé akontese iha loron Sábadu lorokraik (20/06/2020) iha estrada area One Dollar Beach Suku Fatumeta, Postu Administrativu Laklo, Munisipiu Manatuto, rejulta Francisco de Fatima Soares (Amali) tinan 20 ho Lepolgido O. F. Ximenes (Alebo) tinan 23, hakotu iis hafoin evakua husi fatin akontesimentu ba Hospital Nacional Guido Valadares (HNGV), Dili.

Kronolojia akontesimentu, matebian na’in-rua sa’e hamutuk motor ho marka Mio ho xapa Matríkula 4376 husi dirasaun Dili ba Postu Administrativu Fatuberlio no Karreta ho ho marka Hilux ho xapa matríkula 14-290 dirasaun Manatuto ba Dili.

Tuir sasin, bainhira xoke matebian joven na’in-rua ne’e iis sei iha maibé bainhira evakua to’o HNGV la konsege salva tanba kondisaun gave tebes. Karreta ne’ebé xoke roda rua ba sorin karuk nian para sai tiha ba valeta estrada sorin, no motor ne’ebé ho kondisaun rahun latan hela iha estrada laran. Inkuantu matebian na’in-rua ida-idak monu hela iha estrada laran, no kondutor karreta halai hodi ba entrega a’an ba polísia.

Komandante Polisia Munisipiu Dili, Superintendente Armando Monteiro haktuir, nia parte asegura ona kondutor ba karreta Hilux ho marka metan ne’e hodi halo investigasaun.

Tuir Armando, asidente ne’e akontese tanba karreta ho motor ne’e hala’i ho velosidade maka’as.

Amali ho Alebo nu’udar estudante foun iha Ensinu Superior Institute of Business (IOB). Iha loron hirak liu ba husi Fatuberlio ba Dili atu tama ona eskola, maibé tanba eskola seidauk la’o ho normal maka sira na’in-rua desidi fila fali ba Fatuberlio hodi mosu tiha asidente ne’e.

Matebian Amali hela iha Aldeia Salukin, Suku Klakuk, no Alebo husi Aldeia Fatuboe, Suku Fatukahi, Postu Administrativu Fatuberlio.

Júlio da Costa Martins nu’udar Amali nia viziñu kost iha Manleuana haktuir, Amali ho nia kolega Alebo ne’ebé hela iha Bebonuk, iha dader sira ba tiha iha eskola IOB, maibé parese tanba eskola seidauk la’o los maka sira deside fila ba Fatuberlo.

“Matebian nain rua hafoin ba haree eskola laiha ho ida ne’e sira sai sai husi kost Manleuana iha oras tuku 12 meudia ho nia kolega ne’ebé hela iha Bebonuk dehan atu ba Fatuberlio,” Júlio haktuir ba Timor Post, Sabadú kalan (20/06/2020).

Nia dehan, molok Amali ho Alebo aranka, iha duni primu ida ne’ebé sira hela hamutuk iha kost ne’e hasé duni katak, lalika ba ona Fatuberlio tanba ho situasaun dadauk ne’e eskola bele la’o normal ona i husu atu túr hakmatek de’it, maibé Amali ho Alebo hakarak duni ba Fatuberlio to’o eskola la’o loos mak foin fila fali.

Observasaun Jornalista Timor Post haktuir, matebian na’in-rua família sira ho parte karreta na’in hasoru malu ona hodi toma responsabilidade. No iha kalan maizumenus tuku 10 liu hatama ona matebian na’in-rua ba kaixaun iha sala mortuáriu HNGV no lori ba hala’o serimónia funeral iha Fatuberlio. (lcl)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,029
  • Page views today : 1,591
  • Total visitors : 73,961
  • Total page view: 102,849

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur