Notísia foun


Timor Post (19/06/2020)-Parlamentu Nasionál promete sei husu deskulpa ba povu liu hosi formás ritual ida ne’ebé halo foun meza-Parlamentu Nasionál sei halo iha 30 Augustus 2020.

Prezidente Parlamentu Nasionál, Aniceto Guterres hateten konsellu administrasaun aprova termus referénsia planu atividade no nia orsamentu hodi halo foun meza-Parlamentu Nasionál.

Prezidente-PN dehan, prosesu ritual ba meza foun Parlamentu Nasionál prosesu la’o hela ho Governu liu-liu Ministériu Estatál no Sekretáriu Estadu Arte no Kultura.

Parlamentu Nasionál liu husi konsellu administrasaun halo orsamentu provizóriu atu aprova hodi halo servisu, maibé final seidauk tanba ne’e númeru labele adianta lai ba públiku, ne’e desizaun konsellu administrasaun.

Nia akresenta, atu husu deskulpa, maibé Parlamentu Nasionál instituisaun ida, só ema mak bele husu deskulpa ba povu, tanba ema mak sala.

Maibé hakarak hateten ba públiku katak prosesu ritual ba meza foun Parlamentu nian mós hanesan forma ida atu husu deskulpa ba povu.

“Atu sentidu kle’an liután ba buat ne’ebé akontese atu husu deskulpa karik, tanba ne’e mak halo ritual ne’e, ritual ne’e hanesan forma husu deskulpa públiku mak ne’e, povu,” dehan Prezidente Parlamentu Nasionál, ba jornalista sira PN.

Bainhira mak atu halo ritual ba meza-Parlamentu Nasionál, Nia informa, fofoun Parlamentu Nasionál hanoin iha 15 Jullu hodi taka sesaun lezislativa ida ne’e, maibé preparasaun seidauk prontu, tanba Parlamentu Nasionál haree sei lori tempu halo preparasaun liu-liu konstrusaun ba meza ne’e rasik.

“Ami nia hanoin, konsellu administrasaun aseita tiha ona, katak sei halo iha dia 30 agustus, koñesidu ho loron konsulta popular, hanesan reprezenta loron ida ne’ebé ita resolve problema liu husi referendum, bele dehan loron demokrasia nian”, hakotu Aniceto.

Jornalista: Julio Salinas Soares

Editor: Mariano Marrins

 33 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur