Notísia foun


Timor Post (17/06/2020) – “Regulamentu dixiplinár ida uluk ministru la iha podér, buat hotu entrega ba komjer, (Komandu Jeral), komjer la foti prosesu dixiplina ministru nonook de’it labele halo buat ida. Agora lae, ba oin, ministru ei nusa la foti prosesu ba ne’ebá, nia tiru ema, nia baku ema, foti (medida)!

“Portantu quero dizer metin liu, aperta metin liu. Hosi eskerda-direita, oin-kotuk ita halo para aban bainrua polisia bele hanesan F-FDTL respeitu liu ba iha ema, direitus umanus, labele baku tun baku sa’e tiru tun tiru sa’e hanesan cowboy kota”, haktuir Ministru Defeza no Interior interinu, Filomeno Paixão de Jesus iha entrevista ho jornalista bainhira remata aprezenta regulamentu dixiplinár PNTL foun ba Ministru Prezidénsia Konsellu Ministru no Ministru Koordenadór Asuntu Ekonómiku interinu, Fidelis Magalhaes iha Parlamentu Nasionál Kuarta (17/06).
Eis Brigadeiru Jenerál F-FDTL, hatutan regimentu dixiplinár foun ne’e para polisia ho F-FDTL la’o hanesan de’it ba los mai los de’it. La iha tan sabraut hanesan uluk.

“Konteúdu imi hare de’it F-FDTL los ka lae, e F-FDTL ikus nee la’o los ka lae, PNTL mós tinan rua tolu tan tenke los hanesan nee, imi hakarak hanesan nee ka lae, hakarak to” Paixaun pergunta ba Jornalista iha PN.

Nia rekoñese la hanesan ho F-FDTL maibé ita hein tinan rua tolu PNTL tenke loloos, tenke la’o los iha prosesu dixiplinár nia laran inklui iha lei ne’e rasik hadi’a rekursu umanu.

“Rekursu umanu maka justisa, imi bele hare prosesu nee budu hela de’it, iha 2010 to agora mós iha. Ne’e ita atu hakarak hadi’a PNTL oin nusa, la’os lori ba tribunal maka halo lakon, lae tribunal halo lakon tanba o lori buat ida be tinan 10 ba ne atu halo saida, ne o sala ona o kolia de’it ba prazu o lakon ona. Ida nee hadi’a hotu”, hatutan Meno.

Alende ne’e iha regulamentu foun ne’e sita mos kona bá prosesamentu. Ministru haktuir katak uluk lahatene bainhira maka ita fó represaun agravada, bainhira maka fó prizaun, bainhira maka ita fó detensaun ba membru ne’ebé kontra regra PNTL.

“Agora lae, ba oin nee kondisaun ne’e moos, presupostu nee mós ke ita hatene bainhira maka ita aplika represaun, bainhira maka ita aplika suspensaun, bainhira mak ita aplika detensaun, bainhira maka ita duni sai nia, nee mós hotu ne’ebé imi (jornalista) espera kuandu (lei) sai ba maka imi hare di’ak liu, eh”, hakotu Ministru.

Entretantu regulamentu foun ne’ebé atuál Ministru defeza no interior interinu aprezenta ba Ministru Prezidencia Konsellu Ministru, sei lori ba aprezenta iha reuniaun konsellu ministru diskute molok halo aprovasaun.

Jornalista : Jaime Pires

Editor: Mariano Martins

 21 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur