Notísia foun


Timor Post (16/06/2020)- Vise Ministru Edukasaun Juventude no Desportu (MEJD), João Zacarias Freitas naran tama mós iha lista remodelasaun governu daualu. Nune’e, iha loron Tersa (16/06/2020), eis membru husi Partidu KHUNTO ne’e ba ko’alia assuntu ne’e ho Primeiru Ministru Taur Matan Ruak (TMR), iha Palásiu Governu, Dili.

“Ha’u mai hasoru rona direita hosi Primeiru Ministru oinsá ha’u nia kontribuisaun durante ne’e  no ikus ha’u rasik asume nu’udar Vise Ministru Edukasaun Juventu durante tinan rua ne’e,” Vise Ministru João ba Jornalista sira hafoin hasoru malu ho Primeiru Ministru Taur Matan Ruak.

João hatete, nia simu desizaun ne’e ho laran moos no ho dignidade tanba durante mandatu kuaze tinan rua la komete kazu ruma liga ho Korrupsaun, Koluzaun no Nepotizmu (KKN).

“Tanba ne’e ohin hanesan agradesementu ida. Primeiru Ministru hato’o nia agradesimebtu durante tinan rua servisu iha oitavu governu ne’e,” João Zacarias dehan.

Entretantu kona-ba karik desizaun ne’e tanba KHUNTO mak rekomenta ba Primeiru MInistru, João Zacarias dehan, iha tempu badak sei ko’alia klean assuntu ne’e.

“Ha’u agora dadaun indepedente maibé ha’u sei ko’alia barak iha tempu oin mai ha’u sei ko’alia sobre ha’u nia pozisaun iha partidu KHUNTO, husu ita bo’ot sira pasiénsia hodi hein tanba lialoos sei mosu mai,” João Zacarias afirma.

Entretantu membru governu daualu ne’ebe hetan ona remodelasaun mak Ministru Agrikultura no Peska (MAP), Joaquim José Gusmão dos Reis Martins (KHUNTO). Pasta ne’e asumi fali husi Pedro Reis (KHUNTO).

Membru governu husi Partidu CNRT hamutuk na’in-7 iha governu daualu, na’in-6 mak hatama ona karta rejignasaun inklui Dionísio Babo Soares, Ministru Negósiu Estranjeiru no Kooperasaun; Dulce de Jesus Soares nu’udar Ministra Edukasaun Juventude no Desportu (MEJD); Abílio José Caetano Vise Ministru Administrasaun Estatal; Nélio Isaac, Sekretáriu Estadu Juventude no Desportu; Arsenio Pereira, Sekretáriu Estadu Kooperativa; no Agio Pereira, Ministru Prezidénsia Konsellu Ministru lakohi tama kedas Palásiu tanba moe bainhira akontesimentu hadau malu kadeira iha Parlamentu Nasionál no hetan ona ezonerasaun husi Prezidente Repúblika Francisco Guterres Lú Olo. Inkuantu Teofilo Caldas nu’udar mós membru husi CNRT assume pasta Sekretáriu Estadu Arte no Kultura la kumpri desizaun partidu.

Jornalista: Jaime Pires

 100 total views,  1 views today

Please follow and like us:

NOTÍSIA FOUN

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur