Notísia foun


Timor Post (12/06/2020)- Maski instituisaun estadu no privadu inklui eskola sira kuaze iha territóriu laran ativa daudaun atividade, maibé regra nu’udar matadalan foun hodi prevene Covid-19  foin prepara hosi Ministériu Saúde (MS).

Ministra Saúde Odete Belo, ne’ebé foin simu pose, informa matadalan ne’ebé prepara  halo espesífiku tuir instituisaun ida-idak nian nune’e fasil atu aplika.

“Ba eskola sira iha matadalan ne’e husu tenke iha Tanke bee nia, tenke iha Torneira ne’ebé mak sulin, tenke iha sabaun, labarik sira tenke uza máskara, no aplika nafatin distánsia entre labarik ida ba labarik seluk. Ne’e fasil eskola hotu tenke kumpre”, hatán Ministra Odete bainhira jornalista konfirma hafoin remata enkontru ho Xefe Governu Taur Matan Ruak iha Palasiu do Governu Sesta (12/06).

Baje ba matadalan ne’ebé iha Membru foun iha Oitavu Governu nian esklarese matadalan sei halo espesífiku liután tuir instituisaun ida-idak ninian.

“Ita prepara ona matadalan jerál ida ba iha instituisaun hotu-hotu la’ós ba iha eskola de’it maibé ba instituisaun públiku hotu-hotu. Entaun baze ba iha matadalan ida ne’e depois ita espesifika liu matadalan ne’e ba iha ida ne’ebé”

“Ezemplu ba eskola, ita halo revizaun uitoan ba eskola báziku nian ba ensinu superior ne’e oinsá no agora iha juventude desportu mós husu hela, sira hakarak atu halo fali sira nia atividade desportiva, entaun ita hare fali ba matadalan ida ne’ebé mak espesífiku tuir instituisaun ida ne’ebé mak husu”, hatán Ministra

Ministra realsa eskola ensinu báziku sira ne’ebé balun la’o ona tanba sira iha ona matadalan maibé  tenke prontu kumpre no prenxe kritériu sira ne’ebé iha matadalan ne’e husu.

Antes ne’e reitór Universidade Nasionál Timor-Leste (UNTL) Prof. DR Francisco Miguel Martins, hatete UNTL sei sidauk simu regra foun hosi Ministériu relevante maka prosesu aprendizajen sei hein lai.

Jornalista: Jaime Pires

Editor: Mariano Martins

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,035
  • Page views today : 1,603
  • Total visitors : 73,967
  • Total page view: 102,861

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur