Notísia foun


Timor Post (11/06/2020) -Kondisaun instalasaun infraestrutura eskola ensinu báziku iha area remotas barak maka la merese tanba la iha atensaun hosi Governu.

Eskola ne’ebé la merese ida maka Eskola Ensinu Báziku Filial Holpilat Postu Administrativu Maucatar Munisipiu Covalima.

Dader-dader  kuandu estudante ho mestre sira mai, molok hala’o prosesu aprendizajen tenke  raut uluk animal kuda no bibi ten  ne’ebé nakonu iha sala laran tanba eskola ne’e  moru laiha atu hodi satan animal tama area eskola nian.

Kada tinan eskola ida ne’e hetan apoiu livru hosi ministériu relevante maibé susar atu bele rai   tanba laiha biblioteka própriu atu hodi asegura. Kuandu udan mai tama iha sala laran livru bokon at hotu. No eskola refere la marese atu sai ba fatin hodi halo prosesu aprendizajen.

“Tempu udan susar tebes ba alunus ho mestre sira tanba mestre sira atu hanorin estudante sira ladi’ak  tanba udan been tama hotu eskola laran, ne’ebé iha tempu udan ne’e  susar tebes alunus sira atu bele simu prosesu aprendizajen ho di’ak. Alende ne’e kadeira ho meza la to’o. Durante ne’e estudante sira tuur iha rai, hakerek tau de’it kadernu iha ain-tuur” haktuir koordenadór Ensinu Báziku Filial Holpilat, Joao Batista Cardoso ba Timor Post.

Cardoso hatutan eskola ne’e kondisaun infraestrutura iha janela didin de’it ho au, maibé udan kona dodok hotu ona. Eskola esforsu hadi’a rasik ho osan eskola nian maibé la másimu, maski nune’e nia husu governu atu hadi’a uluk uma kakuluk hodi Satan lai udan been ba estudante sira.

“Proposta  hatama hotu ona ba iha edukasaun liuliu atu hadi’a uluk  kondisaun eskola nian tanba udan been sempre tama hotu eskola laran. Animal sira hanesan karau ho bibi   tama to’o sala laran sira ne’e hotu. Ami simu livru hosi edukasaun mai mós susar tanba udan mai livru at hotu tanba iha armazein atu hodi rai livru mós la iha”, lamenta Cardoso.

Entretantu total alunus iha eskola báziku Filial Holpilat hamutuk 106 no  profesores na’in 7.

Jornalista: Julio Salinas Soares

Editor: Mariano Martins

 

 

 

 

 

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,094
  • Page views today : 1,677
  • Total visitors : 72,746
  • Total page view: 100,895

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur